Bangec kisiu 6 - Deduamiti

Kebuac segereemeareng

¹ Kebungo Mose yoac yofi edeec,

² “Ge Isracelngicngac yoac yofi edeyunubesena, ‘Ngic me ngac mongngo Kebuac kpetiacareng anudeac segereemeudeac yoac mong deserima deudeu

³ ye waindoku me dokuseria goa mong mi nebeso. Ye waindoku aengagoc nga dokuseria aengagoc wiac goango memea, imoc mi nebeso. Amma waing fora mepusuckeni dokuya maande, waindoku imoc ifingoc mi nebeso nga waing fora gbori me kerenga, imoc sasawa mi nedacbeso.

⁴ Ye ifi desiemema kecmanu wiac sasawa waingngo memea, me waing mangganga fede me kpea kpeude imoc mong mi nebeso.

⁵ Anu ye desiemeemeac nasoya femanungoc orucdzoeya mi merecgebeso. Ye Kebuac ngic segec segerea amma kefudeac negemma ifi kecmanungoc nasoya wisickebeso. Nga ye kpetiac kefude naso imohai orucdzoeya wau tacma hereebeso.

⁶ Amma ye Kebuac amma desiemema yeac areng kefude, naso imohai fareng monggac wegenac mi kembeso.

⁷ Nga ye Kebuac hehenu wonongagoc ambacac nonggomanghora me dacmunafora me naingfora yenearunac mongngo homeu yeneac fareng wegenahau ifingoc mi kembeso. Ye Anutuyaac ngic anudeac segereemeec, imocac ma oruhau heima kecdeac amma ifi ambeso.

⁸ Imocac ye desiemema naso dedea hafoangoc Kebuac kpetiacngic kefude.

Kebuac hehenu wonongagoc anudeu

⁹ Anu ngic mong ye yeac kpeheringau eng bic homeudeu ye desiemeu oruha kpetiac anecac amma imocngo oruha ammiu Kebuac hehenu wonongagoc anudeu ine wenac kpete sewennu kongac kpeude, naso imohai orucdzoeya merecgebeso.

¹⁰ Ifi amma wenac kpete eit imohai gomoc gomoc yohockang me kebesacmedaha yohockang Kebugoc ewacemeemeac kporucamaac naguyau womonggarenggaru mehabeso.

¹¹ Mehau womonggarengngo meyuruma mong kopocsic meickeudeac sese dema faima mong imoc yengena kopocsic meickeudeac dema hafoangoc ohobeso. Imoc ye fareng kpesereu kopocsicgoc anecac ifi ambeso. Meu wenac imohaingoc oruha kpetiac anudeac desibeso.

¹² Anu desiemema dedeseriyoara monggoc heigborima segereemema Kebuac kicfu wenac dafiguc warac deseriec imocacsoc monggoc kpetiac amma kefudeac deseribeso. Deserima ramangiwa kifaya mocgu angana imoc turung meic meickeac sese dema faibeso. Imoc yofiac, ye Kebuac kicfu wonongagoc anecac warac segereemeudeac nasoyaac fora mi fingerec.

Segereemedae yeneac singyoac

¹³ Nga ngic yeni segereemegecde yeneac singyoac yofi fede, segereemengic nasoya wisickeu ye Kebugoc ewacemeemeac kporucamaac naguu hesicke kembisia.

¹⁴ Kemma wiac yofi Kebu sese memibeso, Ramangiwa medaha mong kifaya mocgu angana nga sebia soronga yombong nga puringa kpac, sese imoc hafoangoc dzeudeac faibeso. Nga ramangagera mong kifaya mocgu angana sebia soronga yombong nga puringa kpac, imoc kopocsic meickeudeac sese anude. Amma ramangiwa mong kifaya mocgungoc sebia soronga yombong mema fau yeni imoc yenahafoc negec imocngo ruaeac sesea ambeso.

¹⁵ Amma wiac yofi torokpema faibeso, icsogong aenga kpac sakac mocgu, icsogong uha gombunga yombong nga kerecdokugoc yerec yerecgea ifi memea, nga icsebera aenga kpac kerecdokungo hoso hosoya amma seseac yaka nga dokuya dedea imoc ifingoc faibeso.

¹⁶ Wiac ifi fau womonggarengngo imoc mema Kebuac kicfu faima yeac kopocsic meic meickeac sese nga sese hafoangoc dzeude imoc faima ohobeso.

¹⁷ Anu womonggareng ye ramangiwa nga icsogong aenga kpac sakac mong imoc mema Kebuaru ruaeac sese dema yenahafoc negecdeac faibeso. Ye seseac yaka nga doku ifingoc faibeso.

¹⁸ Fau ngic desiemema kecde ye Kebugoc ewacemeemeac kporucamaac naguu oruha kpetiac anudeac desiemeecac orucdzoeya, imohai namma merecgema ruaeac sese bageau gerec dzeude imohai fau dzebeso.

¹⁹ Anu ngic desiemema kecma segereemeemeac ma imoc oruha merecgeu wisickeu womonggareng ye ramangiwaac fuaya birikennu oho ohoya nga sakacfunac icsogong mocgu aenga kpac amma icsebera mocgu aenga kpac mema yeac mariu faibeso.

²⁰ Faima womonggareng ye imoc monggoc wangecma Kebuac kicfu sese imoc fendzonggebeso. Fendzonggema imoc segereu yeac yaka kpetiac anude, imoc nga mokucsira fendzoc fendzonggea amma seseac tabuya imoc womonggarengngo nebeso. Uaareng imoc megec wisickedaru ngic segereemema Kebuac kpetiacngic anudeac desiemeecmoc ye waing monggoc naric nebeso.

²¹ Imoc ngic segereemema Kebu negemmima naso wegenac kpetiac anggecdeac desiemegecde, imoc yeneac singyoac. Nga ye wiac goa naric sese dema faibeso. Ye desiemeec naso imohai yoac mong deserima deudeu ye imohai torokpema Kebu sese memiude, dedeseriyoac imoc modacma wiac medacbeso. Imoc segereemegecdeac singyoac fede, imoc modacma mebeso.’ ”

Kenecyoac

²² Kebungo Mose yoac yofi edeec,

²³ “Ge Aharon nga medacfora yofi edeyununa, ‘Ngeni Isracelngicngac yoac yofi edeyunuma kenecyunubisia,

²⁴ “Kebungo kenecguma genggareng anggembeso.

²⁵ Ye kicmesuyango nerarangguma henanggubeso.

²⁶ Ye kicmesuya miaru kpahacgumanu ruaea gembeso.”’

²⁷ Yeni ifi dema neac kpacna Isracelngicngac yeneac witinginau faigecde, imohai ni kenecyunubade.”