Danicel 7 - Deduamiti

Yang neackpac

¹ Belesatsarngo Bawel ngictau kefecac kifa kpete mocgu imohai Danicel ye fefeyau fema gaukpefing mong negen negengau henec. Amma ye gaukpefing ohoec imoc yofi ande.

² Ni tofocnac imohai kpefinnau hemba kurumenggac firang neackpac yeneng kondung mefiranggegec kuneng yarec.

³ Ammanu yang kunengtoa neackpac kondunnunac eregec yenenai. Amma yeni siricngina mong mong anec.

⁴ Yang warac warac imoc laion isoc amma ye kpeganga imoc hasaukpesac nenggac kpeganga isoc anec. Anu hembareng kpeganga kpedzima miacgec ye ngic isoc hania yohockangngo bangecfu tima nanudeac ammima ngicwouboc torokpemigec ngicsiric anec.

⁵ Anu yang kpetea yohockang hemba imoc bear isoc anec. Ye nobockpakpacsac nanudeac ammigec nga enarau pandzeng harebec feec. Anu yoac yofi edegec, “Yacma wiac goaac fusia homac nena!”

⁶ Imocac witiau yang mong imoc leopard isoc henai nga ye kpeganga noboc noboc neackpac femiec. Ye oruha neackpac amma ye ngictau amma wiac garenggeudeac kuc migec.

⁷ Tofocnac feai imohaingoc torokpema yang kpete neackpac henai imocngo ngicngac ebictoa meficgeyemmeu kengectoa anggecdeac siric anec. Ye kuhagoc yombong nga enactoaya imoc aiengngo memea. Amma wiac goa gbokoma wiac goa kidzamema tosea imoc haniango titackema tidzameec. Amma ye yang warac warac nanggec imoc feracyunuma siriha mong yombong anec amma ye baiha ten nanec. Ifi hemma kengecnuyombonggeec.

⁸ Ifi anu baic imoc hembareng baiha kapia mong imoc yeneac botucnginau erema harebec bic nanggec yeni kpefacyunuma meicyunuma tatacngina meec. Nga baiha imohai kiwa imoc ngic yeneac kic isoc amma enarango nendefeyoac wiac kuneng deec.

Bicngoc yombong nga nasoya kpac kefec, ye henec

⁹ Anu imoc hembare ngictautatac goa faigec tacgec bicngoc yombong kefec nga kecereema kecde yeng imohai heima tarec. Ye wambaya imoc ais maande, ifi isoc kongac koporarac. Nga orucdzoeya imoc ramadzoya kongaha isoc anec. Ye ngictautataha imoc gerecborang imocac wil imoc gerec borang tima wewengaima feec, ifi yombong anec.

¹⁰ Anu yeac hoannunac gerecngo erema doku hakecde, ifi isoc haec. Tausenga tausenga yeneng yeac enactofoc tofoho ua megec. Millionga millionga yeni yeac kicfu nanggec. Anu yoac desi desinaso fingeru yoac isinggegecdeac kibi homac kparatiegec.

¹¹ Anu ni tofocnac imohaingoc hemma kecbare baicngo nendefeyoac dekecmanu yang imoc kpehomema kpetotiema sebia imoc gerecfu dzedarudeac ukugec.

¹² Nga yang tosea yeni bangec nga ngic garengyunugecdeac kucngina imoc meickegec. Nga kekecngina imoc mehereyemmegec yeni nasongina faifaia imocac tomai kecgec.

¹³ Anu tofocnac gaukpefinnungoc hembare mongngo kurumenggac hoenggoc haec, ye siriha ngicac medacac siric isoc. Yeng bicngoc yombong kefec nga kecereema kecde, yearu hau yeac hoannu hesickegec.

¹⁴ Anu yeng garengyunuudeac kuc mima kuc kibikperagiagoc nga eucerereng migec ngicngacareng nga bangecareng amma yoacareng sasawango yeni yeac enactofoc tofohoareng amma eweheimibesandae. Ye ngickuneng amma nasoya nasoya garengyunu kecengkecbesande, imoc wisic wisickea kpac. Yeac eucererenga imoc mong mi kpetotiebesandae, kpac.

Kpefinggac hania

¹⁵ Anu ni negen negennau onga fingerec imocngo damutoa meficgenenu asuna ebic meec.

¹⁶ Ifi anu nanggec yenearunac mong yeac wegenac kemma wiac imocac hania fora yombong dekperaginenudeac kpesimiai. Kpesimiba imoc sasawa negentegecbadeac sirihau dekperagima edenuec.

¹⁷ “Yangtoa neackpac imocac hania yofi, ngictau neackpac bangecfu fingecbesandae.

¹⁸ Anu eucerereng imoc Engenatoaac kpetiacareng yeni yemmegec megecde. Mema eucerereng imoc tigec enu wisic wisickea kpac nasoya nasoya mekecbesandae.”

¹⁹ Ifi edenuu ni yang kpete neackpac yeac hania fora yombong negembeso anenec. Imoc yofiac sasawa yenearunac siriha mong anec. Amma ebic kengehagoc meficgeyemmeudeac siric yombong anec. Enara imoc aiengngo memea amma soria imoc aieng sacsacngo memea nga wiac goa gbokoma wiac goa medzamema tosea imoc haniango titackema tidzameec.

²⁰ Amma baic teng oruhau nammagec baic mong ngade ereu baic harebec yeni yeac kicfu fotockema magec, imocac hania fora yombong dekperaginenudeac negenai. Amma baic imoc kiwagoc nga enaragoc anu nendefeyoac homac deec amma yeng kuneng amma feracyunuec, imocac hania ifingoc negentegecbadeac negenai.

²¹ Anu baic imoc hemma kecbare yeng kpetiacareng yenigoc dzikac kpema yenigoc ewema feracyunuec.

²² Anu kecma mong bicngoc yombong nga nasoya kpac kefecngo, yeng hama yoacngina desiu Engenatoaac kpetiacareng yeneng yoacfu firang anggec. Anu naso dedea hasikeu eucerereng imoc kpetiacareng yemmeu yeneng mema mekecgec.

²³ Ifi kpesimiba yofi deec, “Yang kpete neackpac imocac siriha yofi, imoc eucerereng kpete neackpac bangecfu fingerude imoc siriha mong anude amma eucerereng sasawa yeni isoc kpac. Imocngo bangectoa bangec gbokodacma tidzamema hedzamebesande.

²⁴ Anu baiha teng imoc ngictau teng yeneng eucerereng imohai fingecgecde. Yeneac ngadeu ngictau mong fingerude, imoc ngictau warac kecgec yeni isoc kpac. Ye siriha mong yombong anude amma yeng ngictau harebec imoc yunuude.

²⁵ Amma Engenatoa denggbaringgema Engenatoaac kpetiacareng kenghedzic hahedzic ayemmeude. Amma naso nga singyoac faifaia imoc meickema wiac siriha mong meudeac negenu imoc yeac mariu faigec naso mocgu nga naso yohockang nganoc amma naso mocguac noboha kecgecde.

²⁶ Anu wisickeu yeac desi desinaso fingeru ngictauac kuc meickebesandae amma ye kpetotiegec kpac ambesande.

²⁷ Anu eucerereng nga ngictau kecgecdeac kuc nga ngickuneng amma garengyunugecdeac kuc imoc Engenatoaac kpetiac ngicngac yeni yemmegec yeneng kurumenggac bageu eucerereng sasawa garengyunuma kecgecde. Yeac eucerereng imoc feengkecbesande. Ifi feu ngictau bangec kucnginagoc sasawa yeni ye eweheimima yoara tofohobesandae.”

²⁸ Gaukpefing imocac yoac yomohai wisickede. Danicel ni negen negennango ubaebictoa yombong meficgenenu kicmesuna meaiu gaukpefing imoc ubaherenau sufuma mekefai.