Amosi 7 - Deduamiti

Amosingo ipua nga gerecac kpefing kpeec

¹ KebuKpembibiagocngo yofi edzacnuec. Ye ngictauac semeng kpememe anggec nga kpindzingo erefemanu ipua habu kuneng sueyunuudeac me-mengere ayemmeec.

² Ifi amma sueyunuu hama bangecfu wiac tenggingtengging sasawa imoc nedzonggedacgec sobengasac feec. Anu neng yofi deai, “Kebu Kpembibigagoc, ge kopocsicngina wana! Yacakowac esamedacfora yeni kucmama yombongngo dafi meficemegecde?”

³ Ifi deba Kebungo negen negengnga heimeremma yofi deec, “Imoc mi fingerude.”

⁴ Kebu Kpembibiagoc yeng monggoc yofi edzacnuec: Kebu Kpembibiagocngo turung kpoukpouac gerec kparec. Kparu gereckunengngo kondung kemekemea dzegbanggema bangec dzeec.

⁵ Ifi anu ni yofi deai Kebu Kpembibigagoc sambicguduae ifi mi anna, Yacakowac esamedacfora yeni kucmama yombongngo dafi meficemegecde?

⁶ Ifi deba Kebungo negen negengnga heimeremma yofi deec, “Imoc ifingoc mi fingerude.” Kebu Kpembibiagoc yengenaoc ifi dede.

Amosingo kpetememe witicac kpefing kpeec

⁷ Amma monggoc kpefinnu wiac mong edzacnuec: Ni hemba Kebungo ama monggac oda wegenahau nanec. Oda imoc ngic yeneng kpetememe witic aiengbisicagocngo oda dindingac ande me kpac imocac faima hengandae, imocgoc oda megec. Anu Kebungo kpetememe witic bisic aiengngagoc imocnoc menanu henai.

⁸ Namma Kebungo kpesinenec, “Amosi ge nocwiac hennec?” Kpesinenu meremmiai, “Kpetememe witic aiengbisihagoc.” Deba Kebungo yofi deec, “Henna, neng Isracel ngicngacfocna yenearu kpetememe witic imocngo faima kekecngina isinggebade amma monggoc mi onggongngunubade.

⁹ “Amma Itsakac esamedacfora yeni tiki bumau kebu ikoha afeheandae, imoc memanganeyunudacbade nga Isracel yeneac kebu ikohaac kpetiac sobeng deandae, imoc ifingoc memanganedacbade. Anu neng ngaba sueyunuba yeneng hama ngictau Yeroboanggac arengfora wasibeangngo kpebucyunudacgecde.”

Amosi nga Amadzia

¹⁰ Anu Bet-El bangecac womonggareng Amadzia yeng Isracel yeneac ngictau Yeroboanggaru yoac yofi faiu kenec, “Amosi ye Isracel dzongiaunacngo geac kpackunengga memama Isracel ngicngac yeneac heremiacmiac anu geac ngaba anggecdeac andae. Anu ge Amosi wana yei kefudeu, yeac yoacngo hendzicnunuude.

¹¹ Imocac Amosingo KEBUAC enac mema yofi dede; “‘Yeroboangngo wasaibeannu homeude nga Isracel ngicngac yeni fingecsahe bangecngina ihacnac meicyunugec agac witicuau kembisia.’ ”

¹² Anu Amadziango Amosiac deec, “Kpefingdedengic! Kpefingga meickema Yehuda bangecfu dzigenema kenna. Amma ihai profete uagango semeng kirecgegenu.

¹³ Yomoc ngictauac kpetiacsobeng nga eucrerenggac womong, imocac amma ge Bet-Elu monggoc hama profeteyoac mi debesena.”

¹⁴ Anu Amosingo Amadzia turunga yofi meremmiec, “Ni profete mong kpac amma ifingoc profete monggac medac kpahac. Ni ine ramagarengsac nga fig ic garenggeanduae.

¹⁵ Ammanu ni ramahabu yeneac gareng kecbare ine Kebungo ihacnac menuma yofi dema suenuec, ‘Ge Isracel ngicngacfocna yenearu kemma profeteyoac dena.’

¹⁶ Ge Kebuac yoac yomoc negebesena. Amma geng ine yofi denec, “‘Ge Isracel ngicngac yenearu profeteyoac mi debesena nga Itsakac esamedac yenearu yoac mi dekperagibesena.’

¹⁷ Ifiac amma Kebungo yofi dede, ‘Amadzia, geac enenggango taongtaoac singtoangac anude nga naroangfocga nga medacfocga wasaibeangngo yunuhomegecde. Amma bangecga kpetea faima hendzicma medacgecde. Anu geangga ine mikic bangecfu homenade nga forayombong, Isracelngo fingecfingec bangecngina ihacnac meicyunuma agac yombong witicuau meyunu kenggecde.’ ”