Yã-bãwfʋ 2 - A SƐB-SÕW

¹ Bɛ mɩ́ tɛr'ɩ tɩɛr-ziri a lɛn daar bɛ na mɩ́ wa yere à ŋá kʋ̀rɛ taa a: «A tɩ nyɔ-vʋʋrʋ ɩ n ŋmãalɛ, ɛ́ ɩ pʋ-sãwna tɛwr. A kũu bɛ tɛr tɩ̃ɩ ɛ, ɛ́ tɩ bɛ bãw nɩr ʋ yi a kpɩmɛ tẽw lɛb wa ɩ.

² Bɛ ur'a dɔw tɩ, ɛ́ a tɩ nyɔ-vʋʋrʋ pùorí a, a na ɩ na mɛ̃ tɩ bɛ dãw be a. A tɩ nyɔbɔwɛ pɩɛlʋ ɩ n zʋ̀ʋ́r tɛwr. A tɩ tɩɛrʋ ɩ n vũu-zɛle a tɩ socir na tʋɔr ger ger a na mɩ́ ɩ ʋ 'le a:

³ ʋlɛ wa kpiiri a, a ƴã-gan mɩ́ lɩɛb'ɩ tãpɛlʋ, ɛ́ a vʋʋrʋ bɔr mɛ̃ a pɩɛlʋ bɛ na kʋ̃ tʋ̃ɔ́ nyɔw a.

⁴ A na kɔwr'ɩ blãlɛ, ɛ́ bɛ yiiri a tɩ yúor bɛr, ɛ́ nɩr za kʋ̃ cãà bãwnɩ a alɩ bome nɛ tɩ na ɩ a ɩ. A tɩ nyɔ-vʋʋrʋ na tɔl'a mɛ̃ zũzuwr a, ɛ́ bɛ bɛr bãwfʋ ɛ. Ʋ na bɔr'a mɛ̃ ulu mʋ̃tɔ̃w gbɛ́ɛ na diw, ɛ́ a ʋ tʋlʋ ɩ ʋ bɔr a.

⁵ A tɩ nyɔ-vʋʋrʋ daar ŋmɛ̃ na mɛ̃ ɓaarʋ na lɩɛbɛ a, ɛ́ a tɩ baarʋ bɛ tɛr lɩɛb-bɛrʋ ɛ, bʋ̃ʋ n'ʋ vɛ̃, bɛ ƴãw ʋ na bɛr a nʋɔr kʋ, ɛ́ nɩr za kʋ̃ tʋ̃ɔ́ lɛb pùorí ɛ.»

⁶ «Alɛ wa ŋmɛ̃ à ŋá a, nyɩɩm wa tɩ wone nʋ̃ɔ̀ nɩ a bʋ̃-vɩɛlɩ á ŋá! Tɩ ƴãw fãw wone nʋ̃ɔ̀ nɩ bʋ̃-íra za, mɛ̃ a tɩ pɔ̀lʋ daar a.

⁷ Tɩ nyúur a divɛ̃-nʋʋr nʋʋr, tɩ fõwne a parfɛ̃ al na bɛ nyɛrɛ a, tɩ taa vɛnɛ a sɩ̃ɛ-kpɛ-paala tɩ-puuru ŋmab ɛ.

⁸ A va-puuru al bɛ na bʋɔlɛ a oroozʋ a, tɩ maal'ɩ a nãà kpawʋʋr vɔblɩ, ɛ́ a bãw vàr.

⁹ A tɩ kãw za taa gúure a tɩ yãya-ɩb cuwr á ŋá ɩ, tɩ bɛr a tɩ nʋ̃ɔ̀ bãwfʋ a sãá a ziir za. Bʋ̃ʋ n'ʋ vɛ̃, tɩ tɛr'ɩ sɔ́r a lɛ ƴãw, a tɩ dem'ɩ a lɛ bɛ na bin gùre nɩ tɩ a!»

¹⁰ «Tɩ dɔwrɛ a nan dem na saa ɩ nɩ-mɩn a, tɩ ta zɔrɛ a pɔw-kɔbɛ nɩbaalʋ ɛ, ɛ́ ta ƴãwnɛ a dɛb-nyãa-zukɔbr-pɛlɛ ɩ.

¹¹ Tɩɩm zie a, a fãw n'a na wul a yel-mɩŋa sob, bʋ̃ʋ n'ʋ vɛ̃, a bãbàalʋ bɛ tɛr yel-ɩra ɩ.

¹² Tɩ ƴãw bɛrɩ a nɩ-mɩŋa: ʋ bɛ sàwr tɩ na wõ nʋ̃ɔ̀ ɩ, ʋ bɛ sàwr a tɩ ɩ-ɩrɩ ɛ, ɛ́ yere tɩ tɩ na bɛ tuur a wulu a, ɛ́ yere kɛ́ tɩ sãw na, tɩ na bɛ tuur a wulu bɛ na kʋ̀ tɩ a.

¹³ Ʋ yel'a k'ʋʋ bãw nɩ a Naaŋmɩn, ɛ́ bʋɔlɛ ʋ tʋɔra Sore bie.

¹⁴ Ʋ lɩɛb'ɩ yelu na yere tɩ kʋralɛ a lɛ tɩ na tɩɛrɛ a ƴãw. A ʋ nyɛ́b tɛwr mɩ́ wone tɩ na.

¹⁵ Bʋ̃ʋ n'ʋ vɛ̃, ʋ bɛ vʋʋrɛ mɛ̃ a nɩbɛ za a ɩ, a ʋ cenu ɩ n a tʋɔra.

¹⁶ Ʋl zie a, tɩ bɛ zuo libi-fofor ɛ. Ʋ dɛrɛ tɩ na mɛ̃ sagɛ na gbõ a. Ʋ yere na kɛ́ nʋ̃ɔ̀ n'a gùre a nɩ-mɩn a baarʋ daar, ɛ́ pɔrɛ kɛ́ Naaŋmɩn n'ɩ a ʋ sãà.

¹⁷ Ɛcɛ tɩ bɛl nyɛ̃, a ʋ ƴɛ̀rʋ ɩ n sɩza bɩɩ. Tɩ ɩ ʋ nyɛ̃ a lɛ a ʋ nyɔ-vʋʋrʋ na na baar'a.

¹⁸ A nɩ-mɩŋa wa sɩrɩ ɩ Naaŋmɩn bie a, a Naaŋmɩn na wa na wa sõw ʋ, ɛ́ faa ʋ a ʋ dɔ̃ dem nuru pʋɔ.

¹⁹ Tɩ tʋ tʋ ʋ ɛ́ dɔwr'ʋ, ɩ ʋ kaa: lɛ n'a tɩ na bãw ʋ na bɛ damnɛ a, ɛ́ nyɛ̃ a lɛ ʋ na mɩ́ nyɔw ʋ tʋɔra a.

²⁰ Tɩ ƴãw ʋ ʋ kpi vĩ-kũu, mɛ̃ ʋ taa yel kɛ́ Naaŋmɩn na ɩ n ɩb kãw a ʋ ƴãw!»

²¹ À ŋá n'a a nɩbɛ bɛ ŋa mɩ́ tɩ́ɛrɛ. Ɛcɛ bɛ tule nɩ bɛ tʋɔra, bʋ̃ʋ n'ʋ vɛ̃, a bɛ ɩ-faar zɔ̃w bɛ na bɛr.

²² Bɛ bɛ bãw a Naaŋmɩn pʋ-tɩɛr-sɔwlɩ ɛ. Bɛ bɛ tɩɛrɛ kɛ́ nyɔ-vʋʋr-vla tɛr'ɩ maalʋ ɛ, bɛ bɛ sàw a ƴãwfʋ na gùre a bɛlɩ dem na bɛ tɛr sãwna a ɩ.

²³ Zɩ̃ k'aa Naaŋmɩn ír'ɩ a nɩsaalbɛ kɛ́ bɛ taa kpiir ɛ, ʋ ɩ na bɛ ŋmɛ̃ taa nɩ a ʋl mɩŋa.

²⁴ A sɩtaana nyuur'a so a kũu kpɛ a tẽ-daa, ɛ́ a bɛlɩ dem na tu ʋ a kpiir.