Zowɛl 4 - A SƐB-SÕW

A Sore dɩrɛ nɩ nɩ a nɩ-bʋʋr-yoru ƴɛ̀rʋ

¹ A Sore yere na: «A lɛn daar a, ɩ̃ na lɛb'a maalɩ a Zuda nɩ a Zerizalɛm ƴãw, a ŋmɛ̃ mɛ̃ a dãwdãw a.

² Ɩ̃ na bʋɔl'ɩ a nɩ-bʋʋr-yoru ɓã taa, ɛ́ ƴãw bɛ siw a bà-fʋɔla ʋl pʋɔ bɛ na bʋɔlɛ kɛ́: “A Sore dɩrɛ nɩ ƴɛ̀rʋ” a. A be a, ɩ̃ na dɩ n bɛ nɩ ƴɛ̀rʋ, a alɩ bome nɛ za bɛ na ɩ a Ɩsɩrayɛl, a nɩ-bʋʋrɛ bɛ ŋa ɩ̃ na so a ƴãw. Bɛ diw bɛ na yaarɩ a nɩ-bʋʋr-yoru sɔgɔ, ɛ́ de a ɩ̃ tẽw põ taa.

³ Bɛ lɔb'ɩ bie põ taa a ɩ̃ nɩbɛ, bɛ de nɩ dɛbli tɛw nɩ pɔw-yɛmɛ, ɛ́ kʋɔrɩ powli nyũ n divɛ̃.

⁴ Baa zuo a za, a nyɩɩm, Tɩ́ɩ̀r nɩ Sɩdɔ̃ ten i, nɩ nyɩɩm Filisɩtɛ̃ tẽw lowe za a, bʋ̃ʋ n'ʋ nyɩ bɔbr a ɩ̃ zie? San n'ʋ nyɩ bɔbr kɛ́ nyɩ yáa a ɩ̃ zie bɩɩ? San wa n'ʋ nyɩ yáarɛ a ɩ̃ zie a, fɔ̃w fɔ̃wlɛ, ɩ̃ na lɛb'a yáa a san a nyɩ zu.

⁵ Nyɩ de nɩ a ɩ̃ salm-pla nɩ a ɩ̃ salm-zɩɛ, a ɩ̃ na-bʋ̃-vɩɛlɩ vɩɛlɩ, tɩ ƴãw a nyɩ ŋmɩmɛ yie pʋɔ.

⁶ Nyɩ kʋɔr'ɩ a Zuda nɩ a Zerizalɛm nɩbɛ kʋ̀ Gɩrɛkɩ mɩnɛ, kɛ́ bɛ tʋ̃ɔ́ zãá nɩ a bɛ tẽw.

⁷ Ɛcɛ mãa n'ʋ na tɩ tɛr bɛ, a be nyɩ na kʋɔrɩ bɛ a lɛb wa n, ɛ́ yáa a faa nyɩ na maalɩ bɛ a san, a nyɩ zu.

⁸ Ɩ̃ na kʋɔr'ɩ a nyɩ bidɛbr nɩ a nyɩ pɔwyaar kʋ̀ a Zuda tẽw dem, bɛ de bɛ lɛb kʋɔrɩ kʋ̀ Saba tẽw dem, nɩ-bʋʋrɛ na zãá nɩ a ka a. A mãa Sore, à ŋá n'a ɩ̃ yere.»

A zɛbr-pɛ-baara nɩ a ƴɛ̀rʋ-dɩb

⁹ Nyɩ hieri à ŋá a nɩ-bʋʋr-yoru sɔgɔ: «Nyɩ cɔbrɩ a zɛbr, nyɩ ɩ a gãdaar cɩ ƴãw a zɛbr ƴãw, a sojarɩ za, bɛ taw pɩɛlɩ, bɛ do wa.

¹⁰ Nyɩ de a nyɩ ni-kʋ́ɔrɩ kue zuw maal'ɩ zɛbr-sɔ-bɛrɛ, ɛ́ de a nyɩ sɔ̀rʋ maal'ɩ kafine. A bãbàal, ʋ yel: “Gãdaa nɛ m!”

¹¹ Nyɩɩm nɩ-bʋʋrɛ za na viiri koli a, nyɩ paw wa fɔ̃w, nyɩ wa ɓã taa!» Ɛ́ fʋ̃ʋ Sore e, ƴãw a fʋ gãdaar siw a bɛ ƴãw.

¹² A nɩ-bʋʋr-yoru, bɛ yi lo a sɔ́r, a Sore n'ʋ yere, bɛ wa a bà-fʋɔla ʋl pʋɔ bɛ na bʋɔlɛ kɛ́: “A Sore dɩrɛ nɩ a ƴɛ̀rʋ” a, be n'a ɩ̃ na zɩ̃ dɩ n a nɩ-bʋʋrɛ za na viiri koli a, a ƴɛ̀rʋ.

¹³ Nyɩ de a sɔ̀rʋ, a bʋ̃-dieri-deb ta na. Nyɩ wa nɛb bɛ ŋmɛr mɛ̃ divɛ̃ tɩɛ wɔmɛ na paalɩ a nɛbrʋ zie a. A sɩn paal'a cire, a bɛ faalʋ zuo na.

¹⁴ Nɩbɛ na ta nɩbɛ a waar'ɩ a ƴɛ̀rʋ-dɩb bà-fʋɔla pʋɔ! A Sore bibir pɩɛl'a a ƴɛ̀rʋ-dɩb bà-fʋɔla pʋɔ.

¹⁵ A mʋ̃tɔ̃w nɩ a cuw bɛ cãà caalɛ ɩ, a ŋmar-bie bɛ cãà nyɩwrɛ ɩ.

¹⁶ A Sore be n a Sɩyɔ̃ tãw zu tanɛ, a kɔkɔr ŋmɛrɛ na yire a Zerizalɛm, lɛ n'a a salom nɩ a tẽsɔw damnɛ. Ɛcɛ a Sore gùre nɩ a ʋ nɩ-bʋʋrɛ, ʋ ɩ n a Ɩsɩrayɛl nɩbɛ taw-lanʋ zie.

¹⁷ Lɛ n'a a Sore yel bɛ: «Nyɩ na bãw na kɛ́ mãa n'ɩ a Sore nyɩ Naaŋmɩn na kpɩɛr a Sɩyɔ̃ na ɩ a ɩ̃ tã-sõw a. A Zerizalɛm na lɩɛb'ɩ zi-sõw, nɩ-sãanbɛ kʋ̃ lɛb kpɛ ʋ pʋɔ towtow ɛ.»

A yele za lɛb'a ɩ vla a Naaŋmɩn nɩ-bʋʋrɛ zie

¹⁸ A ʋlɩ bibir nɛ a, a tan na yule nɩ divɛ̃-paala, bʋ̀rʋ na gbɔlɛ nɩ a tãli zu, kʋ̃ɔ na zɔrɛ nɩ a Zuda tẽw bàrʋ za pʋɔ, kʋ̃ɔ na bule na yire a Sore Ŋmɩn-yir-kpɛ̃ɛ pʋɔ, ɛ́ de a Akasɩa tɩɩr bà-fʋɔla zɔrɛ.

¹⁹ A Eziptɩ tẽw na sãw nɩ ʋ za, nɩr bɛ cãà kpɩɛr ɛ. A Edɔm tẽw na lɩɛb'ɩ wɛja-kpalɛ, bɛ na ɩ po-to-fãw-ɩb a Zuda tẽw kʋ nɩbɛ na bɛ tɛr sãwna a bɛ tẽw pʋɔ a ƴãw.

²⁰ Ɛcɛ nɩbɛ na kpɩɛr'ɩ a Zuda nɩ a Zerizalɛm ten pʋɔ kʋralɛ.

²¹ Ɩ̃ yel'a kɛ́ bɛ bɛ tɛr sãwna ɩ, ʋ̃ʋ ɩ̃ yel'ɩ lɛ. A mãa Sore, ɩ̃ kpɩɛr'ɩ a Sɩyɔ̃ tẽw pʋɔ.