Bangec kisiu 32 - Deduamiti

Recuwen nga Gad kpesi kpesingina

¹ Recuwen nga Gad yereac esangabofocngira yeni Yacedzer nga Gilecadbangec, bangec yohockang imoc henggec ramaburumaka imohai naric kekecacsoc anec. Nga yeneac burumakahabu kuneng nga homac kecgec.

² Anu ifi hemma Mose nga womonggareng Elecadzar amma ngichabuac enarafocngina yenearu hama yofi degec,

³ “Atarot, Diwon, Yacedzer, Nimra, Hesbon, Elecale, Sewam nga Newo amma Wecon

⁴ bangec imoc Kebungo Isracelkpebung nenang kicfu meec, bangec imocnoc ramaburumaka yeneng kekecac siric yombong ande anu enactofoc tofohofocga neni ramaburumakafocninagoc.”

⁵ Yeni ifi dema torokpema yofi degec, “Ge neneac negenna naric andeu bangec dedimbe imoc enactofoc tofohofocga neni nemmena mema Yardendoku edibigengau mi kennide.”

⁶ Ifi degec Mosengo yofi edeyunuec, “Sactosofocngina yeni dzikacfu kemmagec ngeni ine yei kecgecde me?

⁷ Ngeni nocac Isracelngicngac ubangina kuha memagecdeac ayemmedae? Ngeni ifi andaeac yeni Kebungo bangec yemmeec imohai ferecgegecdeac mi ayemmeude.

⁸ Nga ni warac mangfocngina Kades Barnea bangecfu kecma bangec henggecdeac sueyunuba yeni faka imocngoc angec.

⁹ Yeni Eskol tumiatoa keme kemea bangec imohai kemma imoc hemma ngicngac ubangina kuha maudeac ayemmegec Kebungo bangec yemmeecmoc imohai Isracelngicngac yeni mi kenggecdeac ayemmeec.

¹⁰ Anu Kebungo wenac imohai herea buyombonggeu yoac yofi deseriec,

¹¹ ‘Aigitabangecfunac magecmoc yeni kifangina twentiunac namma ende, ngic imoc yenearunac mongngo mong Awraham, Itsak nga Yacakow bangec yemmebadeac deseriai ihai mong mi kengyombonggegecde. Ni yoac dederecge ayemmeba yeni imoc sasawa hoanggegec amma ni mi modacnugec.

¹² Nga kenidzingic Yefunne yeac medaha Kalew nga Nun medaha Yehosuac yerengsac Kebu ni modacnuocac kenecde.’

¹³ Anu Kebungo Isracel yeneac herea buyombonggeu yeni ayemmeu bangeckisiu kengha amma kecmagec kifa foti anu ngicngacareng hafoangoc yeni Kebuac kicfu faka mangana meficgegec imoc yeni homedacgec.

¹⁴ Nga negendae, ngeni fingecsahe amma yacma ngic kopocsicnginagoc mangfocngina yeneac tatacngina mema Kebu ubagerec meficgemigec Isracel yeneac herea buyombonggeu gerec isoc dzema monggoc torokpema fingerudeac andae.

¹⁵ Ngeni ye ngadehema mi modacgecdeu ine yeng ngicngacareng hafoangoc yomoc wayunuu yeni bangec kisiungoc torokpema kecma homedacgecde imoc ngeneac kopocsic anude.”

Neni Isracelngicngac waraiyemmema kennide

¹⁶ Ifi edeyunuu yeni Moseac hoannu kemma yofi edegec, “Ge neneac negenna ngereeudeu neni yomohai ramaburumakafocnina yeneac oda mema enemmedacfocnina yeneac taongngina menide.

¹⁷ Nga neni nenang ine dzikacac wiac mema efaima Isracelngicngac waraiyemmema kecmina bangec mema minginasoc andacgecde naso imohai faiyununide. Nga enemmedacfocnina yeni taonnina odaseria manau kecmagec bangec mingina yeneng naric mi memanganeyunugecde.

¹⁸ Nga neni amabangecninau mi dzigenema kecmina Isracelngicngac yeni mocgu mocgu sasawango bangecngina mebisia.

¹⁹ Nga neneac bangec imoc Yardendoku yeigeng wenac ere ereaubigeng fedeac neni yenigoc bangec Yardendoku edinoboc imohai mong mi menide.”

Kemma taong nga oda mebisia

²⁰ Yeni Mose ifi edegec yeng yofi edeyunuec, “Ngeni faka ifi angyombonggema dzikacac wiacngina mema Kebuac kicfu dzikacac negemma efaigecdeu

²¹ amma dzikacac ngicfocngina sasawa yeni Yardendoku Kebuac kicfu ferecgema kengkecbisia. Ifi kecmagec ngabafocngina kicnginaunac meicyunudacma

²² bangecngina wangecyunuma Kebuac bageau faidacmaguc monggoc dzigenegecde. Ifi anggecdeu ngeni Kebuac kicfu nga Isracel yeneac kicfu turungngina kpac kecgecde. Nga Kebuac kicfu bangec yomoc mema mingina anggec ngeneac ambeso.

²³ Nga ifi mi anggecdeu ine Kebuac kicfu kopocsic meficgegec imocac turunga fingecngemmeude.

²⁴ Imocac yaguc kemma enemmedacfocngina yeneac taongngina nga ramaburumakafocngina yeneac oda imoc momoc mema enacnginaunac yoac eredacdac imoc modacdacbisia.”

²⁵ Ifi deu Gad nga Recuwen yereac kisicfunac yeneng Mose yofi edegec, “Enactofoc tofohofocga neni kunennina ge yoac edenununec ifi isoc annide.

²⁶ Enengmedacfocnina nga ramaburumakafocnina sasawa yeni Gilecad taong tackende ihai kecgecde.

²⁷ Nga enactofoc tofohofocga ngic sasawa neni ine dzikacac wiacnina mema efaima Kebuac kicfu ferecgema dzikacfu kennide. Kunennina geng yoac denec ifi isoc annide.”

Bangec hendzicma yemmeec

²⁸ Ifi degec Mosengo yeneac negemma womonggareng Elecadzar nga Nun medaha Yehosuac amma Isracelngicngac yeneac kisicfocngina sasawaac enaramemengic yeni yoac dederecge ayemmema yofi edeyunuec.

²⁹ “Gad nga Recuwen yereac kisicfunac sasawa imoc yeni Kebuac kicfu dzikacac wiacnginagoc efaidaumoc yeni ngenigoc Yardendoku ferecgebisia. Ferecgema firang amma bangec megec ngeneac anudeu ngeni Gilecadbangec yemmegec imocac mingina ambisia.

³⁰ Anu yeni ine imoc wama dzikacac wiacnginagoc kecdaemoc ngenigoc ferecgema dzikacfu mi kenggecdeu ine Kenacanbangecfu ngeneac botucnginau bangec mema mingina amma kecbisia.”

³¹ Ifi deu Gad nga Recuwen yereac kisicfunac yeneng yofi meremmigec, “Kebungo enactofoc tofohofocga neneac yoac dede imocnoc annide.

³² Neni dzikacac wiacninagoc Kebuac kicfu ferecgema Kenacanbangecfu kennide nga neneac bangec mekecnide imoc Yardendoku yeibigengau feude.”

Gadngic yeneac taontoa

³³ Anu Mose ye Amoringictau Sicon nga basangngictau Og yereac bangec imocac manau taong fekenec nga bangec noboha taontoanginagoc bangec yerecgedacma fede, imoc Gad nga Recuwen yereac kisicfunac amma Yosef medaha Manasseac kisicfunac ngicngacareng noboha yeni yemmedarec.

³⁴ Yemmeu Gad kisicfunac yeni ama yofi megec, Diwon, Atarot, Arocer,

³⁵ Atrot Sofan, Yacdzer, Yogewoha,

³⁶ nga Bet-Nimra amma Bet-Haran. Nga taontoa imoc odaseringinagoc amma ramafocngina yeneac oda megec.

Recuwengngic yeneac taontoa

³⁷ Nga Recuwen kisicfunac yeni ine ama yofi megec, Hesbon, Elecalec, Kiryataiyim,

³⁸ Newo, Bacal Mecon (ama imoc yeneac kpacngina mong kpacgec) amma Siwema. Taong sasawa mekenggec imoc yeneac kpacngina ifinoc kpacdacgec.

Makir ngicngac yeni bangec megec

³⁹ Nga Manasse medaha Makir yeac kisicfunac yeni emoringicngac Gilecadbangecfu kecgec yeni yunukporac ayemmema bangecngina mema mingina anggec.

⁴⁰ Amma Mose ye Gilecad imoc Manasse medaha Makir yeac kisicfunac yemmeu yeni imohai kecgec.

⁴¹ Anu Manasse medaha mong kpara Yacir yeac kisicfunac yeni ine Amoringic yeneac ama goa mema mingina amma kpacngina Hawot Yacir kpacgec.

⁴² Amma Nowac arengforagoc yeni kemma Kenat taontoa nga yeneac ama fekenggec imoc mema mingina amma kpara Nowacngoc kpacgec.