Esta 5 - Deduamiti

Estango ngictau nga Hamang heitaiyuruec

¹ Anu yakasegeac uameme harebec imohai Estango ngactau ngakpikporuha heima ngictauac ama manaac sobennu ngictautatacac manabisic imocac hoangaugeng emma nanec. Nga ngictaungo ngictautatahau tacma naguugeng kic fiec.

² Fima Ngactau Esta ama manaac sobenu nanu hemma negeng ngereemima kapong golngo memea imoc mema Esta gbong kpeec. Anu Estango ifi hemma wegenac kemma kapong dumbengau kpesereec.

³ Ifi anu ngictaungo yofi kpesimiec, “Ngactau Esta ge noc wiacac anggende? Nga ge yoacga sibia damoc? Ge eucererenna noboha gembadeac denadeu imoc desigembade.”

⁴ Ifi deu Estango yofi meremmiec, “Ngictau, geng negenna ngereeudeu Hamanggoc ngeri yaguc nesogacsogaiac semeng me-mengere andua, imohai habesera.”

⁵ Anu ngictaungo deec, “Estango kpesideac Hamang bicyombong wangec hagec, Esta dedac isoc andede.” Imocac ngictau nga Hamang yeri Estango nesogaiac semeng me-mengere anec imohai kenoc.

⁶ Kemma waing doku nema tacma ngictaungo Esta monggoc kpesimiec, “Ge yoacga sibia damoc? Nga ge noc wiacac anggende? Ge eucererenna noboha gembadeac denadeu imoc geac andarude.”

⁷ Deu Estango turunga yofi meremmiec, “Neac kpesikpesi nga sibiana yofi:

⁸ Ngictau geng negenna ngereeudeu neac songo nga kpesikpesina yomoc modacma ge nga Hamang ngeri wereckenu nesogaiac semeng monggoc me-mengere ambade, imohai haecguc ine ngictau geac kpesikpesiac turunga merembade.”

Hamangngo Modekai kpebucgeudeac negenec

⁹ Anu Hamangngo naso imohai hereau ungerereng fingeru sogacsogaigoc kemma henu Modekaingo ngictauac oda naguyau tarec, ihacnac mi yarec nga kengec mi angang kpehengaima yacma eweheihei ammiudeac waec. Ifi anu Hamangngo Modekaiac herea kukueec.

¹⁰ Ifi amma Hamangngo mong me mong mi edeede yengenaarusac femanu ameau kenec. Kemma enema Dzere nga yengena tosofora heitaiyunuec.

¹¹ Heitaiyunuu hagec Hamangngo dzofinaha nga yengena medacfora imocac siduc ayemmeec. Amma ngictaungo ngickiwa yenearunac yesac sesehema eweheimigecdeac enarangina faiec, imocac siduc imoc ifingoc ayemmedarec.

¹² Amma imocsac kpahac, monggoc torokpema yofi deec. “Ngactau Estango nisac ngictaugoc nesogaiac heitainuruu kendic. Nga wereckenu ye me yegoc kpahac, nigocngocsac kendedeac monggoc heitainurudac.

¹³ Anu Yehuda arennunac Modekaingo ngictauac odanaguyau taru henganduae, naso imohai ine ungerereng neac hereunac meickeu wiac sasawa hemba mefiha kpac yombong angande.

¹⁴ Hamangngo ifi edeyunuu, enema Dzere nga tosofora sasawa yeneng yofi degec. “Ge dena Modekai gbedickenideac wotung mong hereayaac kpetea 25 mitaacsoc gununggeec, anu wereckenu asoac ngictau kpesimini Modekai nemmeu imohai gbedickeni ubasacnebeso. Ifi ammaguc ge ngictaugoc semennu nesogaiac kembesera.” Ifi degec Hamangngo yoac imocac negenu naric yombong anu wotung mong gununggeec.