Esta 6 - Deduamiti

Modekai eweheimigec

¹ Anu tofocnac imohai ngictaungo gaufefea kpetereu yengena siduha siduckibiu ohoohoya feec, imoc mehama osomigecdeac edeyunuec.

² Edeyunuu siduckibi imohai ngictauac nagugareng yohockang Biktana nga Teres yereng ngictau Dzeksi kpebucgeecdeac dekiric anec, Modekaingo meficyuruma deficgema edeyunuec, siduc imoc osomigec negenec.

³ Osomigec negemma ngictaungo kpesiyemmeec, “Modekaingo faka imoc anecac turunga noc wiac gombunga didiu ammi-ammia?” Kpesiyemmeu uangicfora yeneng meremmigec, “Kpahac, wiac mong mi ammiing.”

⁴ Degec ngictaungo deec, “Amasobennu merang kecde?” Demanu imohaingoc Hamangngo ngictau edema Modekai wotunnu gbedickeudeac ngictauac sobeng kiwau emmeec.

⁵ Engsikeu uangicfora yeneng edegec, “Hamangngo amasobennu nande.” Degec ngictaungo yearu meenggecdeac edeyunuec.

⁶ Anu Hamangngo emmanu ngictaungo kpesimiec, “Ngictaungo eweheiheigoc ngic monggac negeng ngereemiudeu ye dafi ammibesonga?” Kpesiu Hamang yengenaac negemma yofi negensiec, “Merang ni feracnuma kecdeac ngictaungo ye kpackuneng miude?”

⁷ Ifi negemma ngictau yofi meremmiec, “Ngictaungo ngic merac negeng ngereemideu,

⁸ ye ngictauac ngakpihereha susuic nga ngictau yengena becosi kumbosongngagoc imoc mehabisia.

⁹ Mehama ngictaungo ngickiwa yenearunac mong uayoac miu yengena ngakpihereha susuic, imoc heimiu becosi witiau emma taru ngickiwa mibisia. Anu ngictaungo ngic merac sesehema yeac negengngereede ye becosifu taonggac singtoau mekemma yofi dekperagibisia. ‘Henggec ngictaungo ngic negeng ngereemide, ye ifi ammibesonga!’ ”

¹⁰ Deu ngictaungo Hamang suema deec, “Ge denec isoc bic yombong kemma ngakpiherec susuic nga becosi mema oda naguyau Yehuda ngic Modekai tacde yearu mekenna. Amma noc yoac dedang, imoc mi wawa modacma sasawa ye ammidacna.”

¹¹ Ifi deu Hamangngo ngakpiherec nga becosi mema kenec. Kemma Modekai ngakpiherec heimima taongtoaac singtoau becosifu mema yofi dema kpacma yerecgeec. “Ngictaungo ngic merac negeng ngereemide, ye ifi ammibesonga.”

¹² Imocac ngadeau Modekaingo dzigenema ngictauac oda naguu kenec. Nga Hamangngo ine ubaebic mema kiacngo nefonggeu ngicngac yeneac kicfu mesukiki amma gereagoc ameau kenec.

¹³ Kensikema noc wiac fingecmiec, imocac siduc sasawa enema Dzere nga tosofora ayemmedarec. Anu enema Dzere nga dederecgefora yeneng yofi demigec, “Yaguc Modekaingo hanahema memagude nga ye Yehudangic fora kecdeu ge wiac mong amma ferahaba dema ine geangga manganedacnade.”

¹⁴ Yeni yegoc denegeng amma tacmagecngoc, ngictauac ngickunengfora yeneng hama Estango nesogaiac semeng me-mengere anec, Hamangngo imohai bic yombong kenudeac edegec.