Bangec kisiu 13 - Deduamiti

Kenacanbangec hennegeng anggecdeac kenggec

¹ Kebungo Mose yoac yofi edeec,

² “Ni Kenacanbangec imoc Isracelngicngac yemmebade. Nga ge ngic kisicfocngina twelf yeneac fingecsaheunacsoc ngicenara mocgu mocgu meisingyunuma sueyununa yeni sufu sufu kemma imoc hennegeng anggecdeac kembisia.”

³ Ifi deu Mose ye Kebuacdederecgeyoac modacma Isracelngicngac yeneac kisicfocnginaacsoc enaramemengicfocngina Pacaran bangec kisiunac sueyunuu kenggec.

⁴ Kenggec imoc yeneac kpacngina yofi: Recuwenggac kisicfunac Dzakur medaha Sammua.

⁵ Simeconggac kisicfunac Hori medaha Safat.

⁶ Yehudaac kisicfunac Yefunne medaha Kalew.

⁷ Yissaskarac kisicfunac Yosef medaha Yicgal.

⁸ Efrayimac kisicfunac Nun medaha Hoseac.

⁹ Benyaminggac kisicfunac Rafuc medaha Paleti.

¹⁰ Dzewulunggac kisicfunac Sodi medaha Gaddicel.

¹¹ Yosefac kisicfunac Manasseac kisicfunac Susi medaha Gaddi.

¹² Danggac kisicfunac Gemalli medaha Ammicel.

¹³ Aserac kisicfunac Mikacel medaha Setur.

¹⁴ Naftaliac kisicfunac Wofesi medaha Nahebi.

¹⁵ Amma Gadac kisicfunac Maki medaha Gecucel.

¹⁶ Mosengo ngic imoc sueyunuu yeneng sufu sufuu bangec hennegeng anggecdeac kenggec, yeneac kpacngina ifinoc. Nga ye Nun medaha Hoseac kpara Yehosuac kparec.

Sueyunuec

¹⁷ Anu Mose ye ngic imoc yeni Kenacanbangec sufu sufu hennegeng anggecdeac yoac yofi edeyunuma sueyunuec, “Ngeni Negewbangecfu kemma imoc ferahema sifecbangecfu embisia.

¹⁸ Emma bangec imoc siriha dafia nga ngicngac imohai kecdae yeni kucnginagoc me kucngina kpac amma yeni kpetengina efeanec me homac, imoc hennegeng ambisia.

¹⁹ Nga bangec kecdae, imoc dafia, gombunga me mangana, nga imocac manau kecdae imoc kporucamabangecfu kecdae me odaseriaac manau kecdae.

²⁰ Amma bangec imoc kerehagoc me gueha kpac, nga imohai ickate fede me kpac imoc momoc hendacbisia. Ngeni kengeha kpac kemma bangec imohacnac semenggac fora goa mehabisia.” Wainggbomea hanahema fora anec imocac naso anecac ifi deec.

Kenggec

²¹ Anu yeni emma bangec sufu sufu hennegeng anggecdeac Tsin bangec kisiunac kengkecma Rehow Hamat amabangec wegenahau fekende bangec imoc sufu sufu hennegeng anggec.

²² Nga yeni emma Negewbangecfu sing kemma Heweron imohai sikegec. Imohai Anak fingecsaheunac ahimangngic, sesaingic nga talmaingic kecgec. Anu Heweron taong megec, yeni imoc waraima megec kifa sewen kemmanu aigitangic Aigitabangecfu Tsocan megec.

²³ Nga yeni Eskol tumiau kemma imohacnac waing fawa mong wiragoc herecgema ngic yohockangngo tofohooc amma pommegranat icgbomea imohacnac goa nga fig icgbomea imohacnac goa mema dzigenema hagec.

²⁴ Nga waing fawa wiragoc herecgegec imocac amma isracelngic yeneng bangec imocac kpara Eskolac tumiatoa emu fede, ifi kpacgec.

²⁵ Nga yeni bangec sufu sufu hennegeng amma kecma wenac fotiac wisic wisickeau dzigenema kenggec.

Dzigenegec

²⁶ Kemma Mose nga Aharon amma Isracelac ngichabu hafoangoc Pacaran bangeckisiu Kades amau kecgec yenearu dzigenema hagec. Hama yeri nga ngichabu hafoangoc yoacsiduc ayemmema bangec imocac icgbomea megec imoc edzacyunugec.

²⁷ Edzacyunuma Mose yofi edegec, “Ge suenununec neni bangec imohai kensikeing. Fora yombong, bangec imohai namu nga hanifosoc doku isoc hakecde amma imocac icgbomeaac foraya yomoc.

²⁸ Anu ngicngacareng bangec imohai kecdae yeni kucnginagoc nga taontoangina imoc yeni sasawa kuneng yombong amma odangina seria. Amma imohai Anakac fingecsahe imoc yeni momoc yenening.

²⁹ Amalekareng yeni Negewbangecfu kecdae nga hitingic, yewusingic nga amoringic yeni sifecbangecfu kecdae. Amma kenacangngic yeni ine kondung tegiau nga Yardendokuac tegiau kecdae.”

³⁰ Anu Kalew yeng ngicngacareng yeni kengec wama wosongina makiudeac Moseac kicfu yofi edeyunuec, “Nenang bic yombong emma bangec imoc mebisina. Fora yombong, nenang naric serima imoc menide.”

³¹ Ifi deu ngic yegoc enggec, yeneng ine yofi degec, “Nenang ngicngac imoc naric mi feracyunuma yununide. Nga yeneac kucngo nenang kuc feraheyombonggede.”

³² Yeni ifi dema bangec sufu sufu hennegeng anggec imocac ebicac yoacsiduc hania hania Isracelngicngac yofi ayemmegec, “Bangec sufu sufuu hennegeng annideac ferecgema kening, imocngo ngicngacfora neyunuude. Nga ngicngac sasawa yenening yeni herea nga kucnginagoc.

³³ Nga imohai nefilingic yenenning amma nenang engemma negenni ipua isoc aning. Anu yeneac kicfu neni gisic bisicbisic mong isocnoc aning.”