Bangec kisiu 18 - Deduamiti

Womonggareng nga Lewingic uangina

¹ Kebungo Aharon yoac yofi edeec, “Kpetiac amaac manau faka nga angammeme mangana anggecde nga womonggareng ua mekecdae ngeneac botucnginau faka nga angammeme mangana anggecde, ebic imocngo ge nga medacfocga amma geac manggaac fingecsahe yeni gegoc tofohobisia.

² Anu dacmunafocga Lewiac kisicfunac, imoc geac manggacac kisicfunac, yeni ifingoc heitaiyununa yeni naric hama ge nga medacfocga ngenigoc torokpema Kebungo wiac heigboringemmekecduaeac kporucamaac naguyau geac enactofoc tofoho ua mebisia.

³ Amma yeni geac ua nga kporucamaac ua sasawa imoc mema kecbisia. Ifi kecma yeni nga ngeni ngenahafoc homebauac uaac wiacgedanga kpetiac nga arata imocac wegenahau mi habisia, imoc kpaeyagoc.

⁴ Nga yeni ine uanaso fedesoc imohai gegoc torokpema Kebugoc ewacemeemeac kporucamaac ua mema kecbisia. Anu kuricngic mongngo ine geac wegenac mi habeso.

⁵ Ammanu Isracelngicngac yeneac herena monggoc bubacac ngeneng kpetiac womong nga arata garenggema kecbisia.

⁶ Nga negennec, ni neannaoc dacmunafocga Lewingic yeni Isracelngicngac yeneac botucfunac segereyunuma meisingyunuai. Meisingyunuba yeni sese isoc Kebu neanna amma kecma Kebugoc ewacemeemeac kporucamaac uaya megecdeac segereyunuma ngeni ngemmeai.

⁷ Amma ge nga medacfocga ngenengsac ine womonggareng uangina mema aratau nga kporucamaac mana kpetiac kporuc manau fede, imocac ua sasawa mema kecbisia. Womonggarenggac ua imoc sese isoc ngeni ngemmeduae. Anu ngic mongngo ua imoc mi meudeac dedea, yeng dederecgeyoacna ferahema ua imoc meudeac haudeu ye homecfu faibeso.”

Wiac kpetiac nga kpataning yombong

⁸ Anu Kebungo torokpema Aharon yofi edeec, “Ni neannaoc Isracelngicngac sese nenggecde imoc garenggenadeac faiguai. Yeneng sese kpetiac nenggecde imoc garenggegecdeac ua imoc ngeneac wiac anudeac ngemmeduae imoc ngeni nga nambaracfocngina yeneac ua nasoya nasoya feengkecbeso.

⁹ Nga seseac wiacngina kpetiac nga kpataning yombong gerecfu mi dzeude imoc sasawa geac anude. Imoc sesengina sasawa ni nenggecde, seseac yaka faigecde, kopocsic meic meickeac sesengina nga turung meic meickeac sesengina, wiac imocnoc. Wiac imoc sasawa kpetiac nga kpataning yombong amma imoc ge nga medacfocga ngeneac wiac andarude.

¹⁰ Ammanu ngeni tatac kpetiac nga kpataning yombong desigecde imohai tacma wiac imoc nekecbisia. Ngeni imocac negenggec wiac kpetiac anu ngicfocga sasawango imoc nema kecbisia.

Sese goa ngeneac anude

¹¹ Nga seseunac sese yofi imoc ngeneac anudengoc, Isracelngicngac yeneac sese sasawa fendzonggeandae imoc desiba ge nga naroangmedacfocga ngeneac wiac anude. Imoc nasoya nasoya ifi ammanu ngeni imoc amaarengnginau ngicngac tembuc tembuc sasawango Kebuac hehenu kongaha kecdae, yeneng imoc naric nebisia.

¹² Amma kerec gombunga yombong gboriaunac memea, waing gboria gombunga yombong nga witgbomea, imocac wiac sasawa warac warac mema Kebu migecde imoc ngeneac anudeac ge gembade.

¹³ Bangecnginaac wiac nenea sasawa warac warac erema kpaueu kebuaru mehagecde imoc ngeneac anude. Ammanu ngicngac tembuc tembuc sasawa amaarengnginau Kebuac hehenu kongaha kecdae, yeni imoc naric nebisia.

¹⁴ Nga Isracel yeneac botucfu wiac sasawa neac anudeac desi desia imoc geac andarude.

Warac fingec fingera

¹⁵ Nga ngic nga yang tembuc tembuc sasawa kekecnginagoc nenggac heremanaunac warac fingec fingera kebuaru mehagecde, imoc geac andarude. Nga ngic warac fingecgec yeneac turungngina kpoubesena. Amma yangfocngina Kebuac hehenu wonongnginagoc andae, yeneac manau warac fingecgec yeneac turungngina ifingoc kpoubesena.

¹⁶ Imoc yeni afongina mocgu anude, imohai turungngina kpoubesena nga imocac bumaac kpetea imoc silwa dzo marimong, ifi dedea fede. Imoc kpetiac amaac shekelkpete ebihaac sirihau amma imocac ebiha imoc gerakpete twentiacsoc ande.

Lewiareng yeneac hendzic hendzira

¹⁷ Nga burumaka me rama me noning warac warac fingec fingera yeneac turunga mi kpoubesena. Imoc wiac kpetiac andae imocac sacngina aratau kpegina. Kpegima seseac kerec gerecsese dema hafoangoc ohosisingaima hosuc heina homuna gombunga fiu Kebungo imoc homunggema negenude.

¹⁸ Anu fusia sasawa imoc geac anude. Nga mondaha sawau miacma fendzonggegec nga tabuya foiaubigeng imoc ngeneac anude.

¹⁹ Nga Isracelngicngac yeni wiac sasawa Kebuac sese kpetiac dema faigecde imoc ge nga naroangmedacfocga ngeni ngemmeduae. Imoc desiba nasoya nasoya ngeneac wiac anude. Dzadzahac kondungagoc imocngo Kebu neac kicfu gearu nga geac fingecsahegau fefeseri feengkecbesande.”

²⁰ Anu Kebungo torokpema Aharon yoac yofi edeec, “Ge yeneac bangecfu bangecgagoc mi annade nga bangec noboha mong mi hendzicma genggecde. Nga Isracelngicngac yeneac botucnginau neng geac wiac hendzic hendzira nganoc amma kecbade.

²¹ Amma Isracel yeni sese sasawa tennunac mocgu faigecde imoc Lewiac fingecsahe yeneac hendzic hendzira anudeac yemmeduae. Wiac imocngo yeni Kebugoc ewacemeemeac kporucamaac uaya mekecdae, uangina imocac uabung ambeso.

²² Nga Isracelngicngac yenearunac mongngo Kebugoc ewacemeemeac kporucamaac wegenahau mi hayombonggebisia. Imoc yofiac, hagecdeu yeni kopocsicngina imoc tofohoma homegecde.

²³ Imocac amma Lewingic yenennoc Kebugoc ewacemeemeac kporucamaac ua mebisia amma faka mangana goa megecdeu, yeni yenaocngoc ebic imoc tofohobisia. Singseria imocngo fingecsahengina feengkefudesoc yenearu fefeseri fekecbeso. Anu yeni Isracelngicngac yeneac botucfu kecma bangec hedzic hendzira mong mi megecde.

²⁴ Imoc yofiac, Isracelngicngac yeni wiac sasawa tennunac mocgu imoc Kebu neac sese nenggec neng Lewingic hendzic hendzira anudeac yemmekecbade. Imocac amma yeneac yofi deai, yeni Isracelngicngac yeneac botucfu kecma bangec hendzic hendzira mong mi mebisia.”

Lewingic Kebuac sese faibisia

²⁵ Anu Kebungo Mose yofi edeec,

²⁶ “Ge Lewingic yofi torokpema edeyununa, ‘Isracelngicngac yeneng wiac tennunac mocgu ni nenggec neng imoc ngemmeba imocngo Lewiac kisicarengfora isracelareng yeneac botucfu hendzi hendzicngina anude. Ngeni imoc mema imohacnac Kebuac sese tennunac mocgu faibisia.

²⁷ Amma sesenginaac negenggec wit seuha meic meickeac amaunac witgbomea isoc nga waingtidzoc tidzoho sokocfunac fora hafoangoc imoc isoc ambeso.

²⁸ Amma ngeni imocac siricfu ifingoc wiac sasawa imohacnac tennunac mocgu Kebu sese migecde, imoc Isracelngicngac yenearunac mema imohacnac wiac tennunac mocgu mema Kebuac sese imoc womonggareng Aharon mibisia.

²⁹ Wiac sasawa ngemmegecde, imohacnac sesengina gombunga yombong nga kpetiac ande imoc ngeneac sese dema Kebuac wiac andeac ye mibisia.’

³⁰ Imocac yofi edeyunubesena, ‘Ngeni wiacngina imohacnac gombunga yombong migecde wiac imocac negenggec Lewingic yeneac witseuc meic meickea manaunac foraya isoc nga waing tidzoc tidzoho tennunac foraya isoc ambeso.

³¹ Amma imoc ngeneng Kebugoc ewacemeemeac kporucamau ua mekecdaeac uanginaac buma anudeac ge nga amaarengfocga ngeni ihai me ihai nebeso dema naric nebisia.

³² Nga ngeni wiacngina gombunga yombong sesengina kpetiac imohacnac faigecde naso imohai kopocsicnginagoc mi ambisia. Ngeni homebauac Isracelngicngac yeneac sesengina kpetiac seucnginagoc anggecdeac mi ayemmebisia.’ ”