Bangec kisiu 19 - Deduamiti

Kopocsic meic meickeac sese

¹ Kebungo Mose nga Aharon yofi edeyuruec,

² “Kebungo singyoac seria modacgecdeac dederecge angemmeec imoc edeyunubesera. Isracelngicngac yeni burumakangagera sacsac kifaya mocgu angana nga medac mong mi meec nga sebia soronga yombong nga puringa kpac amma imocac witiau tofo mong mi faigec, imoc ngerearu mehabisia.

³ Mehagec ngeri womonggareng Elecadzar miec ngic yeneng imoc mema kporucamabangecac ngadeau mekemema Elecadzarngo hemmanu yeac kicfu kpebucgebisia.

⁴ Kpebucgegec womonggareng Elecadzarngo sawaac tosea mema gbongango sacfu nemuruckema dzidzia Kebugoc ewacemeemeac kporucama kiwaac witiau gigiu heiu atac sewen ambeso.

⁵ Anu yeng hemmanu burumakangagera gboria medac mi memea imocac sebera, fusia nga sawa amma keraha imoc gerecfu faigec dzedacbeso.

⁶ Dzemanu womonggareng ye cedar ic nga hyssop dzaring amma witic kibia sacsac mema gerecfu ukuyunuu burumakangagera dzeude, imocac botuhau kemema dzedacbeso.

⁷ Anu womonggareng ye ifi amma wambaya dzuacma yengena doku nadzicma dzigenema kporucamabangecfu naric embeso. Nga ye Kebuac hehenu wonongagoc amma kecmanu ama toforebeso.

⁸ Nga ngic burumakangagera gerecfu ohodac ye ifingoc wambaya dokuu dzuacma yengena doku nadzicbeso amma ye ifingoc Kebuac hehenu wonongagocngoc amma kecmanu ama toforebeso.

⁹ Amma ngic mong ye Kebuac hehenu kongaha kefudengo burumakangageraac hamaya kpedzucnema kporucamahabu kekecac ngadeau bangec mong kongahau kpetinggeu febeso. Imoc Isracelngicngac yeneac kpebunggac negemma ifi anu imocngo dzuac dzuac dokugoc yerecgekecbisia. Imocngo kopocsic meic meickeac sesengina anude.

¹⁰ Ifi amma ngic merang burumakangageraac hama kpedzucneude ye ifingoc wambaya dzuacma Kebuac kicfu wonongagoc amma kecmanu ama toforebeso. Imocngo Isracelngicngac nga kuricngic botucnginau kecdaemoc ngeneac singseria feengkecbeso.

Fareng kpeseregec yeneac yoac

¹¹ Mong ye fareng mong meude me kpesereudeu ye Kebuac hehenu wonongagoc amma kecmanu wenac sewen wisickebeso.

¹² Amma ye wenac kpete harebec nga sewen, imohai Kebuac kicfu wononga kpac anganggac doku dedea imoc nadzicma kongac kpebeso, ye wenac imohai ifi mi anudeu ye Kebuac kicfu kongaha mi anude.

¹³ Amma ngicngac mocgu mocgu sasawa yeni ngicngac homemea yeneac fareng kpeseregec yeni Kebuac hehenu wonongnginagoc amma kecma Kebuac kporucwomong momoc ammigec wonongagoc anude. Ngic ifia Isracel yeneac botucfunac meickebeso. Anu womonggarengngo kongaha anganggac dokudzidziango mi mema ukuu heiecac ngic imoc ye Kebuac hehenu wonongagoc anude. Ye Kebuac hehenu wonongagoc amma kefudengoc.

Kporucamau homegecde yeneac yoac

¹⁴ Nga mong ye kporucamau homeude, imocac dedeseriyoac yofi, ngicngac mocgu mocgu sasawa yeneng kporucama imocac manau bic tacdau me kporucama imohai enggecde, yeni sasawango Kebuac hehenu wonongnginagoc amma kecmagec wenac sewen wisickebeso.

¹⁵ Amma terabokong nganoc sasawa tapangina kpac imohai tacdae, imoc ifingoc Kebuac hehenu wonongnginagoc amma tacdacbisia.

Kateu wiac homemea kpesere

¹⁶ Nga ngicngac mocgu mocgu sasawa yeni kateu kemma ngic me ngac mong wasaibeangngo kpebuc kpebucgea me sing monnu homeu henu bangec witiau feu farenga kpesereudeu me ngicsic me kicsere kpesereudeu ye ifingoc Kebuac hehenu wonongagoc amma kecmanu wenac sewen wisickebeso.

¹⁷ Nga ngic me ngac mongngo ifi amma wonongagoc kefude, yeac negemma kopocsicac sese gerecngo dzedzea, imohacnac hama goa mema kpakenec monnu faima imohai doku gombunga witiau kpakegec hama imoc mesufubeso.

¹⁸ Mesufuu ngic mong ye Kebuac hehenu kongaha ande, yeng hyssop dzaring mong kpouma doku imohai nemuruckema dzidzia gigiu kporucama nga terabokong amma ngicngac imohai tacgec yeneac witinginau sasawa me ngicsic mehenggec me ngic kpebucgegecac fareng bangecfu feu kpesereec me ngic mong homeec ye kpesereec me kicsere kpesereec, imoc sasawa yeneac witiu gigiu nadzicyemmedacbeso.

¹⁹ Anu ngic ye Kebuac hehenu kongaha andac, yeng wenac kpete harebec nga wenac kpete seweng imohai dokudzidzia gigiu ngic wonongagoc amma kecde, ye nadzicmibeso. Ifi anu wononga imoc meickeu ngic wonongagoc ande, ye wenac kpete sewen imohai nadzicmibesonga amma ye wambaya dzuacma doku nadzicma ama toforeu Kebuac hehenu kongaha anude.

Wononga mi dzuarude, yeac yoac

²⁰ Anu ngic mong ye Kebuac hehenu wonongagoc amma kecma wononga imoc mi dzuarudeu ye kpebunggac botuhaunac meickebesonga. Ye Kebuac kpetiac womong seuhagoc anudeac ammiecac ifi ammibesonga. Yeni wononga imoc meickegecdeac dokudzidzia ngic imocac witiau mi gigigec enec. Ifi anu ngic ye Kebuac hehenu dzuac dzuara mi anude.

²¹ Singseria imocngo yenearu nasoya nasoya feengkecbeso. Nga ngic ye ngic goa wonongnginagoc kongaha anggecdeac dokudzidzia gigidacmoc ye ifingoc wambaya dzuacbeso. Nga mongngo kongaha anganggac doku imoc kpesereudeu ye ifingoc Kebuac hehenu wonongagoc amma kecmanu ama toforebeso.

²² Nga ngic Kebuac hehenu wonongagoc amma kecde, yeng wiac sasawa kpesereudeu imoc sasawa wonongagocngoc anude. Ammanu ngic mongngo ye kpesereudeu ye ifingoc Kebuac hehenu wonongagoc amma kecmanu ama toforebeso.”