Esta 4 - Deduamiti

Estango arengfora yeneac agengngina tiec

¹ Modekaingo wiac sasawa imocac siduc negemma ubaebic kuneng mema ngakpi hereha kpesuckema yukung heima mateng nadzicma ubahodunggoc ngictauac taontoau emma arohoma kiacma kenec.

² Nga ngictauac amau embesonga ine matenggoc mi engkecgec, ifiac amma yeng kengkecma ngictauac oda naguyau tarec.

³ Tacmanu ngictauac dedeseri kibi imocngo prowins sokodaru Yehuda sasawa yenearu kpabetoreng kuneng fingerec. Anu yeni sasawango yakasege amma yukung heima mateng nadzicma ubahodunggoc arohoma kiacgec.

⁴ Anu Estaac uangicfora ngickuneng yeni nga uangacfora yeneng yearu kemma Modekaiac siduc ammigec Estango ubaebic kuneng meec. Mema Modekaingo yukung hesiudeac Estango ngakpikporuc faimiu kenu Modekaingo ine imoc heiudeac waec.

⁵ Ifi anu Estango ngictauac uangiha ngickuneng Hatakngo kemma Modekai nocngo ubaebic meficgemide, imoc kpesinegeng anudeac sueec.

⁶ Sueu ngickuneng Hatakngo Modekai henudeac ngictauac oda naguyaac kiwau sobeng mong feec, imohai enec.

⁷ Anu Modekaingo wiac sasawa fingecmiec nga Hamangngo Yehuda ngicngac memanganeyunudacgecdeac negemma ngictauac dzo tohonggarenggaru faiudeac deseriec, imocac siduc ifingoc ngickuneng Hatak ammidarec.

⁸ Amma kpedzongaac yunugecdeac kibi meserima faigec Susa taonnu kendarec, imohacnac kibi mong ifingoc Estaaru mekemma haniaya dekperagimiudeac Modekaingo ngickuneng Hatak miec. Mima Estango Yehuda ngicngac yeneac agengngina tima ngictauac kicfu serima ubahodunggoc demembanang ammiudeac ifingoc edeec.

⁹ Edeu ngickuneng Hatakngo dzigene kemma Modekaingo dafi edeec, imoc sasawa Esta ededarec.

¹⁰ Ifi anu Estango Modekai edeudeac ngickuneng Hatak edederecge ammiec.

¹¹ Ammima yofi edeec, “Ngictaungo ngic me ngac mong mi heitaimanu engpekac ngictauac amamanaac sobennu emmeude ye homebeso nga emmanu ngictaungo gol kaponga mema gbong kpeudeu ye onggonggegecde. Dedeseri imoc ngickiwa nga ngictauac prowinsu ngicngac kecdae yeni sasawango negendae. Ammanu ngictaungo ine mi kpacnuma kecmanungoc uameme 30 wisickede.”

¹² Estaac yoac imoc Modekai edeu negemma

¹³ turunga yofi meremmiec, “Ge Yehudaarenunac mocgungo worama ngictauac amau kecnecac komoc kpenade ifi mi negembesena.

¹⁴ Ge yaguc enac mi anggenadeu, Yehuda goa neneac memefic nga yungecyungecngo mong yenearunac hau ge nga manggaac arengfora ngeni kpac andacgecde. Anu geng ine ebic naso yofinenggac mesinununadeac ngactau tatac menec gedang!”

¹⁵ Ifi deu Estango Modekaiaru yoac turunga yofi faiu kenec,

¹⁶ “Ge kemma Yehuda ngicngac Susa taonnu kecdae, yeni sasawa kpedzucyununa uameme harebecac manau neac negensima yakasege amma hadzing nga toforec nenedoku monnec mi nebisia. Anu ngeni yakasege anggecde isoc ni uangacfocnagoc ifingoc annide. Ifi amma neng singyoac kpema ngictauaru kembade. Nga kpebucnugecdeac degecdeu, imoc naric homebesare.”

¹⁷ Ifi deu Modekaingo monggoc dzigene kemma Estaac dederecge imoc hafoangoc modacdarec.