Bangec kisiu 20 - Deduamiti

Doku mi feec

¹ Isracelngicngac yeneac ngichabu hafoangoc yeni afo kpete mocgu imohai Tsin bangeckisiu Kades imohai kensikema ihai tacgec. Tacmagec Miryam imohai homeu tonggogec.

² Nga imohai doku ngichabu yeneacsoc mong mi feecac yeni Mose nga Aharon yereac ngaba amma yerearu hama kpedzucnegec.

³ Kpedzucnema Mose ubakpekpeyoac yofi edegec, “Neni dacmunafocnina yeni Kebuac kicfu homegec isoc homebinggac!

⁴ Ge nocac Kebuac habu neni nga ramaburumakafocnina bangec kisi yomohai homenideac wangecnunu hadang?

⁵ Nga ge nocac Aigitabangecfunac hesicnunuma bangec mangana yomohai hadang? Bangec yomohai wit nga fig icac gbomea nga wainggbomea nga pommegranat icgbomea mi fede amma doku nenideac mong mi fede.”

Yoac edeec doku maude

⁶ Ifi degec Mose nga Aharon yeri kpebung wayunuma Kebugoc ewacemeemeac kporucamaac naguyau kemma bangecfu kicmesungira hetutuckema feoc. Feec Kebuac kibikperagitoayango yerearu fingectegecma nerarangyuruec.

⁷ Nerarangyurumanu Kebungo Mose yofi edeec,

⁸ “Ge yasuga mema ngichabu hafoangoc kpedzucyununa. Ge nga dacga Aharon ngeri yeneac kicngina witiau hoc peperandzi yoac edeec doku maude. Ge ifi amma hoc peperandzi imohacnac doku meficgema yeni nga ramaburumakafocngina doku gumecyunudacnade.”

⁹ Ifi dederecge ammiu Mose ye imoc modacma kemma Kebuac hoannunac yasuya meec.

¹⁰ Mema Mose nga Aharon yeri kpebung hoc peperandzi wegenahau kpedzucyunudacma Mosengo yofi edeyunuec, “Here miac miac areng, ngeni yaguc negenggec, neri naric ngeneac doku hoc peperandzi yomohacnac meficgengemmedede me?”

¹¹ Ifi dema Mose ye maria miacma yasuyango hoc peperandzi naso yohockang kpeu imocac manaunac doku kunengngoc mau kpebung yeni nga ramaburumakafocngina yeni imoc negec.

Kpetiac anduae imoc mi negensidaoc

¹² Anu Kebungo Mose nga Aharon yofi edeyuruec, “Ngeri ni mi negensinnudaoc amma Isracelngicngac yeneac kicfu ni kpetiac anduae imoc mi negensidaoc amma mi negensinggedaoc. Imocac amma ngeri kpebung yomoc hesicyunuma bangec yemmebadeac deai, imocac manau naric mi enecde.”

¹³ Anu doku imocac kpara Meriwa degec, imohai Isracelngicngac yeni Kebuac yoackpekpeyoac degec anu ye kpetiac, imoc botucnginau edzacyunuec.

Edombangec ferecgebeso anggec

¹⁴ Anu Mose ye Kades bangecfunac yoac dedengic sueyunuma edomngictau yearu yoac yofi fau kenec, “Geac munaga Isracelngo yofi dede, nenearu ebic sasawa fingerec imoc ge negennec.

¹⁵ Mangfocnina yeni Aigitabangecfu kemma ihai naso herea kefing. Kecmina aigitangicngac yeneng mangfocnina nga neni ebic hania hania meficgenemmegec.

¹⁶ Ifi anggec neni Kebu numumini yeng yoacnina negenec. Negemma angeroya sueu yeng Aigitabangecfunac wangecnunuu hama yaguc geac bangec tegiau Kadestaong yomohai tacdimbe.

¹⁷ Imocac negennemmemana bangecga toseau ferecgebeso dedimbe. Neni semeng uau me wain uanginau tima mi ferecgenide amma dokutengnginaunac doku mi nenide. Neni sing tegia foiubigeng me kanaubigeng mi kennide, neni ngictauac singtoaungoc kengkecma bangecga ferecgenideac dedimbe.”

Edom ye kpae heiyemmeec

¹⁸ Ifi degec edomngictaungo yofi merengyemmeec, “Ngeni neac bangecfu sing mi ferecgegecde. Nga sifu kenggecdeu ine dzikac ngenigoc kpenideac dzikacac beannina mema ngunukporac angemmenide.”

¹⁹ Ifi deu Isracel yeneng yoac yofi meremmigec, “Neni singtoasac modacma kennide. Nga neni nenang nga ramaburumakafocnina dokugedangga mong nenideu ine imocac buma fainide. Nga neni ine negennemmemana bangecga hanininango ferecgema kennideac dedimbe.”

²⁰ Ifi degec edomngictau ye monggoc yoac yofi merengyemmeec, “Kpac ngeni mi ferecgegecde.” Ifi dema wasaifora homac kucnginagoc meyunuu Isracel yenigoc dzikac kpegecdeac madacgec.

²¹ Edomngic yeni ifi amma Isracel yeneng bangecngina ferecgegecdeac kpae heiyemmegecac Isracel yeni wama noboha monnusing kenggec.

Aharon homeec

²² Anu Isracelngicngac yeneac kpebung hafoangoc yeni efaima yacma kporucamangina meickema Kades wama imohacnac kengkecma Hor tikiu sikedacgec.

²³ Sikema Hor tiki imohai Edombangec tegiau Kebungo Mose nga Aharon yofi edeyuruec,

²⁴ “Ngeri Meriwa dokuu yoac edenguruai imoc kpeocac amma Aharon ye yei homema arengfora yenigoc torokpeyunubeso. Ye Isracelngicngac bangec ngemmeai, imohai mi enude.

²⁵ Imocac ge Aharon nga medaha Elecadzar Hor tikiu hesicyuruma embesena.

²⁶ Emma Aharonggac uaac wambagedanga hesima medaha Elecadzar heimina kemebeso, nocac Aharon ye imohai homema arengfora yenigoc torokpeyunuude.”

²⁷ Anu Mose ye Kebungo yoac dederecge ammiec, ifi yombong amma kpebung hafoangoc yeneac kicfu hesicyuru Hor tikiu enggec.

²⁸ Engsikema Mose ye Aharonggac wambaya hesima medaha Elecadzar heimiu kemeec. Kemeu Aharon ye tikiac buma imohai homeec. Homeu Mose nga Elecadzar yeri tikiunac maoc.

²⁹ Maec Isracelkpebung hafoangoc yeni Aharon homeec, siduc ifi negemma Aharonggac kiac ubamangang amma kecmagec wenac 30 wisickeec.