Zeremi 45 - A SƐB-SÕW

Ƴɛ̀rʋ a Sore na ƴɛ̀r a Barukɩ ƴãw a

¹ A lɛn daar, a Neriya bidɛb, Barukɩ, na tɩ sɛbr a ƴɛ̀rʋ al za a naaŋmɩn-ƴɛ̀r-manɛ Zeremi na tɩ yere kʋ̀rɛ ʋ a, a Zuda tẽw nãà, Yoyakim, na ɩ Zozɩasɩ bidɛb a, naalʋ-dɩb yome anaar sob daar tɩ n'a. Lɛ n'a a Zeremi tɩ yel a Barukɩ:

² «À ŋá n'a a Sore, a Ɩsɩrayɛl Naaŋmɩn, yere a fʋ̃ʋ Barukɩ ƴãw.

³ Fʋ yel'a: “Nyɛ̃ kpɩɛrʋ na páw mɛ̃ a! Mãa n'ɩ ŋan tɩ wone tuo baarɩ, ɛ́ a Sore ɩ a ɩ̃ pʋ̃-sãwna kɛrɛ dɔwlɛ. Ɩ̃ bàl'a nɩ a kon, ɛ́ bɛ nyɛrɛ pɩ̃ɛnʋ ɛ.”

⁴ A lɛ pʋɔ a, nyɛ̃ a lɛ a Sore na ƴãw k'ɩ̃ɩ yel a: “Ɩ̃ darɛ nɩ a alɩ bome nɛ ɩ̃ na mɛ a lɔbr, ɛ́ vɔnɛ a alɩ bome nɛ ɩ̃ na sɛl a bɛrɛ. Ɩ̃ damnɛ nɩ a tẽw za nyawr taa.

⁵ Ɛ́ fʋ̃ʋ bɔbr yel-bɛrɛ fʋ na tɩɛrɛ a maalʋ. Ta cãà tɩɛrɛ a ɩ. Bʋ̃ʋ n'ʋ vɛ̃, a mãa, a Sore, ɩ̃ yere na: Ɩ̃ na ɩ na a kpɩɛrʋ páw bʋ̃-vʋʋra za. Ɛcɛ, bom ŋa n'ʋ ɩ̃ na ɩ fʋ páw: Zie nɛ za fʋ na cere a, fʋ na mɩ́ tɛr'ɩ a nyɔ-vʋʋrʋ.”»