Bangec kisiu 25 - Deduamiti

Isracel yeni nemuonga fafoc heimigec

¹ Isracel yeni Sittim imohai kecma ngic yeni hanahema Mocaw yeneac naroangfocngina yenigoc serofaka angkecgec.

² Angkecgec naroang yeni anutunginaac sesegerecac nasou Isracelngicngac yenearu heitaiyunugec kemma yaka nema anutunginaac kicfu ngonducnema eweheimigec.

³ Isracel yeni ifi amma Bacal Pecor yearu torokpegec. Anu Kebu ye yeneac herea buyombonggeec.

⁴ Nga ye Mose yofi edeec, “Isracel ngenearu herebuna gerec isoc dzede, imoc kpac anudeac ge ngicngacareng yeneac enarafocngina sasawa meyunuma Kebu neac kicfu wenacfu gbedicyununa nanggec.”

⁵ Ifi deu Mose ye Isracel yeneac desi desingicfocngina yofi edeyunuec, “Ngeni tembuc tembuc sasawango ngicfocngina botucnginaunac Bacal Pecor yearu torokpegecmoc sasawa homecfu faiyunubisia.”

Dzimiringo midyanngac wangecma heac

⁶ Ifi demanu Mose nga Isracelkpebung hafoangoc yeni Kebugoc ewacemeemeac kporucamaac naguu kiacma nammagec isracelngic mongngo yeneac kicfu midyanngac mong dacmunafora yenearu wangecma haec.

⁷ Hau womonggareng Aharon medaha Elecadzar yeac medac Pinehas, ye ifi hemma ngichabu yeneac botucfu yacma sangara enaragoc mariau mema

⁸ ngadengirau modacyuruma isracelngic imocac kporucamau emma yerahafoc wosongirau nesarima nebucyuruec. Ye ifi anu Isracelngicngac yenearu hafei homectoayagoc imoc kpac anec,

⁹ nga hafei homectoayagoc imocngo meyunuu ngicngac 24,000 homegec.

Pinehasac yoac

¹⁰ Anu Kebungo Mose yofi edeec,

¹¹ “Womonggareng Aharon medaha Elecadzar yeac medac Pinehas, yeng ni isoc yeneac keracmangang amma Isracel yeneac botucfunac herebutoana kuha maudeac ua medac. Ifi anu ni keracmangang amma Isracelngicngac mi meicyunudua nga tosea yeni yaguc kecdaengoc.

¹² Imocac yofi edebesena, ‘Ni yegoc ruaeac dzadzahacna mebade.

¹³ Ye Anutuya neac amma keracmangang amma Isracel yeneac ngaba meic meicke ua meec, imocac ye nga yeac gboricfora yeac ngadeau fingecgecde, yeni dzadzahac imocac manau kecma womonggareng ua nasoya nasoya mekengkecbesandae.’ ”

¹⁴ Nga isracelngic midyanngac yegoc nebucyuruyuruya ye Salu medaha Dzimiri, ye Simeconggac amaarenghabu mong yeneac ngicenara.

¹⁵ Nga midyanngac nebucgeec yeac kpara Kodzebi. Ye Midyan amaarenghabu mong yeneac ngicenara kpara Tsur, yeac naroanga.

Midyanngicngac tobangyunuma ikocfu wangecyunugec

¹⁶ Anu Kebungo Mose yofi edeec,

¹⁷ “Midyanngicngac yeni sufu sufuu tobangngunuma ikocfu wangecngunugecac ngeni midyanngic yenigoc dzikac kpema ewema yunudacbisia.

¹⁸ Imoc yofiac, yeni Pecorac fakau tobangngunuma ngenigoc dzikac isoc kpema kecdae. Imohai naingngina Midyanggac ngicenaraac naroanga Kodzebi, yearu faka fingerec. Pecorac amma hafei homectoayagoc fingerec, wenac imohai Kodzebi kpebucgegec.”