Bangec kisiu 10 - Deduamiti

Trampet silwango memea

¹ Kebungo Mose yoac yofi edeec,

² “Ge silwa mema hamango heimengere amma trampet yohockang mebesena. Amma dena trampet imoc yereng arohoma ngichabu kpacyunuma kpedzucyunubesera. Anu yeni efaima yacma kporucamangina meickema bangec imoc wama kenggecdeac dena arohobesera.

³ Nga yerahafocngoc yoha yoha arohoecde, naso imohai ngichabu hafoangoc yeni gearu hama Kebugoc ewacemeemeac kporucamaac naguu kpedzucnema nambisia.

⁴ Nga trampet mocgungosac yoha yoha arohoude naso imohai Isracel kisicfunac yeneac ngicenarafocngina sasawa tembuc tembuc yeni gearu hama kpedzucnedacbisia.

⁵ Nga trampet kpedzihereema arohoecde imohai kporucamahabu wenac ere ereaubigeng yeni efaima yacma kporucamangina meickema bangec imoc wama kembisia.

⁶ Anu trampet kpedzihereema arohoec atac yohockang anudeu imohai kporucamahabu sautfubigeng yeni efaima yacma kporucamangina meickema bangec imoc wama kembisia.

⁷ Anu kpebung kpedzucnegecdeac negensidae naso imohai trampet kpedzihereema mi arohobesera. Imohai ine yoha yoha arohobesera.

⁸ Anu womonggareng, imoc Aharon medacfora, yenengsac trampet imoc fifikecbisia. Nga imocac singseria imoc ngeneac fingecsahengina feengkefudesoc ngenearu fefeseri fekecbeso.

⁹ Nga ngabafocngina yeni bangecnginau hama ngenigoc ewebeso anggec ngeni trampet fifigec kedzac kpegecdeac udumeng yombong fingeru dzikacfu kembisia. Ifi anggec Kebu Anutunginango negengngemmema ngabafocngina yenearunac mesingunuude.

¹⁰ Nga sogac sogainginau me nasotoanginau me afo mong monggoc gboria ereude, imohai trampet fifima wama fifima wama, ifi anggec arohobesera. Nga sesegerecngina hafoangoc ohogecde nga ruaeac sese ngenahafoc negecde, imohai ifingoc fifigec arohoec imocngo Anutuac kedzacfu udumeng meficgeu yeng negengngemmeude. Ni KebuAnutungina.”

Sinai tiki wagec

¹¹ Kifa kpete yohockang imocac afo kpete yohockang nga imocac wenac kpete twenti, imohai hoengngo Kebungo wiac heigboringemmekecduaeac kporucwomong wama enec.

¹² Enu Isracelngicngac yeni efaima yacma kporucamangina meickema Sinai bangec kisi wama amabangec heiferecge modacma kengkecmagec hoengngo Pacran bangeckisiu mama heima tarec.

Yehuda yeni waraiyemmegec

¹³ Nga Kebungo Mose dederecge ammiu yeni enara tofohoma naso hanac hanaheau efaima yacma kporucamangina meickema bangec imoc wama kenggec

¹⁴ imohai Yehudaac kisicfora yeneng waraima efaima yacma kporucamangina meickema bangec imoc wama kporucamahabunginaac kpetengina taima tofohogec wasaihabufocnginausoc modacyunuma kendacgec. Naheson, Amminadaw medaha, yeng wasaihabu imocac enara meyemmeec.

¹⁵ Nga Yissaskarac kisicfora yeneac wasaihabuac enarangina imoc Tsucar medaha Netanecel yeng kefec.

¹⁶ Nga Dzewulunggac kisicfora yeneac wasaihabuac enarangina imoc Heron medaha Elicawngo kefec.

¹⁷ Nga kporucwomong mesidacma kpedzucnegec Gereson nga Merari yereac sacarengfocngira yeneng tofohogec.

Recuwen yeni yeneac ngadeau

¹⁸ Nga Recuwenggac kisicfora yeni yeneac ngadeu efaima yacma kporucamangina meickema kporucamahabunginaac kpetengina taima tofohogec imocac bageau kemma bangec imoc wama wasaihabufocnginasoc modacma kendacgec. Imoc Elitsur, Sedecur medaha, yeng enara meyemmeec.

¹⁹ Nga Simeconggac kisicfora yeneac wasaihabuac enarangina imoc Tsurisaddai medaha Selumicelngo kefec.

²⁰ Nga Gadac kisicfora yeneac wasaihabuac enarangina imoc Decucel medaha Elyasafngo kefec.

²¹ Anu yeneac ngadeu Kehatac arengfora yeni ama mana kpetiacac manau wiac kpetiac fekefec imoc tofohoma kenggec. Kengkecmagec kporucwomong mekenggec yeneng waraima imoc kporucamabangec gboriau kpedzigec enuguc Kehatareng yeneng wiacnginagoc hasikegec.

Recuwen ngadeau Efrayim

²² Nga Efrayim kisicfora yeni yeneac ngadenginau kpetengina taima tofohogec efaima kporucamangina meickema mekemma kporucamabangec wama kpetenginaac bageau wasaihabufocnginasoc modacma kendacgec. Ammihud medaha Elisamacngo enara meyemmemanu kenggec.

²³ Nga Manasseac kisicfora yeneac wasaihabuac enarangina imoc Peda-Tsur medaha Gamelicelngo kefec.

²⁴ Nga Benyaminggac kisicfora yeneac wasaihabuac enarangina imoc Gideoni medaha Awidanngo kefec.

Wisic wisickeau Dan

²⁵ Anu wisic wisickeau Dan kisicfora yeni efaima yacma kporucamangina meickema kporucamahabunginaac kpetengina taima tofohoma wasaihabufocnginasoc imoc modacma wama kenggec. Amma yeni kporucamahabu sasawa ngadenginau kemma garengyunugec. Ammisaddai medaha Ahicedzerngo, enara meyemmemanu kenggec.

²⁶ Nga Aserac kisicfora yeneac wasaihabuac enarangina imoc Oheran medaha Pagicelngo kefec.

²⁷ Nga Naftaliac kisicfora yeneac wasaihabuac enarangina imoc Enan medaha Ahiracngo kefec.

²⁸ Isracelngicngac yeni efaima yacma kporucamangina meickema bangec imoc wama kenggec yeni wasaihabufocnginausoc modacyunuma arennu yombong ifi kendacgec.

Mose kpenea Howaw

²⁹ Anu Mose ye yofea Recucel midyangngic, yeac medaha Howaw yofi edeec, “Kebungo neneac yofi deec, ni bangec imoc ngeni ngemmebade, imocac amma neni yaguc efaima yacma kporucamanina meickema bangec yomoc wama bangec imohai kembeso andimbe. Ge nenigoc naric kennade. Neni ge gombunga anggennide. Imoc yofiac, Kebungo Isracelngicngac neni gombunga anemmeudeac deserinemmeec.”

³⁰ Ifi deu yoac yofi meremmiec, “Ni ngenigoc mi kembade. Ni neanna bangecfu nga sactosofocna kecdae yenearu monggoc dzigene kembade.”

³¹ Ifi deu Mosengo yoac yofi meremmiec, “Ge sifu neni mi wanununa. Neni bangeckisiu dahai dahai kporucamanina kpedzini enu guru mema tacyac anni ngereeude, imoc geng negendacnecac ge waraima kicnina amma wangecnunuma kecbesena.

³² Nga ge nenigoc kennadeu ine Kebungo neni imohai wiac gombunga anemmeude, siriha ifiangoc ge anggennide.”

Kebuac tiki wama kenggec

³³ Anu yeni efaima yacma kporucamangina meickema Kebuac tiki wama wenac harebec kengkecgec. Nga Kebuac dzadzahac katapango wenac harebec bangec dahai kecnegenggecdeac tatac mong meficgeyemmeudeac waraiyemmema kenec.

³⁴ Nga yeni efaima yacma kporucamangina meickema kporucamabangec imoc wama kenggec imohai Kebuac hoengngo wenacfu witinginau sawau kengkefec.

³⁵ Anu yeni efaima katapa mekenggecsoc Mosengo yofi dekefec, “O Kebu! Ge yacma ngabafocga yeni fakaga ayemmena singsararang kpebisia. Ge ngadegudae yeni kengec amma kicgaunac worabisia.”

³⁶ Nga katapa faigec tarecsoc imohai yofi dekefec, “O Kebu! Ge Isracelngicngac kisicnina tausenga tausenga nenearu dzigenema habesena.”