Zã 13 - A SƐB-SÕW

A Yeezu pɛ́w nɩ a ʋ po-tuurbɛ gbɛ́ɛ

¹ A Tɔl-gãw cuw zãa daarɩ́ tɩ n'a. A Yeezu na tɩ bãw kɛ́ a daar ʋl, ʋ na na yi a tẽ-daa ŋa zu lɛb cen a ʋ Sãà zie a, ta na a, ʋ na tɩ nɔ̃w a ʋ nɩbɛ na be a tẽ-daa zu a, ʋ nɔ̃w bɛ na tɩ ɓɩɩlɩ.

² A zaanʋɔra dɩb daar, a Gɛgɛra na tɩ ƴãw a Sɩmʋ̃ bidɛb Zuda Ɩsɩkarɩɔtɩ a tɩɛrʋ k'ʋʋ mɩl a Yeezu nyɔw tɩr a,

³ ɛ́ a Yeezu mɩ̀ tɩ bãw kɛ́ a ʋ Sãà de nɩ bom za ƴãw a ʋ nuru pʋɔ a, k'ʋʋ yi n a Naaŋmɩn zie wa ɛ́ lɛb cere a Naaŋmɩn zie a,

⁴ ʋ tɩ ìr'ɩ a dɩb zie, yaa a ʋ kpar-kpɛ̃ɛ bin, ɛ́ de pɛn sɛ a ʋ sɩɛmɩ́.

⁵ Al pùorí, ʋ de nɩ kʋ̃ɔ cir ƴãw ku-laa pʋɔ, ɛ́ nyɔw a ʋ po-tuurbɛ gbɛ́ɛ pɛwfʋ, ɛ́ tɩ fɩɛlɛ nɩ a pɛn ʋ na sɛ a sɩɛmɩ́ a.

⁶ Ʋ na wa ta a Sɩmʋ̃ Pɩɛr zie a, a Sɩmʋ̃ Pɩɛr yel ʋ na: «Sore e, fʋ̃ʋ na pɛ́w mãa gbɛ́ɛ ɛ?»

⁷ A Yeezu tɩ sɔw ʋ na: «À à ŋá ɩ̃ na ɩrɛ a, fʋ bɛ bãw a pɛr sɛr ɛ, a pùorí fʋ na bãw na.»

⁸ A Pɩɛr lɛb yel ʋ: «Towtow, fʋ bɛ be na pɛ́w a ɩ̃ gbɛ́ɛ ɩ!» A Yeezu yel ʋ: «Mãa bɛ wa pɛ́w a fʋ gbɛ́ɛ a, fʋ kʋ̃ lãw nɩ mɛ̃ ɩ.»

⁹ A Sɩmʋ̃ Pɩɛr yel ʋ: «Alɛ wa ŋmɛ̃ lɛ a, Sore e, ta pɛ́w a ɩ̃ gbɛ́ɛ tɛwr ɛ, pɛ́w lãwnɩ a ɩ̃ nuru nɩ a ɩ̃ zu za!»

¹⁰ A Yeezu yel kʋ̀ ʋ: «Nɩr na so kʋ̃ɔ yi a, gbɛ́ɛ pɛwfʋ tɛwr'a cɛ ʋ, ʋ vɩɛl'ɩ ʋ za baarɩ. A nyɩɩm a, nyɩ vɩɛl'a, ɛcɛ nyɩ za bɛ n'a ɩ.»

¹¹ Ʋ tɩ bãw nɩ a ʋlɩ sob nɛ na na mɩl ʋ a, alɛ so ʋ tɩ yel: «Nyɩ za bɛ nɛbɛ vɩɛl ɛ.»

¹² Ʋ na wa pɛ́w bɛ a gbɛ́ɛ baar'a, ʋ de nɩ a ʋ kpar-kpɛ̃ɛ su, lɛb zɩ̃ nɩ a dɩb zie, ɛ́ yel bɛ: «À à ŋá ɩ̃ na ɩ a nyɩ zie a, nyɩ bãw nɩ a pɛr bɩɩ?

¹³ Mɛ̃ nyɩ taa bʋɔlɛ mɛ̃ Wul-wul-kara nɩ Sore: yel-mɩŋa n'a nyɩ mɩ́ yel: ɩ̃ ɩ ʋ nɩ sɩza.

¹⁴ A na ɩ lɛ a, a mãa na ɩ a nyɩ Wul-wul-kara nɩ a nyɩ Sore, ɛ́ wa pɛ́w a nyɩ gbɛ́ɛ a, a nyɩɩm mɩ̀, a fɛrɛ nyɩ na kɛ́ nyɩ mɩ̀ pɛ́wr taa gbɛ́ɛ.

¹⁵ Ɩ̃ ɩ na wul nyɩ, kɛ́ nyɩ mɩ̀ tʋ̃ɔ́ ɩrɛ mɛ̃ a lɛ ɩ̃ na ɩ a nyɩ zie a.

¹⁶ Yel-mɩŋa sɩza sɩza n'a ɩ̃ yere kʋ̀rɛ nyɩ: tõ-tõ-bie bɛ zuore a ʋ nɩ-kpɛ̃ɛ ɩ, ɛ́ nɩr bɛ na tõ a, bɛ zuore a ʋlɩ sob nɛ na tõ ʋ a ɩ.

¹⁷ Nyɩ na bãw à à ŋá a, zu-nʋ̃ɔ̀ dem n'ɩ nyɩ nyɩmɛ wa tuur a.

¹⁸ Nyɩ za ƴãw bɛ n'a ɩ̃ ƴɛ̀rɛ ɩ. Ɩ̃ bãw nɩ a bɛlɩ dem ɩ̃ na kaa ír a. Ɛcɛ a fɛr'a kɛ́ a Sɛb-sõw ƴɛ̀r-bie á ŋá tu: “A sob nɛ na tɩ lãwnɩ mɛ̃ dɩrɛ a, lɩɛb'ɩ a ɩ̃ dɔ̃ sob.”

¹⁹ Ɩ̃ de nɩ niwn yere a yel ŋa kʋ̀rɛ nyɩ a ƴɛrɛŋa ʋʋ bɛ ta sɛr ɛ, kɛ́ a lɛn daar ʋ nãá wa ta a, nyɩɩm sàw de k'ɩ̃ɩ “ɩ n a sob nɛ ɩ̃ na ɩ a.”

²⁰ Yel-mɩŋa sɩza sɩza n'a ɩ̃ yere kʋ̀rɛ nyɩ, nɩr na sàwr dier a sob nɛ ɩ̃ na tõ a, mãa tɔr za n'ʋ ʋ sàwr dier, ɛ́ nɩr na dier mɛ̃ a, ʋ mɩ̀ sàw na dier a sob nɛ na tõ m a.»

A Yeezu yel'a kɛ́ a Zuda na mɩl ʋ na nyɔw tɩr

²¹ A Yeezu na wa ƴɛ̀r à à ŋá baar'a, a ʋ tɩɛrʋ dam ʋ nɩ yaga za, ʋ ƴɛ̀r a ʋ pʋɔ ƴɛ̀rʋ à ŋá: «Yel-mɩŋa sɩza sɩza, ɩ̃ yere na kʋ̀rɛ nyɩ, a nyɩ ƴen sob na mɩl mɛ̃ na nyɔw tɩr.»

²² A po-tuurbɛ na bɛ tɩ bãw sob nɛ a Yeezu na yere a, bɛ tɩ jɩ́rɛ nɩ taa.

²³ A po-tuure ƴen sob, a ʋl a Yeezu na tɩ nɔnɛ a, tɩ zɩ̃ na kɔw a Yeezu.

²⁴ Sɩmʋ̃ Pɩɛr tɩ kabr'a yel ʋ: «Sowri kaa a sob nɛ ʋ na yere a.»

²⁵ Lɛ n'a a po-tuure ʋl tɩ cɩɩlɩ cen a Yeezu nyãa ƴãw ɛ́ sowr'ʋ: «Sore e, ãa n'ʋ?»

²⁶ A Yeezu tɩ sɔw na: «A sob nɛ ɩ̃ na na tõ a dipɛ̃ a laa pʋɔ ɛ́ ír kʋ̀ a, ʋlɛ n'ʋ.» Ʋ tɩ de nɩ a dipɛ̃ ʋ na tõ a laa pʋɔ a kʋ̀ a Sɩmʋ̃ bidɛb Zuda Ɩsɩkarɩɔtɩ.

²⁷ A pɛr nɛ pʋɔ a Yeezu na kʋ̀ ʋ a dipɛ̃ a n'a a Sɩtaana kpɛ a Zuda pʋɔ. A lɛ n'a a Yeezu tɩ yel ʋ: «A ton ʋl a na fɛr kɛ́ fʋ tõ a, tõ ʋ fɔ̃w.»

²⁸ A bɛlɩ dem za na tɩ be a be a, been kãw za bɛ tɩ bãw bʋ̃ʋ ƴãw n'a a Yeezu yel a lɛ a ɩ.

²⁹ A Zuda na n'ʋ tɩ tɛr a wɛr-wʋɔ a, bɛ mɩnɛ tɩ manɛ kɛ́ a Yeezu yel ʋ na k'ʋʋ da a bome al za na sɛw a cuw ƴãw a, bɩɩ k'ʋʋ kʋ̀ bom kãw a nan dem.

³⁰ A Zuda na tɩ de a dipɛ̃ 'wɔb a, ʋ tɩ ìr'a yi daadaalɛ: zie tɩ sɔb'a.

A Yeezu tɩr'ɩ Naaŋmɩn nɔ-paala

³¹ A Zuda na wa yi baar'a, a Yeezu yel'a: «Ƴɛrɛŋa a, a Nɩsaal Bie pãa nyɛ̃ nɩ yúor-vɩɛlʋ-danʋ, ɛ́ Naaŋmɩn nyɛ̃ yúor-vɩɛlʋ-danʋ a ʋ pʋɔ.

³² [Ɛ́ a Naaŋmɩn yúor-vɩɛlʋ-danʋ wa sãá a ʋ zie a], a Naaŋmɩn na kʋ̀ ʋ nɩ a ʋl mɩŋa yúor-vɩɛlʋ-danʋ, ʋʋ kʋ̃ yaa kɛ́ kʋ̀ ʋ ɛ.

³³ Ɩ̃ bibiir i, ɩ̃ cãà na be a nyɩ zie, ɛcɛ blãlɛ tɛwr ƴãw n'a. Nyɩ na bɔ m'a, ɛcɛ mɛ̃ a lɛ ɩ̃ na yel kʋ̀ a Zifʋ mɩnɛ a, ɩ̃ mɩ̀ yere na kʋ̀rɛ nyɩ a ƴɛrɛŋa: a be ɩ̃ na cere a, nyɩ kʋ̃ tʋ̃ɔ́ wa ɩ.

³⁴ Ɩ̃ ƴãwnɛ nɩ nɔ-paala kʋ̀rɛ nyɩ: nyɩ nɔnɛ taa. Mɛ̃ a lɛ ɩ̃ na nɔ̃w nyɩ a, a nyɩɩm mɩ̀, nyɩ nɔnɛ taa.

³⁵ Ʋlɩ bom nɛ na na wul a nɩbɛ za kɛ́ nyɩ ɩ n a ɩ̃ po-tuurbɛ a, ʋlɛ n'ɩ a nɔ̃wfʋ nyɩ na na nɔnɛ taa a.»

A Yeezu yel'a kɛ́ a Pɩɛr na ciir'a k'ʋʋ bɛ bãw ʋ ɛ

³⁶ Sɩmʋ̃ Pɩɛr tɩ sowr'ʋ na: «Sore e, nyɩnɛ n'a fʋ cere?» A Yeezu tɩ sɔw na: «Fʋ kʋ̃ tʋ̃ɔ́ tu m a ƴɛrɛŋa cen a be ɩ̃ na cere a ɩ. Ɛcɛ a pùorí a, fʋ na tu mɛ̃ na.»

³⁷ A Pɩɛr tɩ sowr'ʋ na: «Sore e, bʋ̃ʋ n'ʋ so ɩ̃ kʋ̃ tʋ̃ɔ́ tu b a ƴɛrɛŋa? Ɩ̃ na de nɩ a ɩ̃ nyɔ-vʋʋrʋ tɩr a fʋ ƴãw!»

³⁸ A Yeezu tɩ yel ʋ na: «Fʋ na de nɩ a fʋ nyɔ-vʋʋrʋ tɩr a ɩ̃ ƴãw yaa? Yel-mɩŋa sɩza sɩza, ɩ̃ yere na kʋ̀rɛ fʋ, nʋra kʋ̃ kõ sɛr ɛ, ɛ́ fʋ na ciir'ɩ gb'a ata kɛ́ fʋ bɛ bãw mɛ̃ ɩ.»