Bangec kisiu 30 - Deduamiti

Dedeseriyoacac dederecge

¹ Anu Mose ye Isracelngicngac yeneac kisicfunac ngicenarafocngina yoac yofi edeyunuec, “Kebungo yoac yofi dederecge angemmeec, ngeni imoc modacdacbisia.

² Ngic mong ye Kebuac kicfu yoac mong deserima deude me wiac monggac segekefudeac deseriude me wiac mong meudeac deserima deudeu ye yoac seria imoc mong mi wabeso ye yoac enaraunac maec imoc sasawa modacdacbeso.

Ngac ewemangnginagocac dedeseriyoac

³ Anu ngac mong ye sebigboringoc mamaac amau kecmangoc Kebuac kicfu dedeseriyoac mong deseriude me wiac monggac segekefudeac deseriude me wiac mong meudeac deseriu

⁴ mamango dedeseriyoara deseriecmoc negemma yoac mong mi deudeu ye dedeseriyoara sasawa dedarec imoc seria feude.

⁵ Anu mamango wenac imohaingoc dedeseriyoara sasawa negemma kpetarimiudeu ine dedeseriyoarango me wiac meudeac deseriec dedeseriyoara imoc mi seriude. Ye mamango kpetarimiec imocac amma Kebungo kopocsiha waude.

⁶ Me dedeseriyoarango wiac monggac segekefudeac mi negentegecma enacbibicngosac dedeseriyoac deserima deec, imoc femanungoc ngic meudeu

⁷ eweango dedeseriyoac deec imoc negemma wenac imohaingoc mi kpetarimiudeu ngacac dedeseriyoacngo seribeso.

⁸ Me eweango wenac imohaingoc dedeseriyoara sasawa imoc negemma kpetarimiudeu ine ye mi negentegecma enacbibihangosac dedeseriyoac imoc deu yoac deseriecac yoara imoc mi seriude anu Kebungo ngac imocac kopocsiha waude.

Eweango enemaac dedeseriyoac naric herecgeude

⁹ Anu ngachotsec me ngac ngic mewa angana imoc yeneac dedeseriyoac sasawa deserigecde imocngo ine seriude.

¹⁰ Nga ngac nenggac mongngo eweaac amau kecma yoac mong deserima deude me wiac monggac segekefude me wiac mong meudeac deserimanu

¹¹ eweango negemma imocac yoac mong mi dema kpetarimiudeu ye dedeseriyoara deseriec, imoc sasawa seriude.

¹² Nga eweango wenac imohaingoc dedeseriyoac enacbibihango deseriec imoc negemma herecgeude me kpae heimiudeu ine enaraunac dedeseriyoac sasawa mau deseriecmoc imoc eweango waecac Kebungo ifingoc kopocsiha waude.

¹³ Anu ngic mong ye enemaac dedeseriyoac me wiac monggac segekefudeac meseribeso dema naric meseriude nga kpetarimibeso dema naric kpetarimiude.

¹⁴ Nga ewea ye wenaha wenaha imocac yoac mong mi dema enemaac dedeseriyoac nga segekekecac yoac sasawa dema deseriec imoc meseriude. Ye dedeseriyoac imoc negemma wenac imohaingoc yoac mong mi deecac meseriudenoc.

¹⁵ Nga ye dedeseriyoac negemma yaguc me wereckenu kecma mi kpetarimiudeu ye yoac dedarec nga ua sasawa meudeac dema deseriec imoc meseriude. Imoc yofiac, ye enemaac dedeseri negenec wenac imohai kpekpetariyoac mong mi deec. Ye ifi amma dedeseria meserima enemango faka mangana anecac ebic imoc tofohobeso.”

¹⁶ Eweeneng botucnginau amma manggac nga naroanga sebigbori mong yegoc yeac amau kecandae yeneac botucnginau yoacseria ifinoc modacgecdeac Kebungo Mose dederecge ammiec.