Bangec kisiu 31 - Deduamiti

Isracelngic dzikacac efaigec

¹ Anu Kebungo Mose yoac yofi edeec,

² “Ge Isracelngicngac yeneac amma midyanngic turungngina kpouyemmebesena. Imoc wisickeu homema mangfocga yenearu torokpeyununade.”

³ Anu Mose ye isracelngic yofi edeyunuec, “Ngeni ngicfocngina dzikacac wiac yemmegec yeni dzikac fingerudeac efaima kecbisia. Ngic imoc yeni kemma Midyan yenigoc ewema Kebuac turunga kpouyemmebisia.

⁴ Ngeni isracelngic kisicnginasoc ngic 1,000 meisingyunuma sueyunugec dzikacfu kembisia.”

⁵ Deu yeni ifi amma Isracel ngicareng kisicnginasoc imohacnac 1,000 nga 1,000 meisingyunugec dzikacac wiacnginagoc nandacgec, ngic imoc yeni 12,000 anggec.

⁶ Anggec Mose ye ngic imoc yeninoc kisic mocgu mocgu sasawaac ngic tausen dzikacfu sueyunuu kenggec. Anu womonggareng Elecadzar medaha Pinehas yeng kpetiac amaac wiac kpetiac nga udumengngo garengyunuudeac trampet meu momoc kenggec.

Midyan yenigoc dzikac

⁷ Kemma Kebungo Mose dederecge ammiec yeni yoac imoc modacma Midyan yenigoc dzikac hanahema ngic sasawa kpebucyunudacgec.

⁸ Amma yeni imohai ifingoc Ewi, Rekem, Tsur nga Hur amma Rewac, Midyan ngictau faef imoc momoc kpebucyunugec. Amma Becor medaha Bilecam wasaibeangngo ifingoc kpebucgegec.

⁹ Kpebucyunuma Isracelngicngac yeni midyangngac nga nambaracfocngina wangecyunuma meyunuma kenggec. Amma yeni donggiburumakafocngina nga ramanoningfocngina amma finacgedangngina sasawa ifingoc wangecyunuma mekenggec.

¹⁰ Mema taongtoatoangina sasawa nga kporucamangina guruya guruya sasawa tackenec ihai kecgec imoc faigec dzedarec.

¹¹ Yeni dzikacfaka ifi modacma finacgedangngina wangecyunuma ngacnambarac amma ramaburumaka imoc sasawa meyunudacgec.

¹² Amma yeni witicngacnambarac nga firang anggecac dzikacfaka modacma wiac megec imoc Mose nga womonggareng Elecadzar amma Isracelngicngac yeneac kpebung yenearu kporucamabangecnginau Mocawac bangec tumiau Yardendoku tegia yeibigeng Yereho wegenahau, ihai meyunu kenggec.

Ngac nocac onggongyunudau?

¹³ Anu Mose nga womonggareng Elecadzar amma ngichabuac ngicenarafocngina sasawa yeni kporucamabangec ngadeau meficyunugecdeac kemema kenggec.

¹⁴ Kemma Mose ye dzikachabutoaac gareng enarafocngina imoc tausen yeneac enarafocngina nga handred yeneac enarafocngina dzikacfunac hagecmoc yeneac herebu negemma ngaba ayemmeec.

¹⁵ Ayemmema yofi deec, “Ngeni ngac sasawa onggongyunudau imocac hania dafi?

¹⁶ Negendae, ngac yenennoc Bilecamgac yoac modacma Isracelngicngac tobangyunugec Pecor anutu yearu kpeketahama Kebu wama ngadehegec Kebuac kpebung yenearu hafei homectoayagoc fingerec.

¹⁷ Imocac ngeni medacfocngina nga ngac ngic yenigoc bic fegec imoc sasawa kpebucyunubisia.

¹⁸ Nga ngacnaroang sasawa yeni ngicngo mi kpesereyunugec amma ngic yenigoc mi fegec imoc yeni ine ngeneac anggecdeac onggongyunugec kecbisia.

Wenac sewen ngadeau tacyac ambisia

¹⁹ Amma ngeni kporucamabangectoaninaac ngadeau tacyac angkecmagec wenac sewen wisickebeso. Nga ngic tembuc tembuc sasawango ngic kpebucyunugec me dzikacfu homegec farengngina kpeseregec ngeni momoc sasawa wenac kpete harebec nga sewen imohai ngenang nga witicyunuma meyunugec ngeni kongaha anggecdeac faka fede imoc modacbisia.

²⁰ Modacma wamba sasawa yangseberango memea nga wiac sasawa noningdzoeyango memea amma wiac icngo memea sasawa imoc ngeni ngenaoc dzuacgec kongac kpedacbeso.”

Dzikacfunac hagecac singseria

²¹ Anu womonggareng Elecadzar ye ngic dzikacfunac hagec yeni yofi edeyunuec, “Ngeni ngicngac yoacngina desigecdeac singseria imoc modacbisia. Kebungo Mose yoac imoc dederecge ammiec.

²² Ngeni gol, silwa, aieng sacsac, aieng kpara tin, nga aieng mong kpara lead

²³ wiac imoc seria sasawa gerecfu dzeu mi manganeude imoc gerecfu ohogec seuha kpac ambeso. Ifi amma wononga kpac anganggac doku witiau gigigec kongaha ambisia. Amma wiac goa sasawa gerecfu oho ohoacsoc mi angande imoc dokungo dzuacdacbisia.

²⁴ Nga wenac kpete sewen imohai wambagedangngina dzuacma kongaha amma imocac ngadeau kporucamabangecnginau naric enggecde.”

Finac mendzicma megec

²⁵ Anu Kebungo Mose yofi edeec,

²⁶ “Ge nga womonggareng Elecadzar amma ngichabuac ngicenarafocngina ngeni ngac nga ramaburumaka dzikacfunac megec imoc osoyunudacbisia.

²⁷ Osoyunuma mendzicgec habu yohockang anu habu mong imoc wasaingic dzikacfu kenggec yeneac ambeso nga habu mong imoc ngichabu hafoangoc yeneac ambeso.

²⁸ Ammanu wasaingic dzikacfu kenggecmoc wiac yemmeyemmea imohacnac Kebuac takesi dema yofi faibisia, ngic nga burumaka nga donggi nga noning amma rama 500 imohacnac mocgu mocgu medacbisia.

²⁹ Yeneng wiac megec ge imohacnac wiac imoc mema Kebuac sese dema womonggareng Elecadzar mibesena.

³⁰ Mima Isracelngicngac dzikacfu mi kenggec yenearunac wiac mendzicma yemmeyemmea yahacnac ine yofi mebesena, fifti imohacnac mocgu, ngic nga burumaka nga donggi nga noning amma rama, imoc ramaburumaka sasawa yenearunac mocgu mocgu mema Lewingic Kebuac womonggac uaareng garenggedaemoc yeni yemmebisia.”

³¹ Anu Mose nga womonggareng Elecadzar yeri Kebungo dafi anggecdeac Mose dederecge ammiec, ifi isoc yombong andaroc.

Wasaingic Kebuac takesi faigec

³² Anu wasaingichabu yeni dzikacfu firang amma wiac megec imocac kpetea yofi fingerec: Rama imoc 675,000,

³³ burumaka imoc 72,000,

³⁴ donggi imoc 61,000.

³⁵ Amma ngac ngic yenigoc mong mi fegecmoc yeneac kpetengina imoc 32,000 anec.

³⁶ Anu mendzicgec tosea yofiguc imoc wasaingichabu dzikacfu kenggec yeneac onga anec: Rama 337 500 imohacnac

³⁷ Kebuac takesi 675 anec.

³⁸ Amma burumaka 36,000 imohacnac Kebuac takesi imoc 72 anec.

³⁹ Nga donggi 30,500 yemmeyemmea imohacnac Kebuac takesi 61 anec.

⁴⁰ Amma ngacnaroang 16,000 imohacnac Kebuac takesi ngacnaroang 32 anec.

⁴¹ Nga Mose ye Kebungo dederecge ammiec ifi isoc yombong amma takesiac wiac Kebuac sese dedea imoc sasawa womonggareng Elecadzar midarec.

⁴² Finac mendzicma mehagec imoc Mosengo mendziru wasaingic yeneac habu mong anec nga Isracelngicngac yeneac mong anec.

⁴³ Isracel ngichabu yeneac wiac yofi fingerec: Rama 337,500,

⁴⁴ burumaka 36,000,

⁴⁵ nga donggi 30,500,

⁴⁶ amma ngacnaroang 16,000.

Isracel ngichabu wiac Lewiac kisicareng yemmegec

⁴⁷ Nga Mose ye Isracelngicngac yeneac noboha mendzic mendzicra imohacnac ngac nga yang fifti kecdacgec, imohacnac mocgu mocgu meyunuma Lewingic Kebuac kporucwomonggac uaac meyunukecgec yeni yemmeec. Kebungo Mose dederecge ammiec ifi isoc yombong amma yemmeec.

Wasaingic mong mi hofocyunugec

⁴⁸ Anu wasaienarafocngina wasaihabu tausen garengyunugec nga handred garengyunugec yeni Moseac hoannu hama

⁴⁹ yofi edegec, “Enactofoc tofohofocga neni wasaingic, neneac bageu imoc yeni osoyununi kecdacdae mong mi hofocyunudimbe.

⁵⁰ Imocac amma neni tembuc tembuc sasawango dzikacfunac wiac golngo memea medaring imoc Kebuacsese anudeac midimbe. Wiac hania hania golngo memea heiandae imoc yofi, mariac sibuc, wiac mariu heihei kibiagoc, ring onganginagoc nga kedzacac ring amma ubaac kubu gombunga. Wiac imoc sasawa Kebuackicfu mehani imocngo neni nenang ngaba meic meicke ua mebeso.”

⁵¹ Ifi degec Mose nga womonggareng Elecadzar yeri yeneac mariunac wiac gombunga gombunga hania hania golngo memea sasawa imoc meoc.

⁵² Nga ngic tausen habuya habuya nga ngic handred habuya habuya imoc yeneac ngicenarafocngina yeni Kebu sese memigecdeac gol mehagec, imocac ebiha imoc shekelkpete 16,750 anec.

⁵³ Nga wasaingic yeni tembuc tembuc sasawango dzikacac finac mema mehagec.

⁵⁴ Anu Mose nga womonggareng Elecadzar yeri ngic tausen habuya habuya nga ngic handred habuya habuya enarafocngina yenearunac gol imoc mema Kebugoc ewacemeemeac kporucamau mekenoc imoc Kebungo Isracelngicngac yeneac negensima kefudeac ifi anoc.