Bangec kisiu 28 - Deduamiti

Wenacsoc sesegerec oho oho imocac yoac

¹ Kebungo Mose yofi edeec,

² “Ge Isracelngicngac yoac yomoc dederecge ayemmena imoc modacbisia, ‘Yeni neac seseac yaka sesegerecna hafoangoc ohogec homuna gombunga fiu negemba ngereeudeac nasoyombongau piti mehakecbisia.’

³ Nga yofi torokpema edeyunubesena, ‘Ngeni wiac yofi mema Kebuac sesegerec hafoangoc ohobisia. Ramangiwa medaha yohockang kifangira mocgu angana sebingira soronga yombong nga puringa kpac, imoc gerecsesengina ambeso. Anu imoc wenacsoc hafoangoc ohokecbisia.’

⁴ Ge ramamedaha mong imoc asoac nga mong imoc ama toforebeso ande, imohai ohobesena.

⁵ Amma sese imocac yaka dema wit uha gombunga yombong efakpete 1/10 mema oliwa medzamema imocac kerecdokuya hinkpete ¼ uhagoc yerecgema faikecbesena.”

⁶ Anu yeni Sinai tikiu wenacsoc sesegerec imoc hafoangoc ifinoc ohogec homuna gombunga fiu Kebungo homuna imoc hemma negenu ngereeudeac faka imoc angkecgec.

⁷ “Nga ge ramamedaha mocgu mocguacsoc seseac doku hinkpete ¼ mema faikecbesena. Kpetiac amau seseac dokuseria Kebuac anudeac kpetinggebisia.

⁸ Nga ramamedaha kpetea yohockang imoc ama toforebeso anu ohobesena. Imoc asoac seseac yaka nga doku fainec, ifi isocngoc faikecbesena. Rama imoc ohona hafoangoc dzema homuna gombunga fiu Kebungo homuna negemma negenu ngereebeso.

Tacnegennasoac sesegerec

⁹ Anu tacnegenggac wenacfu ine ramangiwa medaha yohockang kifangira mocgu angana nga sebingira soronga yombong nga puringa kpac faiyuruma seseac yaka dema wit uha gombunga yombong efakpete 2/10 mema kerecdokugoc yerecgema sese imocac doku ifingoc faikecbesena.

¹⁰ Ngeni tacnegenggac wenacsoc sesegerec hafoangoc oho ohoac negemma sesegerec ifinoc faima wenacsocac sese imocac doku ifingoc faikecbisia.

Afosocac sesegerec

¹¹ Nga afo mong monggoc gboria ereude naso imohai wiac yofi imoc Kebuacsesegerec hafoangoc ohogecdeac mehabisia, burumakangiwa yohockang kifangira mocgu angana, ramangiwa mong amma ramangiwa medaha sewen kifangina mocgu angana nga sebingina soronga yombong nga puringa kpac, ifi faiyunubisia.

¹² Nga burumakangiwa mocgu mocgu ohogecdesoc sese imocac yaka dema wit uha gombunga yombong efakpete 2/10 mema kerecdokugoc yerecgema faikecbisia. Amma noningngiwaac seseac yaka dema wit uha efakpete 2/10 mema kerecdokugoc yerecgema faikecbisia.

¹³ Anu ramamedaha mocgu mocgu sasawa yeneacsoc seseac yaka imoc wit uha gombunga yombong efakpete 1/10 mema kerecdokugoc yerecgema faikecbisia. Sesegerec imoc ohogecde imoc homuna gombunga fiu Kebungo hemma negenu ngereeudeac faikecbisia.

¹⁴ Nga seseac doku yofi faibisia, ngeni burumakangiwa tembuc tembuc sasawaac waindoku seria hinkpete ½ faibisia, nga ramangiwa tembuc tembuc sasawaac hinkpete ⅓ amma ramamedaha tembuc tembuc sasawaac hinkpete ¼. Ngeni imoc sesegerec hafoangoc dzeude imoc afo mong monggoc gboria ereude naso imohai ifi faikecbisia.

¹⁵ Anu kopocsic meic meickeac sese dema noningngiwa mong Kebuohomibisia. Noning imocac witiau seseac doku faima hafoangoc ohobisia. Sese imoc wenacsoc faikecbisia.

Nasotoa deserigec imohai sesegerec faifai

¹⁶ Nga afo kpete mocgu, imocac wenac kpete fotin, imohai Kebuac onggoc onggongge nasotoa negensima takecbisia.

¹⁷ Tacma afo imocac wenac kpete fiftin, imohai nasotoa hanahema icsogong aenga kpac nema kecmagec wenac sewen wisickebeso.

¹⁸ Nga wenac kpete mocgu imohai kpekpedzuc kpetiac amma wenacsoc ua mong mi mebisia.

¹⁹ Anu Kebuac sesegerec wiac yofia ohomibisia. Ngeni burumakangiwa yohockang kifangira mocgu angana nga ramangiwa mong amma ramangiwa medaha sewen kifangina mocgu angana, imoc yeneac sebingina soronga yombong nga puringa kpac, sese imoc sasawa faidacbisia.

²⁰ Anu sese imocac yaka dema wit uha gombunga yombong mema kerecdokugoc yerecgebisia. Imoc burumakangiwa mocgu mocguacsoc efakpete 3/10 faibisia nga ramangiwaac efakpete 2/10 faikecbisia.

²¹ Nga ramamedaha sewen mocgu mocgu yeneac negemma efakpete 1/10 mema faikecbisia.

²² Amma noningngiwa mong kopocsic meic meickeac sese dema momoc faigec imocngo ngaba meic meicke ua mengemmeude.

²³ Nga imoc asoacsoc sesegerec hafoangoc ohoandae imocgoc ohobisia.

²⁴ Ngeni wenac sewen ifinoc amma kecma sesegerec hafoangoc ohogec homuna gombunga fiu Kebungo homuna negemma negenu ngereeudeac nasosoc sesegerec hafoangoc ohoandae imoc seseac dokugoc faikecbisia.

²⁵ Nga wenac sewen, imohai ine kpekpedzuc kpetiac amma tacbisia. Wenac imohai ua mong mi mebisia.

²⁶ Nga ngeni neneyaka hania hania buma heigecdeac me witgbomea gboriaunac sese dema wenac imohai kebuaru mehagecde, wenac imocngo ngeneac kpekpedzuc kpetiac anu tacbisia. Wenac imohai ua mong mi mebisia.

²⁷ Anu sesegerec hafoangoc ohogec homuna gombunga fiu Kebungo homuna negemma negenu ngereeudeac wiac yofi mehabisia, burumakangiwa yohockang kifangira mocgu angana nga ramangiwa mong amma ramangiwa medaha sewen kifangina mocgu angana faibisia.

²⁸ Nga sese imocac yaka dema wit uha gombunga yombong mema kerecdokugoc yerecgema faikecbisia. Burumakangiwa mocgu mocgu yeneacsoc efakpete 3/10 faibisia amma ramangiwaac efakpete 2/10

²⁹ nga ramamedaha sewen mocgu mocgu yeneacsoc efakpete 1/10 faikecbisia.

³⁰ Amma noningngiwa mong imoc ngaba meic meickeac ua meudeac negemma ohobisia.

³¹ Ngeni wenacsoc sesegerec faikecma seseac yaka nga dokuyagoc ifingoc faikecbisia. Amma yang faikecgecde, imoc yeneac sebingina soronga yombong nga puringa kpac ambeso.