Bangec kisiu 8 - Deduamiti

Kifa arengyunuec

¹ Kebungo Mose yofi edeec,

² “Ge Aharon yofi edena, ‘Ge kifa sewen miacyunuma tatacnginau faiyununa ihai kifananangaac hoangau mekperagibisia.’ ”

³ Ifi deu Aharon ye Kebungo Mose dederecge ammiec, imocac siricfu mema kifa miacyunuma tatacnginau faiyunuu kifanananga nanec mana imoc mekperagidarec.

⁴ Nga kifanananga imoc gol hamango heimengere amma megec. Haniaunac engkecma fawau wisickede wiara imoc sasawa gol heimengere amma megec. Imoc Kebungo Mose onga edzahaeec imocac siricfu kifanananga meec.

Lewingic uau desiyunubesonga

⁵ Anu Kebungo Mose yofi edeec,

⁶ “Ge Isracelngicngac yeneac botucfunac Lewingic segereyunuma meisingyunuma medzuacyunubesena.

⁷ Ge yofi ayemmema dzuacyunubesena, yeni kongaha anggecdeac ge kongaha anganggac doku gigina yenerebeso. Nga yeni kemma sebidzongina sasawa heidacma wambangina dzuacdacbisia. Yeni ifi amma kongaha andacgecde.

⁸ Ifi amma yeni burumakangiwa mocgu kifaya mocgu angana mema sese imocac yaka dema wit uha gombunga yombong mema kerecdokugoc yerecgema faidacbisia. Nga geng burumakamedaha mong mena imocngo kopocsic meic meickeac sese ambeso.

⁹ Mema Lewingic hesicyunuma Kebugoc ewacemeemeac kporucamaac hoangau kemma nanggec Isracelkpebung hafoangoc kpedzucyunudacbesena.

¹⁰ Lewingic hesicyunuma Kebuac kicfu faiyununa nanggec isracelngic yeneng maringina yeneac orucngina witiau faibisia.

¹¹ Ifi anggec Aharongngo isracelngic yeneac sese, imoc sese fendzonggeandae, ifi isoc Lewingic kpabangyunugec Kebuac kicfu meyunuma faiyunuu yeni naric Kebuac marimefic ua mema kecbisia.

Lewingic sesengina

¹² Anu Lewingic yeneng maringina burumakangiwaac orucngirau faima mong imoc ngaba meic meickeac sese dema faibisia nga mong imoc Lewingic, yeneac Kebuaru turung kpoukpouac sesegerec ambeso.

¹³ Ifi amma Lewingic Aharon nga medacfora yeneac kicnginau faiyununa yeneng Kebuac sese anggecdeac sese fendzonggeandae, ifi isoc kpabangyunubisia.

¹⁴ Ge ifi amma Lewiac kisicarengfora Isracelngicngac yeneac botucfunac segereyunuma meisingyununa yeni neac areng amma kecbisia.

¹⁵ Nga geng dzuacyununa kongaha anggecdeac sese fendzonggeandae, ifi isoc kpabangyunuma neac kicfu faiyununa yeni Kebugoc ewacemeemeac kporucamau marimefic ua mekecbisia.

¹⁶ Yeni isracelngic yeneac botucfunac segereyunuma sesengina dema nenggec. Isracelngic yeni nonggo heremanaunac morocmedacfocngina sasawa imocac turunga imoc Lewingic yeni neac yombong amma kecgecdeac segereyunuma meisingyunuai.

¹⁷ Isracelngic yeneac botucnginau ngic me yang warac warac fingecgec yeni sasawa neac yombong. Ni Aigitabangecfu warac fingec fingera kpebucyunudarai wenac imohaingoc neac kpetiacareng anggecdeac dema segereyunuma desiyunuai.

¹⁸ Imocac ni Isracelngicngac yeneac waracmedacfocngina yeneac turunga Lewingic segereyunuma meyunuai.

¹⁹ Anu isracelngic sasawa yeneac botucnginaunac Lewingic segereyunuma meyunuma sese dema Aharon nga medacfora yeni yemmeai. Yemmema isracelngic ngeni Kebugoc ewacemeemeac kporucamau marimefic ua megecdeac deaimoc yeni ngeneac tatacngina mema neac ua imocnoc mebisia. Yeni ngaba meic meicke ua ifi megec Isracelngicngac yeni kpetiac amaac wegenac kenggec hafei homectoayagoc mong mi fingecyemmeude.”

²⁰ Kebungo Mose ifi edeu Mose nga Aharon amma Isracelkpebung hafoangoc yeni Mose dederecge ammiec, imocacsoc modacma Lewingic ayemmegec.

²¹ Yeni Lewingic kongaha anggecdeac faka amma wambangina dzuacgec Aharongngo Kebuackicfu meyunuma sese fendzonggeandae, ifi isoc kpabangyunuma ngaba meic meicke ua mema Kebuac hehenu kongaha anggecdeac ua meec.

²² Anu imocac ngadeau Lewingic yeni Aharon nga medacfora yeneng yenenggareng ayemmemagec yeneac bageu kecma uangina megecdeac Kebugoc ewacemeemeac kporucamau enggec. Kebungo Lewingic yeneac yoac Mose dederecge ammiec, imocac siricfu anggec.

Lewingic yeneac ua

²³ Anu Kebungo Mose yofi edeec,

²⁴ “Lewingic yeneac kekec yofi ambeso, ngic kifangina twentifaiffunac namma ende yeni Kebugoc ewacemeemeac kporucamau hama ua mekecbisia.

²⁵ Nga Lewingic kifangina fifti anu ine ua imoc wama arennu monggoc mi mebisia.

²⁶ Yeni ine medacfocngina Kebugoc ewacemeemeac kporucamau ua meandae, yeni naric meficyunugecde nga uayoac mong mi yemmebesonga. Ge Lewingic uayoac ifi deyemmema arengyunubesena.”