Zeremi 21 - A SƐB-SÕW

A Zeremi kʋ̀ n a nãà Sedesɩasɩ a Sore sɔwfʋ

¹ Nyɛ̃ a ƴɛ̀rʋ a Sore na tɩ ƴɛ̀r kʋ̀ a Zeremi a nãà Sedesɩasɩ ƴãw a. A nãà tɩ tõ n Malkɩa bidɛb, Pasehuur, nɩ Maaseya bidɛb, Sefanɩa, na ɩ bàwr-maalɛ a, a Zeremi zie, kɛ́ bɛ tɩ yel ʋ à ŋá:

² «Yãayãa, sowri a Sore kʋ̀ tɩ, bʋ̃ʋ n'ʋ vɛ̃, a Babɩlɔn tẽw nãà, a Nabikodonozɔɔr, zɛbr'ɩ tɩ na. Kapaw a Sore na lɛb'a maalɩ a ʋ nɔ-ɓãa-yel kãw a tɩ vla ƴãw, ɩ k'ʋ cen zãá nɩ tɩ.»

³ Lɛ n'a a Zeremi tɩ yel bɛ: «Nyɩ nyɛ̃ a lɛ nyɩ na na tɩ yel kʋ̀ a Sedesɩasɩ a:

⁴ À ŋá n'a a Sore, a Ɩsɩrayɛl Naaŋmɩn, yere: “Nyɩ zɛbr'ɩ nɩ a Babɩlɔn tẽw nãà nɩ a ʋ zɛbr-nɩbɛ na piw nyɩ a. Ɛcɛ, ɩ̃ na fɛr'ɩ a bɛlɩ dem na zɛbr a dacĩ-kpɛ̃ɛ niŋé a, bɛ lɛb wa a tẽ-kpɛ̃ɛ pʋɔ.

⁵ A mãa mɩŋa n'ʋ na zɛb'ɩ nyɩ nɩ a ɩ̃ su-tʋlʋ kpãkpã nɩ a ɩ̃ su-faa faa. Ɩ̃ na wul nyɩ nɩ a ɩ̃ fãw nɩ a ɩ̃ kpɛnʋ.

⁶ Ɩ̃ na dɔwr'ɩ a bɛlɩ dem za na kpɩɛr a tẽ-kpɛ̃ɛ ŋa pʋɔ a, a nɩsaalbɛ nɩ a dʋn. Bɛ za na kpi n jɛ̀lmɛ̃ bàal-faa kũu.

⁷ À á ŋá za pùorí a, a Sore n'ʋ yere, ɩ̃ na de nɩ a Zuda tẽw nãà, Sedesɩasɩ, a ʋ tõ-tõ-bi-bɛrɛ nɩ a nɩbɛ na na cãà vʋʋrɛ a tẽ-kpɛ̃ɛ ŋa pʋɔ, bɛ tʋ̃ɔ́ kpi a jɛ̀lmɛ̃ bàalʋ kũu, a zɛbr nɩ a kɔ̃ kũu a, ƴãw a Babɩlɔn tẽw nãà nuru pʋɔ. Ɩ̃ na de bɛ na ƴãw a bɛ dɔ̃ dem nɩ a bɛlɩ dem na tɩ bɔbr a bɛ kʋb a nuru pʋɔ. A Nabikodonozɔɔr na ƴãw na bɛ kʋ kʋ bɛ. Ʋ kʋ̃ tɛr nɩbaal-zɔba ɩ, ʋ kʋ̃ jɩɩrɩ nɩr za bɛr ɛ, ʋ kʋ̃ sàw bɛ ɓaalɩ ʋ ɛ.”»

⁸ Alɛ wa cɛ a nɩ-bʋʋrɛ bɛ ŋa a, fʋ na yel bɛ na: «À ŋá n'a a Sore yere: Ɩ̃ na ƴãw nɩ a nyɔ-vʋʋrʋ nɩ a kũu a nyɩ niŋé.

⁹ Nɩr za wa cãà be a tẽ-kpɛ̃ɛ ŋa pʋɔ a, ʋ na kpi n a zɛbr, a kɔ̃ bɩɩ a jɛ̀lmɛ̃ bàalʋ kũu. Ɛcɛ sob nɛ wa yi de ʋ tʋɔra kʋ̀ a Babɩlɔn tẽw dem na piw nyɩ a, ʋ na vʋʋrɛ na, ʋʋ na nyɛ̃ na k'ʋʋ tɛr'ɩ zu-nʋ̃ɔ̀, ʋ na páw a ʋ nyɔ-vʋʋrʋ a.

¹⁰ A Sore yere na: Ʋ̃ʋ, ɩ̃ na lɩɛb'ɩ a tẽ-kpɛ̃ɛ ƴãw, k'ɩ̃ɩ maal'ʋ faa, ɛ́ ta maal'ʋ vla ɩ. Ʋ na lo n a Babɩlɔn tẽw dem nãà nuru pʋɔ, ʋ nyɩw ʋ bɛr.»

Ƴɛ̀rʋ a nãà yir dem ƴãw

¹¹ Ƴɛ̀rʋ na ƴɛ̀r kʋ̀ a Zuda tẽw nãà yir dem a. Nyɩ bɛrɛ wone a Sore ƴɛ̀rʋ,

¹² Daviir yir nɩbɛ ɛ. À ŋá n'a a Sore yere: Biɓaarɛ za a, nyɩ mɩ́ dɩ a ƴɛ̀rʋ a tu mɩnʋ. Nyɩ mɩ́ faa a sob nɛ bɛ na farɛ a, a sob nɛ na nɛbr ʋ a nuru pʋɔ. Alɛ bɛ ɩ lɛ, a ɩ̃ suur na 'le na mɛ̃ vũu a, ʋ na dɩrɛ na ɛ́ nɩr za kʋ̃ be be kpiir ʋ ɛ, a nyɩ faa nyɩ na maalɩ a zũú.

¹³ A Sore yere na: Mãa nɩ nyɩɩm nɛbɛ ƴɛrɛŋa, nyɩɩm na kpɩɛr a fʋɔla pʋɔ, a pìir zi-pãgala zu a. Bʋ̃ʋ n'ʋ vɛ̃, nyɩ mɩ́ yere na: “Ãa n'ʋ na siw wa zɛb'ɩ tɩ, ãa n'ʋ na kpɛ a tɩ sɔwlʋ ziir?”

¹⁴ A Sore yere na: Ɩ̃ na ɩ nyɩ na mɛ̃ a lɛ a nyɩ ɩ-ɩrɩ na sɛw taa nɩ a. Ɩ̃ na ƴãw nɩ vũu a sɛɛdɩr tɩɩr tuw, ʋ na dɩ n bom za na jil koli ʋ a.