Bangec kisiu 21 - Deduamiti

Kenacan yenigoc ewegec

¹ Aradac ngictau, ye kenacangngic Negewbangecfu kefec. Nga Isracel yeni Atarim sing hama kecdae, yeng siduc ifi negemma yacma yenigoc ewema Isracel goa meyunuma wangecyunu kenggec.

² Ifi fingeru Isracel yeni kebuaru yoacseria yofi deserigec, “Ge ngicngacareng imoc yeni neneac mariu faiyununadeu neni amatoangina sasawa kpembarackedacma hesisickeyunudacnide.”

³ Ifi deu Kebungo Isracelac ubaudumenga negemma kenacanngic maringinau faiyunuu yeneng ngicngacfocngina kpetotieyunuma amatoangina fekenggec imoc kpembarackedacma hesisickedacgec. Nga bangec imocac kpara Horema kpacgec.

Boidzoc ongea aieng sacsacngo memea

⁴ Anu Isracelngicngac yeni efaima yacma kporucamangina meickema Hor tiki wama Edombangec yerecgema ferahagecdeac kondung sacsacfubigeng sing kengkecgec. Kengkecmagec ngicngac yeni singgac modzongina tiec.

⁵ Modzongina tiu Anutu nga Mose yereac ubakpekpeyoac yofi deyecmegec, “Ngeri nocac Aigitabangecfunac bangeckisiu homenideac wangecnunu hadape? Yomohai nenedoku mong mi fede nga yaka neandimbe imocac modzonina tiyombonggede.”

⁶ Ifi degec Kebungo boidzoc mangana sueyunuu ngicngac botucnginau hama yinigec Isracelngicngac homacngo homegec.

⁷ Homegec ngicngac yeni Mosearu hama yofi edegec, “Neni Kebugoc ngeri yoac dengecmema kopocsic meficgedinggac amma ge Kebungo nenearunac boidzoc sasawa meicyunuudeac numumibesena.” Ifi degec Mose ye ngicngac yeneac amma numuec.

⁸ Numuu Kebungo Mose yofi edeec, “Ge boidzoc manganaac ongea mong mema ic hereau kpesorona nanu ngicngac sasawa boidzocngo yini yiniya yeni imoc hemma kekecnginagoc anggecde.”

⁹ Ifi edeu Mose ye aieng sacsacngo boidzoc ongea mema ichereau kpesorou nanu boidzocngo ngicngac yiniu boidzoc ongea imoc henggec, yeni ngereema kecgec.

Isracelngicngac yeni Mocawbangec yerecgegec

¹⁰ Anu Isracelngicngac yeni efaima yacma kporucamangina meickema kengkecma Owot imohai kporucbedzongina kpedzigec enu guru mema tacyac anggec.

¹¹ Amma Owot imohacnac kengkecma Iye Awarim imohai kporucbedzongina kpedzigec enu guru mema tacyac anggec. Bangec kisi imoc Mocawac fanihau wenac ere ereaubigeng feec.

¹² Nga imohacnac kengkecma Dzered tumiatoa emu feec, imohai kporucbedzongina kpedzigec enu guru mema tacyac anggec.

¹³ Amma imohacnac kengkecma Arnon doku noboc edibigengau kensikema imohai kporucbedzongina kpedzigec enu guru mema tacyac anggec. Imoc yofiac, Arnon doku imocngo amoringicngacareng yeneac bangecfunac hakecma bangeckisiu fede. Amma imocngo Mocaw nga amoringicngacareng yeneac botucnginau mangina ande.

¹⁴ Imocac amma Kebuac dzikackibiu yoac yofi fede, “Supa bangecac Wahew amma Arnon dokusing.

¹⁵ Dokusing imocac fagang noboc nga noboc fekengkecma Ar amabangecfu kemma Mocawbangecac maubigeng wisickede.”

¹⁶ Anu yeni imohacnac kengkecma Beer dokuteng usu usuyau kensikegec, imohainoc Kebungo Mose yofi edeec, “Ngicngacareng kpedzucyununa ni doku yemmebade.”

¹⁷ Anu naso imohai Isracel yeni yegec yofi heigec, “Doku ge bangecfunac erena yegec yofi heigenni.

¹⁸ Ngicenara yeni dokuteng imoc usugec, ngicngacareng yeneac engenafocngina uaac kpacnginagoc yeneng ngictauyasunginango dokuteng usumengere anggec yeni yasunginango dokuteng usumengere anggec.” Anu yeni bangec kisi imoc wama kengkecma Mattana imohai kensikegec.

¹⁹ Nga Mattana imohacnac Nahalicel kenggec, nga Nahalicel imohacnac Bamot kenggec.

²⁰ Nga Bamot imohacnac yacma kengkecma ine Mocawbangecac tumiatoa emu feec imohai Pisga tikibuma hanahema fekende, nga buma ihai namma bangec kisi henggecde.

Emoringic yeneac ngictau Sihon

²¹ Anu Isracel yeni Amoringic yeneac ngictau Sihon yearu yoac dedengic sueyunugec kemma yofi degec,

²² “Neni bangecnginau sing ferecgema kennideac naric debesena. Neni sing tegiaubigeng semeng ua me waing uau mi kemma tinide amma dokutengngina usu usuya imohacnac doku mi nema eng ngictauac singtoaungoc kengkecma bangecgaac ma ferecgenide.”

²³ Ifi degec Sihong ye Isracel yeneng bangehausing ferecgegecdeac waec. Wama wasaingicfora sasawa kpedzucyunuu yacma isracel meficyunugecdeac bangeckisiu Yahets imohai sikema Isracel yenigoc ewegec.

²⁴ Ewema isracelngic yeneng serima wasaibeangnginango yunuma bangecngina Arnon dokuunac hanahema kengkecma doku ferec ferecge kpara Yabbok, imohai kensikema ammongngic yeneac bangecfu wisickede, imoc medacgec. Nga ammonngic yeni bangecnginaac ma imoc meserima kucgoc garenggegecac ihai wisickeec.

²⁵ Nga Isracel yeni Hesbon nga ama bisic bisiha sasawa mema mingina andacgec. Amma yeni emoringicngac yeneac taongtoangina sasawa mema imohai tacyac anggec.

²⁶ Imoc yofiac, Hesbon imoc Amoringictau Sihonggac taongtoa anec. Imoc yofiac Sihong ye warac Mocaw ngictaugoc dzikac kpema bangeha hafoangoc wangecma mekengkefu Arnon dokuu wisickeec.

^27-28 Imocac amma yegecheiheingic yeneng yofi heikecgec, “Gerec Hesbon imohai fingerec, Sihonggac taonnu gerecborang fingecma dzema kengkefec. Ye Mocawbangec Ar dzedacma Arnonggac ickate sifec imoc momoc dzedarecac yofi degec, ngeni Hesbon amau hama Sihonggac taontoa odaya meserima mebisia.

²⁹ Mocaw ge ebictoa fingecgendac! Kemosac ngicngacareng ngeni kpac andae! Ye medacfora dafi ayemmeu bangecngina wama ebicfunac worama kuric kecdae, nga naroangfora yeni Sihonggac witicngac andae.

³⁰ Neni wedecyunudaring. Neni firang amma meyunuing imoc Hesbonnac hanahema meyunu kengkecma Diwon amma Nofac kemma Medewa wegenahau wisickede.”

³¹ Anu Isracel yeni ifi amma emoringicngac yeneac bangecfu kecgec.

³² Kecma Mose ye ngic goa Yacedzer amabangec sufu sufu hennegeng anggecdeac sueyunuu kenggec. Kemma yeni yeneac bagenginau amangina fekenggec imoc meyunuma emoringicngac imohai kecgecmoc kisangyunugec worama kenggec.

³³ Anu yeni ifi amma tegiaubigeng kemma Basan sinnubigeng enggec. Enggec Basan ngictau Og nga wasaingicfora sasawa meyunuma Edereci imohai meficyunuma ewegec.

³⁴ Kenggec Kebungo Mose yofi edeec, “Ni ngictau nga ngicngacfora sasawa amma bangeha imoc geac mariu faiyunudacduaeac ge yeac mi kengecgubeso. Ge Amoringic yeneac ngictau Sihon Hesbon amau kefec ye faka amminecmoc ifi isocngoc Og ammibesena.”

³⁵ Ifi deu yeni Og nga medacfora amma ngicngacfora sasawa yenigoc ewema firang amma yunuhomedacgec monnec mong mi kecgec. Ifi amma bangecngina imoc yeneac anudeac megec.