Bangec kisiu 36 - Deduamiti

Naroang yeni mangnginaac bangec megecde

¹ Manasse esea Gilecad, Makir medaha, Yosef medachora yereac kisicfunac, yeneac medacfocngina nadunga nadunga keceregec amma yeneac enarafocngina yeni Mose nga isracelngic enarafocngina yeneac enarameme yenearu kenggec.

² Kemma yofi degec, “Kebungo ge kunennina dederecge anggenu geng Isracelngicngac bangecnina sinnina modacma kpeing kpema nemmenadeac edeguec. Nga kunennina, Kebungo dacnina Tselafehad yeac bangec hendzi hendzira imoc naroangfora yemmenadeac dederecge anggenec.

³ Nga yeni Isracelac kisic goa yenearunac ngic meyunugecdeu ine bangecyombongngina imoc bangecfocnina yeneac bangec hendzic hendzira fenemmede imohacnac mema kisic damoc yenigoc kecgecde yeneac bangec hendzic henedzira ihai torokpegecde. Ifi amma neneac arennunac wiac goa wangecnunubauac.

⁴ Ifi fingerudeu Isracelngicngac neneac sogac sogaiac kifanasotoa hau bangecngina imoc fingecsahe damoc yenigoc kecgecde yeneac bangec hendzic hendzirau torokpema kisicfocnina yeneac bangec imoc meickegecde.”

⁵ Ifi degec Mose ye Kebuac enac tofohoma Isracelngicngac yeneac dederecge yofi ayemmeec, “Yosef medachora yereac kisicfunac yeneng yoac dedae imoc yoac dindingac ande.

⁶ Nga Kebungo yoac dederecge angemmede Tselafehad naroangfora yeni yoac yomoc modacbisia. Yeni ngic mong me mong meyunubeso ayemmeu naric meyunubisia nga yeni ine kisicfocnginaac fingecsahe fede imoc yeneac arennunac ngic meyunubisia.

⁷ Imoc yofiac, Isracelngicngac ngeneac bangec hendzic hendzira imoc kisic monggarunac kisic monnu mi kembeso, kpac. Isracelngicngac tembuc tembuc sasawango kisicfocngina yeneac bangec hendzic hendzira seria mekecbisia.

⁸ Nga naroang sasawa Isracel kisicfunac bangec yombongnginagoc kecdae yeni mangfocngina yeneac kisicfunac ngic meyunubisia. Ifi anggec Isracelngicngac ngeni tembuc tembuc sasawango esangabofocngina yeneac bangec hendzic hendzira mekecma mingina angkecbisia.

⁹ Imoc yofiac, bangecngina hendzic hendzira imoc kisic monggarunac kisic monnu mi kembeso. Isracelngicngac sasawa ngeneac kisicfocngina ngeni tembuc tembuc sasawango ngenang bangec hendzic hendzira seria mekecbisia.”

Tselafehad naroangfora

¹⁰ Anu Tselafehad naroangfora Mahela, Tirtsa, Hagela, Mileka nga Noca yeni Kebungo Mose dederecge ammiec, ifi yombong andacgec.

¹¹ Yeni waecfocngina yeneac medacfocngina meyunudacgec.

¹² Yeni Yosef medaha Manasse yeac kisicfunac ngic meyunugec bangecyombongngina imoc mangnginaac kisicac manaungoc fekefec.

¹³ Kebungo Mocawac bangec tumiau Yardendoku tegia yeibigeng Yereho wegenahau singyoac nga singseria Mose edeu Isracelngicngac yeni imoc modacgecdeac edeyunuec.