Bangec kisiu 27 - Deduamiti

Tselafehad naroangfora

¹ Anu Yosef medaha Manasse, yeac medaha Makirac medaha Gilecadac medaha Hefer yeac medaha Tselafehad yeac naroangfora yeneac kpacngina yofi, Mehela, Noca, Hagela nga Mileka amma Tirtsa. Yeni enara yeneac kicnginau hama fingecgec.

² Yeni Kebugoc ewacemeemeac kporucamaac naguyau hama Mose nga womonggareng Elecadzar amma ngicenarafocngina nga ngichabu hafoangoc yeneac kicfu namma yofi degec,

³ “Mannina ye bangeckisiu homeec. Nga ye ine Kora nga habufora Kebuac yoac kpegec, yenigoc kpedzucnema yeneac botucnginau mi kefec. Amma ye medacfora kpac nga ye yengena kopocsicac amma homeec.

⁴ Nga ye medaha kpac kefecac amma kpara arengfora yenearu kpac anude imoc naric mi heide. Imocac manninaac dacmunafora yeneac botucfu bangec mong nemmebisia.”

Yeac fingecsahe manaunac tosea mong migec

⁵ Ifi degec Mosengo yoacngina imoc Kebuac kicfu mekenec.

⁶ Kenu Kebungo yofi edeec,

⁷ “Tselafehad naroangfora yeni yoac dedae imoc naric. Imocac ge mangnginaac dacmunafora yeneac botucfu bangec mong yemmena mangnginaac bangec imoc megec imocngo yeneac bangecyombong ambeso.

⁸ Amma Isracelngicngac yofi edeyunubesena, ‘Ngic mong ye medaha kpac kecma homeudeu bangecyombonga imoc naroangaac ambeso.

⁹ Me naroanga mong mi kefudeu bangeha imoc dacmunafora yemmegec yeneac ambeso.

¹⁰ Me dacmunafora mong mi kecgecdeu bangeha imoc waecfora yeneac ambeso.

¹¹ Me waecfora mong mi kecgecdeu ine bangeha imoc yeac fingecsahe manaunac tosea mong migec yeac ambeso. Desi desiyoac imocngo Isracelngicngac yenearu fakangina seria feu Kebungo Mose dederecge ammiec, ifi isoc yombong ambisia.’ ”

Kebungo Mose homeudeac edeec

¹² Anu Kebungo Mose yofi edeec, “Ge Awarim tikiu emma Isracelngicngac bangec ngemmeai imoc hembesena.

¹³ Henna wisickeu dacga Aharon arengfora yenigoc torokpeyunuec ifi isocngoc kennade.

¹⁴ Warac Tsin bangeckisiu ngichabu yeneng yoacna kpegec. Tsin bangeckisiu Kades imohai Meriwa doku fede ngeri imohai ngichabu yeneac kicfu namma kpetiac anduae imoc mi mekperagiyemmema waocac ifi fingecgenude.”

Yehosuacngo Moseac tatac mebeso

¹⁵ Anu Mose ye Kebu yofi edeec,

¹⁶ “O Kebu Anutu, ge ngic sebifusigoc sasawa asunginaac kunengngina, geng ngicngacarenniraac enara mong meisinggema ngickuneng anudeac desima faibesena.

¹⁷ Faina yeng waraiyemmema hesicyunuu kembisia nga yengngoc enara meyemmemanu meyunuma dzigenebisia. Yeng hesicyunuu kembisia nga yengngoc meyunuu dzigenebeso. Kebu geac kpebung yeni ramahabu garengngina kpac ifi isoc mi kecgecdeac ifi ambesena.”

¹⁸ Ifi deu Kebungo Mose yofi edeec, “Nun medaha Yehosuac yeac hereu asu femide. Ge ye mema mariga yeac witiau faibesena.

¹⁹ Faima dena womonggareng Elecadzar nga ngichabu hafoangoc yeneac kicfu nammanu uayaac dekperagibesena.

²⁰ Dekperagima yeng geac tatac mema garengyunuudeac kuc tosea mina Isracelkpebung hafoangoc yeni imoc hemma negemma yoara negentofoho amma kecbisia.

²¹ Nga ye womonggareng Elecadzar yeac kicfu namma kpesi kpesi faikecbeso. Fau Elecadzarngo yeac turunga Kebuac kicfu namma urim nga tummin kpeing kpeu imocngo yoac fora desibeso. Desiu isracelngic yeni imoc modacma kengkecbisia amma dzigenekecbisia. Imoc ye nga Isracelac ngichabu hafoangoc yeni yegoc yacma kengkecbisia amma dzigenekecbisia.”

²² Anu Mose ye Kebungo dederecge ammiec, ifi isoc yombong amma Yehosuac deu yeng womonggareng Elecadzar nga ngichabu hafoangoc yeneac kicnginau kemma nanec.

²³ Nanu Mose ye Kebungo yoac dederecge ammiec, ifi isoc amma maria Yehosuacac witiau faima desima ua meudeac dekperagiec.