Bangec kisiu 34 - Deduamiti

Isracel yeneac bangecac maya

¹ Kebungo Mose yoac yofi edeec,

² “Ge Isracelngicngac yoac yofi dederecge ayemmema edeyunubesena, ‘Ngeni Kenacanbangecfu kenggecde imohai bangecac ma fede imoc negembisia. Bangec imocnoc ngeneng imocac mingina amma kecgecdeac dedea. Kenacanbangecac maya yofi fekende.

Sautbigeng

³ Bangec imoc saotbigeng Tsin bangeckisiu imohacnac hanahema Edombangec tegiau mema kembeso. Nga saotbigenggac mangina imoc Kondungdzohongtoa wenac ere ereau imohai hanahema mekenude.

⁴ Mekengkecma meremma Akrabbim fagannu saotbigeng imohai meremma kemma Tsinbangec ferecgema kengkecma Kades Barneau saotbigeng imohai kemma Hatsar-Addar ferecgema Atsemon meficgeude.

⁵ Amma bangecac ma Atsemon imohacnac meremma Aigita dokubisic nobocnac noboc kengkecma kondungtoau wisickeude.

Wenac keme kemeaubigeng nga notbigeng

⁶ Nga wenac keme kemeaubigenggac mangina imoc Kondung kuneng imocngo ngeneac ma ambeso.

⁷ Nga nortbigenggac bangec ma imoc Kondung kuneng imohacnac hanahema ma taigec kengkecma Hor tikiu sikebeso.

⁸ Sikeu Hor tikiunac torokpema mangina taigec Hamatsinnu sikebeso. Ma imocngo Tsedad modacma kembeso.

⁹ Imocac witiau imoc kengkecma Tsifron sikema kengkecma Hatsar-Enan imohai wisickeude. Imocngo ngeneac nortbigenggac bangecac mangina ambeso.

Wenac ere ereaubigeng

¹⁰ Nga wenac ere ereaubigeng bangecnginaac ma imoc Hatsar-Enan imohacnac hanahema ma taigec kengkecma Sefam sikebeso.

¹¹ Sikeu Sefam imohacnac mekengkecma Ayinu wenac ere ereau Riwla imohai sikebeso. Sikeu imohacnac kemema kengkecma Kinneret dzohonggac tegiau wenac ere ereaubigeng modacbeso.

¹² Nga imohacnac Yardendokuu mekengkecma kondunnu wisickede. Ngeneac bangecnginaac kpetea ifinoc yerecgema fekembeso.’ ”

Ngic yomoc yeneng bangec hendzicgec

¹³ Anu Mose ye Isracelngicngac yofi anggecdeac dederecge ayemmeec, “Bangec imocnoc Kebungo kisicfocnginaunac habu nain amma noboha mong yeni yemmegecdeac dederecge angemmeecac ngeni fakangina modacma kpeing kpegec heficgeudesoc bangecngina mema mingina ambisia.

¹⁴ Anu Recuwen amma Gad kisicfunac nga Manasseac kisicfunac habu noboha yeni amaarengnginasoc modacma bangecngina bic megec.

¹⁵ Kisic yohockang imoc amma kisic noboha imoc yeni Yardendoku tegia yeibigeng Yereho wegenahau, wenac ere ereubigeng, imohai bangecngina bic megec.”

¹⁶ Anu Kebungo Mose yoac yofi edeec,

¹⁷ “Ngeni bangec mingina kecgecdeac hendzicma ngemmegecde ngic imoc yereac kpacngira yofi, womonggareng Elecadzar nga Nun medaha Yehosuac.

¹⁸ Amma ngeni kisicngina fekendesoc imohacnac ngicenara mocgu mocgu meisingyunugec yeneng bangec hendzicma bangecngina yemmebisia.

¹⁹ Nga ngic imoc yeneac kpacngina yofi, Yehudaac kisicfunac Yefunneac medaha Kalew.

²⁰ Simeconggac kisicfunac Ammihud medaha Semucel.

²¹ Benyaminggac kisicfunac Kiselon medaha Elidad.

²² Dan kisicfunac ngicenara Yageli medaha Bukki.

²³ Yosef medachora yereac kisicfunac Manasse medacfora yenearunac ngicenara Efod medaha Hannicel.

²⁴ Efrayimgac kisicfunac ngicenara mong meisinggegec imoc Sifetan medaha Kemucel.

²⁵ Dzewulun kisicfunac ngicenara mong meisinggegec imoc Parenak medaha Elitsafan.

²⁶ Yissaskar kisicfunac ngicenara mong imoc Adzan medaha Paleticel.

²⁷ Aser kisicfunac ngicenara mong Selomi medaha Ahihud.

²⁸ Amma Naftaliac kisicfunac ngicenara mong meisinggegec imoc Ammihud medaha Pedahecel.”

²⁹ Kebungo dederecge ayemmeu ngic imoc yenennoc Kenacanbangecfu Isracelngicngac yeneng bangecngina mema imocac mingina anggecdeac bangec imoc hendzicma yemmegec.