Bangec kisiu 5 - Deduamiti

Ngicngac goa ngadeau kecbisia

¹ Kebungo Mose yoac yofi edeec,

² “Ge Isracelngicngac yofi dederecge ayemmena, yeni ngicngac leprahafeinginagoc nga sebidokungina maande nga fareng kpeseregec imoc yeni Kebuac hehenu wonongnginagoc amma kecdae, yeni sasawa tembuc tembuc sueyunuma kporucamahabuu kekecnginaunac meicyunugec ngadeau kemema kecbisia.

³ Kporucamahabuu kekecngina imoc Kebuac kicfu wonongagoc mi anudeac ngeni ngic me ngac imoc hesicyunuma ngadeau kemema kecbisia. Ni kporucamahabuu botucnginau kecduaeac ifi ambisia.”

⁴ Ifi deu Isracelngicngac yeni imoc modacma ngicngac imoc kporucamahabu kekecnginaunac meicyunuma ngadeau meyunuma kenggec. Kebungo Mose edeec, imocac siricfu anggec.

Kopocsicac turunga kpoubesonga

⁵ Anu Kebungo Mose yoac yofi edeec,

⁶ “Ge Isracelngicngac yoac yofi edeyunubesena, ‘Ngicngac negen negensingngina Kebuaru fede, imoc naso goau herecgema fakangina mangana angandae. Nga ngic me ngac mong ye ifi amma Kebu ngadehema kopocsic meficgeudeu ye fakayaac amma turungagoc anude.

⁷ Ifi anu ye kopocsic meficgeec imoc deficgebeso. Anu wiac memanganeec, imocac turunga wiac imocac buma fora hafoangoc faibeso nga buma imocac faiffunac mocgu torokpebeso.

⁸ Nga ngic manganeec, yeac sactosofora mong mi kecdaeu nga kopocsicac turunga merac mibesonga imoc obohoudeu imocac turunga imoc Kebu mibesonga dema womonggareng mibeso. Amma ye ifingoc ngaba meic meickeac ramangiwa mong faima neac hosuc ohou ngaba kpac anude.

⁹ Anu Isracelngicngac yeni sese kpetiac sasawa womonggarenggac mariu faiandae imoc yeac andacbeso.

¹⁰ Ngic yeni sasawango tembuc tembuc sese kpetiac womonggareng migecde imoc yeac andacbeso. Mongngo wiac mong mekemma womonggarenggac mariu faudeu wiac imoc yeac anude.’ ”

Negeung

¹¹ Anu Kebungo Mose yoac yofi edeec,

¹² “Ge Isracelngicngac yoac yofi edeyunubesena, ‘Faka mong yofi fingerude gedang, ngac mongngo memeturanggac sing segema ewea tobanggema serofaka yofi anude.

¹³ Eweango mi hemmanu ngic mongngo ngac yegoc fema yearu sebidokuya faude. Ifi fingeru ngac ye Kebuac hehenu wonongagoc ande, yeng negen negeng imoc mesufuma kefude. Anu faka imocac hania dedengic mong mi kecde nga mongngo mi hemmanu ngac ye faka imoc anec.

¹⁴ Nga kopocsic meficgeec me mi meficgeec, imoc eweango mi negentegecma sifu enemaac negeung anudeu ye enema womonggarenggaru wangecma kembeso.

Womonggarenggaru wangecma kembeso

¹⁵ Anu ye kembeso dema ngac yeac sese momoc mekemma faibeso. Ye bali uha efakpete 1/10 faima sese imocac witiau kerecdoku mong mi hetinggebeso nga wiac homungkerengagoc mi faibeso. Imoc yofiac, sese imoc negeung nga wiac heigboriyemmeudeac sese. Imoc angammeme mangana fingerec, imoc uba negen negengnginau negenggecdeac sese.

¹⁶ Anu womonggarengngo ngac imoc hesickeu Kebuac kicfu kemma nambeso.

¹⁷ Kemma enang mong mema doku kpetiac imohai kpakeu kemeu kporucwomonggac bangecfunac sendung mema imocac witiau fau kemebeso.

¹⁸ Kemeu womonggarengngo ngac ye Kebuac kicfu fau nammanu orucdzoeyaac witiha mesima ngac imocac mariu negeunggac hania negen negenggac sese imoc faima ye yengena ine sowecac doku hodungagoc menambeso.

¹⁹ Menamma ngacngo yoac deserima deudeac yofi edebeso, “Ge ewegagoc kecmana ngic mongngo gegoc mi feec nga ge sing dindingac mi wadanggac amma Kebuac hehenu kongaha amma kecnecfu sowecdoku aengagoc yomocngo ebic mong mi meficgegembeso.

²⁰ Me ewegaac bageau kecma sing segema Kebuac hehenu wononggagoc annec nga ngic mongngo gegoc feec isoc.”

²¹ Ye ifi dema ngac ye sowecyoac deudeac ammima, torokpema yofi deseribeso, “Kebungo sowecguu kogochiega dzapareu godongga yadiu ngicngac yeneng geac negenggecde, ye faka mangana anecac sowehagoc ande. Ifi amma ngadegugecde.

²² Nga sowecdoku yomocngo heregau kemema sowecguu kogochiega dzapareu godongga yadibeso.” “Ifi edeu ngacngo yofi debeso, ‘Fora yombong, ifi fingecnembeso.’”

Sowecdoku hodungagoc neude

²³ Ifi deu womonggareng ye sowecyoac imoc kibi kpoukpouya monnu ohoma doku aengagocngo imoc dzuacbeso.

²⁴ Dzuacma sowecdoku aengagoc imoc ngac miu neu imocngo heredzoictoa meficgemiude.

²⁵ Ifi amma ngacac mariaunac negeunggac sese wangecma imoc Kebuac kicfu fendzonggema aratau mekemma faibeso.

²⁶ Anu sese imohacnac mari mocgu mema aratau wiac heigboriyemmeudeac sese dema hosuc ohobeso. Imocac ngadeau ngac imoc doku neudeac ngombonggema gumebeso.

²⁷ Nga doku gumeu nema Kebuac kicfu wonongagoc amma ewea tobanggeu memeturanggac sing memanganeec isoc sowecac doku hodungagocngo herea manau kemema dzoic kpendzengtoa meficgemiude. Meficgemiu godoma yadiu kogochieya dzapareu ngicngac yegoc kecdae yeni imoc hemma negenggecde, ye sowehagoc.

²⁸ Nga ngac ye kopocsic mong mi meficgema Kebuac hehenu wononga kpac kongaha yombong anudeu ebic mong mi fingecmimanu torokpema medac naric monggoc kpenanggema meude.

Negeunggac singyoac

²⁹ Negeunggac singyoac imoc yofi, ngac mongngo eweagoc kecma sing segema Kebuac hehenu wonongagoc anudeac angemeude

³⁰ me ngic mongngo negeung meficgema enema negeung ammiudeu ine ngic ye enema Kebuac kicfu faibeso. Fau womonggarengngo singyoac sasawa fede, imocacsoc modacdacma ngac wiac ammibeso.

³¹ Anu ewea ye kopocsiha kpac kecmanu enemango faka mangana anec, imocac ebic tofohobeso.’”