Bangec kisiu 3 - Deduamiti

Mose nga Aharon yereac kpacareng

¹ Kebungo Sinai tikiu Mosegoc yoac deec, naso imohai Mose nga Aharon yereac esamedacfocngiraac kpacarengngina yofi anec,

² Aharon medacfora yeneac kpacngina yofi, morocmedaha yeac kpara Nadaw nga yeac bageau Awihu nga Elecadzar amma Itamar.

³ Nga Aharon medacfora imoc yeneng womonggareng ua mekecgecdeac desiyunuma kerecdoku nadzicyemmegec.

⁴ Anu Nadaw nga Awihu yeri ine Sinai bangeckisiu hosuc kpaeyagoc Kebuac kicfu ohoma imohai homeoc. Nga yeri medacfocngira kpac. Imocac mangngina Aharon yeng Elecadzar nga Itamar henggareng ayecmemanu yereng womonggareng amma ua imoc mema kefoc.

Lewingic yeneac uaareng

⁵ Anu Kebungo Mose yoac yofi edeec,

⁶ “Lewiac kisicfunac yeneng womonggareng Aharonggac kicfu namma yeac marimefic ua mema kecgecdeac hesicyununa yei habisia.

⁷ Yeneng kporucwomonnu marimefic ua mekecma ye nga ngichabu hafoangoc yeneac ua Kebugoc ewacemeemeac kporucamaac hoangau nga kporucwomonnu mekecbisia.

⁸ Yeni kporucwomonnu ua mema Kebugoc ewacemeemeac kporucamaac wiac sasawa henggareng ambisia. Nga Isracelngicngac ua deyec deyemmea fede, imoc modacyombonggema medacbisia.

⁹ Geng Lewiac kisicarengfora Aharon nga medacfora yemmebesena anu yeni yeneac amma kecbisia. Imoc yofiac, Isracelngicngac yeneng sese dema imoc Aharon migecde.

¹⁰ Anu ge Aharon nga medacfora yeni womonggareng ua megecdeac faiyunubesena nga ngic mongngo ua imoc meudeac mewegenema haudeu ye homecfu faibesonga.”

Lewiac kisicfunac warac warac fingec fingera

¹¹ Anu Kebungo Mose yoac yofi edeec,

¹² “Negennec, ni Isracelngicngac yeneac botucfunac nenggac herenginaunac warac warac fingecgec sasawa, morocmedacfocnginanoc, yeneac turunga kpougecdeac Lewiac kisicarengfora segereyunuma meisingyunuai. Yeni neac areng yombong.

¹³ Imoc yofiac, warac warac fingecgec yeni sasawango neac. Ni Aigitabangecfu ngic nga yang warac warac fingecgec, imoc yunuhomeai, naso imohai Isracelngicngac botucnginau ngic nga ramaburumakafocngina, imoc yeneac warac warac fingecdacgec, yeni momoc sasawa neac kpetiacareng anggecdeac segereyunuma desiyunuai. Ninoc Kebu.”

Lewi medacfora

¹⁴ Anu Kebungo Sinai bangeckisiu Mose yoac yofi edeec,

¹⁵ “Ge Lewi medacfora yeni amaarengnginasoc nga fingecsahenginasoc arengyunuma sabac ngic afongina mocgunac namma ende kpetengina medacbesena.”

¹⁶ Ifi deu Mose ye Kebuacyoac modacma Lewiareng arengyunuma kpetengina meec.

¹⁷ Lewi medacfora yeneac kpacngina yofi, Gereson, Kehat nga Merari.

¹⁸ Gereson medachora yeri fingecsahengirasoc kpacngira yofi, Liwni nga Simeci.

¹⁹ Kehatac medacfora yeni kpacngina fingecsahenginasoc yofi, Ameram, Itsahar nga Heweron amma Udzicel.

²⁰ Nga Merari medachora yeri fingecsahengirasoc kpacngira yofi, Maheli nga Musi. Imoc Lewi kisicfunac yeneac fingecsahengina nga amaarengnginasoc anec.

Gereson

²¹ Anu Gereson yearunac Liwniac fingecsahe nga Simeciac fingecsahe, imoc yeni fingecgec.

²² Anu ngic sasawa afongina mocgunac namma ende arengyunuma yeneac kpetengina megec imoc 7 500 anec.

²³ Nga Geresonggac fingecsaheunac, imoc yeni kporucwomong ngadeaubigeng, imoc wenac keme kemeaubigeng, imohai kporucamangina kpedzima guru mema tackenggec.

²⁴ Nga geresonngic yeneac fingecsahenginaac enarangina imoc Lacel medaha Elyasafngo kefec.

²⁵ Nga Gereson arengfora yeni wiac yofi garenggegecdeac deyec deyemmea, yeni Kebugoc ewacemeemeac kporucamaac manau kporucwomong tarec, imocac kporuc sasawa amma kporucamaac kporuc sasawa nga kperaha nga Kebugoc ewacemeemeac kporucamaac naguac kporuc garenggegec.

²⁶ Yeni ifingoc sobenggac kporuc hongngoc nanggec amma sobeng kporucwomong nga arata yerecgeec, imocac naguyaac kporuc nga kporucamaac witic sasawa nga womonggac wiac sasawa ifia, yeni wiac imoc garenggema kecgecdeac degec.

Kehat

²⁷ Anu Kehat yeneac fingecsaheunac yeni yofi, Ameramac fingecsahe nga Yitsarac fingecsahe nga Heweronggac fingecsahe amma Udzicelac fingecsahe, areng imoc sasawa yeni Kehatac fingecsaheunac.

²⁸ Nga ngic imoc sasawa afongina mocgunac namma ende, imoc yeni osoyunugec kpetengina 8 600 anec. Ngic imoc yeni sinnu kengkecgec kpetiac amau wiac kpetiac fekecde, imoc garenggema kecgecdeac degec.

²⁹ Nga Kehatac fingecsaheunac yeni kporucwomonggac pandzengau sautfubigeng imohai kporucamangina kpedzigec enu guru mema tackenggec.

³⁰ Nga kehatngic fingecsahearengnginaac yeneac enarangina imoc Udzicel medaha Elitsafango anec.

³¹ Nga yeni ua yomoc megecdeac deyec deyemmea, yeni sinnu kengkecgec imohai katapa, tatac, kifanananga, arata nga kpetiac ama imocac uaac wiara sasawa garenggema kecgec. Amma yeni ifingoc kpetiac amaac naguac kporuc nga imocac ua sasawa mema kecgec.

³² Anu Lewiac kisicfunac sasawa yeneac enaratoangina imoc Elecadzar, womonggareng Aharon yeac medaha. Yeng kpetiac amau ngic womonggareng kecgec nga marimefic uaya mekecgec, yeneac gareng kuneng amma kefec.

Merari

³³ Anu Merari yearunac Mahliac fingecsahe nga Musiac fingecsahe yeri ereoc. Yomoc merariareng yeneac fingecsahe.

³⁴ Nga ngic imoc yenearunac ngic sasawa afongina mocgunac namma ende, yeni arengyunuma kpetengina megec, imoc 6 200 anec.

³⁵ Nga meraringic yeneac fingecsahearenggac enarangina imoc Awihail medaha Tsuricelngo kefec. Yeni kporucwomonggac pandzengau notfubigeng kporucamangina kpedzigec enu imohai guru mema tackenggec.

³⁶ Nga areng imoc yeni uaarengngina yomoc megecdeac deyec deyemmea, yeni kporucwomonggac fombong nga icsira odac odac, icsira herea hafoangoc nga haningina nga imocac wiac sasawa imoc garengyunugecdeac degec.

³⁷ Amma yeni icsira herea haninginagoc sobeng yerecgema nangkendae nga kpingngina nga witicngina sasawa momoc garenggegecdeac degec.

³⁸ Anu Kebugoc ewacemeemeac kporucamaac hoangau wenac ere ereaubigeng, kporucwomong hoangaubigeng yombong imohai Mose nga Aharon amma Aharon medacfora yeni kporucamangina kpedzigec enu guru mema takecgec. Amma yeni ihai tacma Isracelngicngac yeneac enac mema kpetiac amau ua mema kecgec, yeni nga uangina garengyunukecgec. Anu ngictehecngo wiac kpetiacac wegenahau haude isoc singngina yofi feec, ye homecfu faibeso.

³⁹ Kebungo Mose nga Aharon yoac dederecge ayecmeec yeri yoac imoc modacma Lewingic fingecsahenginasoc modacma ngic sasawa afongina mocgunac namma ende, imoc yeni arengyunuma kpetengina megec, imoc 22,000 anec.

Warac fingec fingec yeneac yoac

⁴⁰ Anu Kebungo Mose yoac yofi edeec, “Ge isracelngic yeneac morocmedacfocngina afongina mocgunac namma ende, yeni arengyunuma kpacnginaac kpete mebesena.

⁴¹ Ni Kebu, imocac amma Isracelngicngac morocmedacfocngina sasawa yeneac turunga Lewingic yeni neac yombong kecgecdeac segereyunuma meisingyunubesena. Amma isracelngic yeneac ramaburumakafocngina warac warac fingecgec, imoc yeneac turunga Lewingic yeneac ramaburumakafocngina warac warac fingecdae imoc yeni neac ifingoc ambisia.”

⁴² Ifi deu Mose ye Kebungo yoac dederecge ammiec, imoc tofohoma Isracelngicngac yeneac warac fingec fingera ngic sasawa arengyunuma kpetengina meec.

⁴³ Nga morocmedac afongina mocgunac namma ende, yeneac kpacngina tembuc tembuc sasawa arengyunuma kpetengina megec, imoc 22 273 anec.

Ngic 273 imoc yeneac turunga

⁴⁴ Anu Kebungo torokpema Mose yoac yofi edeec,

⁴⁵ “Ge Isracelngicngac morocmedacfocngina sasawa yeneac turunga Lewingic segereyunuma meisingyununa yeni Kebu neac areng yombong amma kecbisia. Nga ramaburumakafocngina yeneac turunga Lewingicngac yeneac ramaburumaka imoc neac ifingoc anggecde. Lewingic yeni neac areng amma kecbisia. Ni Kebunoc.

⁴⁶ Nga Isracelngicngac yeneac morocmedacfocnginaac kpete imoc Lewingic yeneac kpetengina ferahedeac ge ngic 273 imoc yeneac turunga merembesena.

⁴⁷ Imocac amma ngic tembuc tembuc sasawa silwa shekelkpete marimong gembisia. Shekelkpete imoc kpetiac amaac shekelkpete fede, imoc modacbesena. Nga shekelkpete mocgu imoc gerakpete twenti ande.

⁴⁸ Nga kpete ferahaecac ge dzo imoc Aharon nga medacfora yeni yemmebesena. Imocngo imocac turunga anude.”

⁴⁹ Anu kpete megec imohai isracelngic yeneac kpetengo Lewingic yeneac kpete ferahaecac Mose ye yenearunac turung kpoukpou dzo mema imoc Lewiac kisicarengfora yeneac turunga kpouec.

⁵⁰ Ye Isracelngicngac morocmedacfocngina yenearunac dzo imoc meec. Nga imoc kpetiac amaac ebiha modacma shekelkpete 1 365 anec.

⁵¹ Anu Mose ye Kebungo derecgemiec, imoc modacma turung kpoukpouac dzo imoc Aharon nga medacfora yemmeec.