Bangec kisiu 35 - Deduamiti

Lewingic yeneac taong nga kpindzingbangec

¹ Kebungo Mocawac bangec tumiau Yardendoku tegia yeibigeng Yereho wegenahau, imohai Mose yoac yofi edeec,

² “Ge isracelngic yofi anggecdeac edeyununa. Yeni bangec mema mingina anggec imohacnac Lewiac kisicarengfora taong goa yemmegec imocngo yeneac amagerec ambeso. Amma ngeni ramaburumaka yeneac kpindzingbangec taongngina wegenahau yerecgema fede imoc ifingoc yemmebisia.

³ Yemmegec yeni yenang taong manau tacyac anggec kpindzingbangec imoc donggiburumaka kereta taikecdae nga ramaburumakafocngina amma noc amayang sasawa feyemmede, yeni imohai kecbisia.

⁴ Kpindzingbangec imoc taonggac odatoa ngadeau yerecgema fekende imocngo kubit 1,000 imocacsoc Lewingic yemmebisia.

⁵ Nga taong ngadeau wenac ere ereaubigenggac kpete megec kubit 2,000 ambeso amma saotbigenggac kubit kpete 2,000 nga wenac keme kemeaubigenggac kubit kpete 2,000 amma notbigenggac kubit kpete 2,000 ambeso. Amma taongngina wegenahau kpindzingbangec imocngo yeneac ambeso.

⁶ Ngeni Lewingic yeni taon siks yemmegecde, imoc ngickpekpengic yeni taong imohai kemma sufugecdeac taong anude. Amma torokpema Lewingic taong 42 yemmebisia.

⁷ Ifi anu Lewingic taong nga kpindzingbangec yerecgede imoc yemmegecde, imocac kpetea kpeturanggeu 48 ambeso.

⁸ Anu Isracelngicngac yeni taong mema mingina anggec imohacnac kisic ngicngacarengngina habu kuneng yeni taong homac yemmebisia nga kisic ngicngacarengngina habu kapia yeni taong kpete kapia yemmebisia. Yeni tembuc tembuc sasawango bangecngina megec imocacsoc taong ifi mema Lewingic yemmebisia.”

Sufu sufu taong

⁹ Anu Kebungo Mose yoac yofi edeec,

¹⁰ “Ge Isracelngicngac yofi edeyunubesena, ‘Ngeni Yardendoku ferecgema Kenacanbangecfu kensikema taong goa yofi meisingyunubisia.

¹¹ Ngic mongngo segema ngicogea mong kpehomeudeu ngickpekpengic ifia yeneac ebicfunac sufu sufuac taong goa desiyunubisia. Imoc ngic yeni segema ngic kpehomegec yeneng ihai kemma sufubisia.

¹² Sacac turung kpouyemmebauac taong imocngo sufu sufuamangina ambeso. Anu ngic ye segema ngic kpema ngickpekpengic anec yeng kemma taong imohai kecma nasoya fingeru ngichabuac kicnginau kemma nanu yoara desigecde.

¹³ Ngeni Lewiac kisicareng taong dafiguc yemmegecde imoc yenearunac siksngo sufu sufuama ambisia.

¹⁴ Ngeni Yardendoku edinoboc taong harebec meisingyunuma Kenacanbangecfu taong harebecngoc meisingyunuma sufu sufuamangina anggecdeac desiyemmebisia.

¹⁵ Taong siks imocnoc Isracelngicngac nga ngicngac naso wegenanec bangecnginau kecdaemoc nga kuricngic botucnginau kecdae yeneac sufu sufuama ambeso. Nga imohai ngic mongngo segema ngicogea mong kpehomeec ngic imoc mocgu mocgu sasawa yeni ihai kemma sufuma kecbisia.

Ngickpekpengic yombong

¹⁶ Anu wiac mong aiengngo memea imocngo ngicogea kpeu homeudeu ngic imoc ye ngickpekpengic. Imocac ye homecfu faibeso.

¹⁷ Nga ngic mong ye hoc mong mariau mema hoc imocngo yenerehomeudeacsoc andeu nga ngic ye hoc ifiango ngicogea mong heiu homeudeu ngic imoc ye ngickpekpengic. Imocac ye homecfu faibeso.

¹⁸ Me wiac mong icngo memeango yunuhomeudeacsoc ande imoc mariau mema ngicogea wiac ifiango kpeu homeudeu ngic ye ngickpekpengic. Imocac ye homecfu faibeso.

¹⁹ Nga sacac turung kpoukpoungic yeng ngickpekpengic imoc meficgeudeu imohaingoc homecfu faibeso.

²⁰ Me ngic mong ye ngicogea ubango ukuma kecdeac amma kpefaheude me sufuma yeac tomai kecma wiac mong ukuma heihomeude

²¹ me yeac ngaba angkecma herea bu mariango heiu homeudeu yeac yofi negembesonga ngicogea maringo heiec imoc ye ngickpekpengic. Imocac ye homecfu faibeso. Sacac turung kpoukpoungicngo ngickpekpengic imoc meficgeude imohaingoc homecfu faibeso.

Ngabaya kpac yeac yoac

²² Anu ngic mongngo ogea ngaba mi ammima mariango heude me herebu mi negemma wiac mong eng segema ukuu kemma ngicogea heiude,

²³ me hoc mong ngic yenerehomeudeacsoc mema imocngo segema ngicogea mi hemma eng heu homeude ye ngabaya kpac kefu ifi fingerude me kpeudeac segema eng anu ebic fingerec isoc

²⁴ ngichabu yeneng ngickpekpengic nga sacac turung kpoukpoungic yereac botucngirau yoac imoc singseria fede imocac siricfu desiyecmebisia.

²⁵ Desiyecmema ngichabu yeneng ngic segema ngickpekpengic anec, ye onggonggema turung kpoukpoungic yeac mariaunac mesima sufu sufuamau warac worama kenec imohai monggoc faigec takecbeso. Takecmanu womonggarengtoa kpetiac kerecdokungo nadzic nadzicmia yeac homecnasou wisickebeso.

²⁶ Anu ngic segema ngickpekpengic anec yeng sufu sufuamau sufuec imoc wama ngadeau kemema kecmanu

²⁷ sacac turung kpoukpoungicngo hama ngic imoc kpebucgeudeu turung kpoukpoungic ye kopocsiha kpac anude.

²⁸ Imoc yofiac, ngic segema ngickpekpengic anec ye sufu sufuameau kecmanu womonggarengtoa homeuguc imohaisac amabangehau dzigenebeso.

Ngickpekpengicac singseria

²⁹ Nga ngeni noboc noboc kecgecdesoc yoac desi desi ua feude imohai singseria imocngo fingecsahengina feengkefudesoc ngenearu fekecbeso.

³⁰ Nga mongngo ogea mong kpehomeudeu ngic yohockang namma ende yeneng ngickpekpengic yeac haniayaac ebicyoac degecdeu ye homecfu faibesonga. Nga ngic mocgungosac ebicyoac deudeu homecfu faigecdeac mi desibisia.

³¹ Anu ngickpekpengic homecfu faigecdeac desigecdeu ye kefudeac kekehaac bung dzongo mi mebisia. Ye homecfu faibeso.

³² Nga ngickpekpengic yeng sufu sufuamau worama kemma kecmanu womonggarengtoa mi homemanu ngeni ngickpekpengicngo bangehau dzigenema kembeso deu negemmima buma mi mebisia.

³³ Ngeni bangec kecdae imoc kpetiac. Anu imoc Kebuac kicfu kpetiac monggoc mi anude, ngeni imoc anggec mi ngereeude. Imoc yofiac, sac kpakegec bangecngina kpetiac monggoc mi anude. Sacngonoc bangec kpetiac mi anudeac ammiec nga sac kpake kpakeac ebic imoc meickegecdeac sing mong mi fede. Ngic merang sac kpakeecmoc, yeac sacngosac ebic imoc meickeude.

³⁴ Kebu ni Isracelngicngac ngeneac botucnginau kecduaeac amma ngeni bangec kecdae nga ni botucnginau kecduae imoc mi heidzadzukpebisia.’ ”