Zʋkpaɩ 9 - A SƐB-SÕW

A bʋɔlʋ a Yã-bãwfʋ na bʋɔlɛ a

¹ A Yã-bãwfʋ maal'ɩ kpule ayopõi, ʋ mɛ n a ʋ yir.

² Ʋ kʋ n a ʋ dʋn, ʋ cɔbr'ɩ a ʋ divɛ̃, ʋ mɔ̃ mɩ̀ cɔbr'ɩ a ʋ bʋ̃-dɩrɩ baarɩ.

³ Ʋ tõ n a ʋ tõ-tõ-bi-pɔwbɛ kɛ́ bɛ cen a tẽ-kpɛ̃ɛ zie ʋl na do zuo a za a zu, tɩ hieri bʋɔlɩ a nɩbɛ à ŋá:

⁴ «Nyɩɩm na bɛ bãw bom a, nyɩ wa ka lowr!» Ʋ ƴãw na bɛ yel à ŋá a bɛlɩ dem na bɛ tɛr a yã a:

⁵ «Nyɩ wa dɩ a ɩ̃ bʋ̃-dɩrɩ, ɛ́ nyũ a divɛ̃ ɩ̃ na cɔbrɩ a!

⁶ Nyɩ bɛr a nyɩ dãbolu ɛ́ nyɩ na vʋʋrɛ na! Nyɩ lo a yã sɔ́r!»

A yã-bãwnɛ nɩ a pɔ̀lʋ sob

⁷ Nɩr na wule pɔ̀lʋ sob a kʋ̃ nyɛ̃ ƴãwfʋ ɛ, ɛ́ nɩr na yere nɩ-faa a na wõ n zʋmɛ.

⁸ Taa yere pɔ̀lʋ sob ɛ, alɛ bɛ ɩ lɛ, ʋ na hɩ̃ɛn fʋ na. Ɛcɛ yere a yã-bãwnɛ, ʋʋ na nɔnɛ fʋ na.

⁹ Wul yã yã-bãwnɛ, ʋʋ na ɩ n yã-bãwnɛ dɔwlɩ. Zanɩ nɩ a nɩ-mɩŋa bom, ɛ́ a ʋ bãwfʋ na dɔwl'a.

¹⁰ A Sore zɔba n'ɩ a yã-bãwfʋ tib zie. À bãw a sob nɛ na ɩ sõw a n'a tɩrɛ a yã.

¹¹ Bʋ̃ʋ n'ʋ vɛ̃, a mãa Yã-bãwfʋ a, ɩ̃ na ɩ n a fʋ bibie a yãwmɛ dɔwlɩ, ɛ́ ɩ a fʋ yome nʋɔr dɔwlɩ.

¹² Fʋ̃ʋ wa ɩ yã-bãwnɛ a, fʋ̃ʋ mɩŋa ƴãw n'a fʋ ɩ a yã-bãwnɛ. Ɛ́ fʋ̃ʋ wa ɩ pɔ̀lʋ sob a, fʋ̃ʋ yõ n'ʋ na bãwnɛ a.

A bʋɔlʋ a Dãbolu na bʋɔlɛ a

¹³ A Dãbolu ɩ na mɛ̃ pɔw na ɩrɛ gɔmɛ a, pɔw na bɛ bãw bom za ɛ́ gem a.

¹⁴ Ʋ zɩ̃ n a ʋ yir dɩ̃dɔr nʋɔr, a tẽ-kpɛ̃ɛ zie ʋl na kɛrɩ gãw a za a zu.

¹⁵ Ʋ be n a be ɛ́ bʋɔlɛ a sɔr-tɔlbɛ na mɩ́ tãa kpaar cere nɩ a.

¹⁶ «Nyɩɩm na bɛ bãw bom a, nyɩ wa ka lowr!» Ʋ yere nɩ a bɛlɩ dem na bɛ tɛr yã a zie à ŋá:

¹⁷ «A kʋ̃ɔ fʋ na zu nyũ a nʋmɛ na, ɛ́ a bʋ̃-dɩrɩ fʋ na sɔwlɩ dɩ a nʋ̃ɔ̀ tɔ!»

¹⁸ Ɛcɛ, a nɩbɛ bɛ ŋa bɛ bãw kɛ́ bɛ lãw nɩ nɩ kũuni ɛ, bɛ bɛ bãw k'aa Dãbolu nɩ-bʋɔlɩ be n a kpɩmɛ tẽw pʋ̃ɔmɩ za ɩ.