Bangec kisiu 24 - Deduamiti

Kpefing kpete harebec

¹ Anu Bilecam ye yofi henec, Kebungo Isracel kenecyunuudeac negenu ngereede. Ifi negemma ye warac kpefingyoac deudeac ma hania hania meficgeudeac angkefec isoc mi kenec. Ye eng kiwa bangec kisiubigeng fiec.

² Fima henu Isracel yeni kisicfocnginasoc modacma guru mema kporucamanginau tacyac anggec. Ifi henu Anutuac Asungo yeac witiu maec.

³ Mau kpefingyoac yofi dekperagiec, “Ni Becor medaha Bilecamngo yoac yofi deduae, ni yoacna imoc ngic kiwa tegec tegeraac yoac.

⁴ Yeng Anutuac yoac negende, ye Kuctoa Mingina yeac dedekperagiyoacac kpefing hennegengande. Ye bangecfu ngonducnemanu kiwa tegeru wiac hengande.

⁵ O Yacakow, geac kporucamaga sasawa imoc siricngina gombunga yombong. Isracel, geac amagerecga guruya guruya imoc songodzidziagoc.

⁶ Imoc tumiatoa emu tiki botucnginau fekendae, ifi isoc imoc semeng ua dokutoa fekendeac tegiau isoc. Imoc aloe Kebungo homerec ifi isoc, imoc cedar ic doku tegiau nangandae ifi isoc.

⁷ Yeneac fawaunac doku maude, wiac gbomea homecbesandae imocac doku soha ambesande. Ngictaungina ye Agag ferahabesande, yeac eucererenga imoc miacgec engena ambesande.

⁸ Anutungo Aigitabangecfunac hesicyunuu eregec kuc imoc kateburumakangiwaac kuc ifi isoc yemmeec. Yeni ngabafocngina bangeha bangeha neyunudacgecde, yeni sicngina hetackema tebemedahanginango kpesariyunubesandae.

⁹ Yeni laionyang isoc mama fedae, yeni laiongngagera isoc fedae. Mongngo ye yarudeac ammiudeacsoc mi ambesande. Ngic kenecngunubesandae, yeni kenecnginagoc. Sowecngunubesandae yeni sowecnginagoc.”

Bilecam bangehau sueec

¹⁰ Ifi deu Balak ye yoac imoc negemma Bilecamgac herea buyombonggeec imoc gerec isoc dzeu maria kpema yofi edeec, “Ni ngabafocna sowecyununadeac hana dema heitaiguai nga geng ine imoc wama kenecyununa naso harebec bic ande.

¹¹ Imocac worama bangecgau kenna! Ni yofi edeguai, eweheihei anggemma bung gembade nga negennec, Kebungo ine imoc hedzickema wadac.”

¹² Ifi deu Bilecamngo yofi edeec, “Yoacdedengicfocga nearu sueyununecmoc yeni yofi edeyunuai,

¹³ ‘Balak ye ameau silwa nga gol wakema febac dede nga imoc neac anudeac deude isoc ni ine sifu Kebu Anutunaac yoac kpema wiac kapia me kuneng naric mi ambade. Kebungo yoac edenude, imocsac debadeac kucna fede.’

¹⁴ Amma ni yaguc ngicngacarengfocna yenearu dzigenebade. Anu ngicngacareng yomoc yeni kecma ngade ngicngacarengfocga dafi ayemmegecde, imocac yoac edeguba negenna.”

¹⁵ Ifi dema kpefingyoara yofi dekperagiec, “Ni Becor medaha Bilecamngo yoac yofi deduae, ni yoacna imoc ngic kiwa tegec tegeraac yoac.

¹⁶ Ni Anutuac yoac negenduae, ni negen negeng Engenatoa yearunac meduae. Kuctoa Minginango wiac hende imoc henduae, ni bangecfu manuu kicna tegecande.

¹⁷ Ni henduae amma yofinenggac kpac. Ni kic fima hemba ye wegenac kpac. Yacakow yearunac asomeng mong fingecbesande, ngictauac yasu mong Isracel yenearunac erebesande. Imoc Mocaw tuturunga sasawa medzameyunudacma Set medacfora sasawa kpetotieyunudacbesande.

¹⁸ Ye ngabafora bangecngina mema imocac mingina ambesande, ye Edom nga Secir yeneac bangec mema mingina ambesande. Isracel ye kuhagoc yombong ambesande.

¹⁹ Ngictau ye Yacakow yearunac fingerec, ngictauac kucngo garengyunuude, ye taonnu tosea sufuma kecgecde yeni kpetotieyunudacbesandae.”

²⁰ Bilecam ye ifi dema Amalek hemma kpefingyoara yofi dekperagiec, “Amalek ye mikingicngacareng sasawa yeneac warac waracngina nga yeni wisic wisickeau ye kpetotiegec kpac ambesande.”

²¹ Ifi dema keningic yenemma kpefingyoara yofi dekperagiec, “Keningic ge amagerecga imoc seria, ge hoc peperandziac witiau faecga faina tackende.

²² Nga gearu sifu yofi fingecbesande, Assurngo keningic ngunuma mengunuma witicngunubesandae.”

²³ Ifi dema kpefingyoara torokpema wisic wisickeau yofi deec, “Ebictoa yombongngo fingengemmebesande. Anutungo ebicnginagoc anggecdeac ifi deu mongngo naric mi kefude.

²⁴ Kittingic yeneac kondung tegiaunac wage yeni hama Assur nga Ewer memayunubesandae yeni ifingoc kecma kpetotieyunudacbesandae.”

²⁵ Anu Bilecam ye ifi dema yacma amabangehau dzigeneu Balak ye ifingoc yengena singau dzigene kenec.