Amosi 2 - Deduamiti

Kebungo Mocaw bangecac ngicngac yoacfu faiyunuude

¹ Kebungo monggoc yofi dede, “Mocawngo kopocsic homac meficgema Edom ngictauac sira gerecfu faiu dzema hama anec, imocac amma neng ye mi onggonggebade.

² Anu neng gerec faiba mama Keriot taonggac amagereha seria kpaidarude. Amma dzikactoa fingeru, dzikacac horianggema trampetac udumengtoa meficgegec Mocawngo homeude.

³ Ni Mocawac ngictau nga garengenarafora sasawa memanganeyunuma yengenagoc kpebucyunudacbade.” Kebungo ifi dede.

KEBUNGO Yehuda bangecac ngicngac yoacfu faiyunuude

⁴ Kebungo mongoc yofi dede; “Yehuda yeni kopocsic homac meficgema, esangabofocngina yeneac kebuikohaac sing segesega modacgec. Amma yeni Neac singyoacna kpema dedeserina mi modacgec, imocac mi onggongyunubade.

⁵ Ni Yehudau gerec faiba Yerusalaimgac amagereha seria kpaidarude.”

KEBUNGO Isracel bangecac ngicngac yoacfu faiyunuude

⁶ Kebungo monggoc yofi dede, “Isracel yeni kopocsic homac meficgema silwaac amma ngic dindingac sueyunugec nga hanitabeac amma kpe-kpedadangnga ebicfu faiyunugec. Ifiac amma mi onggongyunubade.

⁷ Ammanu kpedaha kecdae yeni sendunnu tipetangyunuma ngic kucmamaya yeneac yoacngina foraya dedeac busickpekecgec. Nga mangmedac yerahafocngo ngacnaroang mocgu yearungoc kengandape, ifi amma kpetiac kpacna ohoandae.

⁸ Anu tosofocngina yeneac turungngo Isracel yenearu feecac amma yeneac ngakpiherec mema arata sasawaac tegiau tiamema feandae. Amma yenearu monggoc kemma kopocsicac bunggac degec yeni waingdoku yemmegec anutunginaac amau neandae.

⁹ “Ammanu neng waraiyemmema Amoriareng memanganeyunudarai yeneac hereangina imoc sida ic isoc nga kucngina imoc saruc ic isoc. Yeneac forangina wi nga bangec manau godongina imoc memanganedarai.

¹⁰ Ni Amoriareng yeneac bangec ngemmebadeac amma Aigita bangecfunac meicngunuma kifa fotiac manau bangeckisiu waraingemmeai.

¹¹ “Amma Ni nambaracfocngina yenearunac profeteac edekpou ayemmeai nga sebigborifocngina yenearunac Nadziriareng ifingoc edekpou ayemmeai. Isracel ngicngacfocna yoac sasawa deduae, imoc fora me?” Kebungo ifi dekperagide.

¹² “Ammanu ngeni Nadziriareng ayemmegec waingdoku negec nga profete yeneng profeteyoac degecdeac kpae heiyemmegec.

¹³ Imocac ni yaguc keretango wit nga baliac ebihau wiac hedzameande, ifi isoc tidzamengunubade.

¹⁴ Ifi anu gereagoc nedziandaengo naric mi nedzima woragecde nga ngic kucnginagocngo kucngina kpac anude amma wasaingic seria yeneng kekecngina naric mi onggonggegecde.

¹⁵ Anu tebengic yeneng serima naric mi nanggecde nga ngic sing gereagoc tiandae yeneng naric mi woragecde amma becosi kisang-kisangngic yeneng kekecngina naric mi onggonggegecde.

¹⁶ Naso imohai dzikacac enarameme seria yeneng entegeng wama woragecde.” Kebungo ifi dekperagide.