Wulu-ayi-sob 9 - A SƐB-SÕW

A Ɩsɩrayɛl nɩbɛ bɛ sa a nɩ-bʋʋr-yoru ɛ

¹ Ɩsɩrayɛl nɩbɛ ɛ, nyɩ wone! Nyɩ kʋ̃ yaa kɛ́ lo gãw a Zurdɛ̃ man ɛ. Nyɩ na diw nɩ nɩ-bʋʋrɛ na yãwmɛ zuo nyɩ ɛ́ kpɛmɛ zuo nyɩ a. Nyɩ na de nɩ a bɛ tẽ-bɛrɛ bɛrɛ bɛ na mɛ dacine na do tɩ tɔ salom a, piw nɩ a.

² Ɛ́ baa zuo a za, nyɩ na diw nɩ a Anakɩ bʋʋrɛ, nɩbɛ na kpɛmɛ kpɛmɛ ɛ́ kɛrɩ a. Nyɩ bãwnɩ a na, ɛ́ wone bɛ yere a bɛ ƴãw à ŋá: «Ãa n'ʋ na sàw àr a Anakɩ bʋʋrɛ niŋé?»

³ Nyɩ kʋ̃ yaa kɛ́ nyɛ̃ bãw k'aa Sore nyɩ Naaŋmɩn de nyɩ nɩ niwn, mɛ̃ vũu na dɩrɛ bom za a. Ʋ na kʋ bɛ na pàw pɛr, ʋ na ŋmɛ ŋmɛ bɛ na lɔb a nyɩ niŋé. Nyɩ na diw bɛ na, ɛ́ ɩ bɛ baarɩ fɔ̃w fɔ̃wlɛ, mɛ̃ a lɛ a Sore na yel kʋ̀ nyɩ a.

⁴ A Sore nyɩ Naaŋmɩn wa diw bɛ bɛr a nyɩ niŋé baar'a, nyɩ taa wa tɩɛrɛ à ŋá ɩ: «A Sore ɩ na tɩ so a tẽw ŋa, tɩ na ɩ nɩ-mɩn a ƴãw.» Alɛ ɩrɛ mɛ̃ bom'ʋ a, a nɩ-bʋʋrɛ bɛ ŋa ɩb na bɛ vɩɛl a n'a so a Sore na diw bɛ a nyɩ niŋé,

⁵ ɛ́ nyɩ tʋ̃ɔ́ de a bɛ tẽw. Nyɩ na ɩ nɩ-mɩn a bɛ n'a ɩ, bɩɩ a nyɩ tɩɛrʋ na vɩɛl a ƴãw bɛ n'a ɩ. A Sore na diw nɩ a nɩ-bʋʋrɛ bɛ ŋa, a bɛ ɩb na bɛ vɩɛl a ƴãw, nɩ a lɛ ʋ na pɔ yel kʋ̀ a nyɩ sãàkʋm-kore Abraham, Ɩzaakɩ nɩ Zakɔb a, tub ƴãw.

⁶ A na ɩ à ŋá a, nyɩ bãwnɩ a, a Sore nyɩ Naaŋmɩn wa kʋ̀rɛ nyɩ a tẽ-vla ŋa kɛ́ nyɩ so a, nyɩ na ɩ nɩ-mɩn a ƴãw bɛ n'a ɩ. Bʋ̃ʋ n'ʋ vɛ̃, nɩ-bʋʋrɛ a zuru na kpɛmɛ a n'ɩ nyɩ.

A salm-zɩɛ nále: a Naaŋmɩn nɩ-bʋʋrɛ sãwna

⁷ Nyɩ cãà bãwnɩ a, ɛ́ taa yiire nyɩ na ɩ a Sore nyɩ Naaŋmɩn nyɛ̃ suur a wɛja-kpalɛ pʋɔ a ɩ. A ʋlɩ bibir nyɩ na dɛ yi a Eziptɩ, ɛ́ gù nyɩ wa tɩ ta a ka a, nyɩ ɩ n bɛ-wõ-ɩb a Sore zie.

⁸ Nyɩ dam'ɩ a Sore suur a Orɛb tãgɛ̃́, ʋ nyɛ̃ suur tɩ bɔbr k'ʋʋ kʋ nyɩ pàw pɛr.

⁹ Ɩ̃ tɩ do n a tãw zu k'ɩ̃ɩ tɩ de a kʋsɛ-pamɛ, a wõ-taa a Sore na maal'ɩ nyɩ a kʋsɛ-pamɛ. Ɩ̃ tɩ maal'ɩ bibie lɩz'a ayi nɩ tɩ̃ɩsɔwr lɩz'a ayi a tãw zu, bɛ dɩ bom, bɛ nyũ bom ɛ.

¹⁰ A Sore tɩ kʋ̀ m'ɩ a kʋsɛ-pamɛ ayi al zu ʋ na sɛb a nɛ-ƴãwnɩ za ƴãw, nɩ a ʋ nũu a. Vũu sɔwlɩsɔw n'a ʋ tɩ be ɛ́ kʋ̀ nyɩ a nɛ-ƴãwnɩ á ŋá, a ʋlɩ bibir nɛ nyɩ na tɩ ɓã taa nyɩ za a tãw sɩɛ ƴãw a.

¹¹ A bibie lɩz'a ayi nɩ a tɩ̃ɩsɔwr lɩz'a ayi á ŋá pùorí n'a a Sore tɩ kʋ̀ m a kʋsɛ-pamɛ ayi, a wõ-taa kʋsɛ-pamɛ.

¹² Lɛ n'a ʋ tɩ yel mɛ̃ à ŋá: «Ìr a ka lɛb siw ƴɛrɛŋa. Bʋ̃ʋ n'ʋ vɛ̃, a nɩbɛ fʋ na ɩ bɛ yi a Eziptɩ a, bɛ sãw nɩ faa faa. Bɛ bɛr'ɩ a sɔ́r ɩ̃ na tɩ wul bɛ a fɔ̃wlɛ, ɛ́ nyɩl kure maal'ɩ tɩɩb tɛr.»

¹³ Al pùorí, a Sore yel ƴãw pʋɔ: «Ɩ̃ nyɛ̃ a na, zu-kpɛn dem n'ɩ a nɩ-bʋʋrɛ bɛ ŋa.

¹⁴ Bɛr mɛ̃ ɩ̃ kʋ bɛ pàw pɛr, ɛ́ ɩ a bɛ yúor ʋ bɔr a tẽw zu. Al pùorí, ɩ̃ na ɩ na nɩ-bʋʋrɛ na kpɛmɛ zuo bɛ ɛ́ yãwmɛ zuo bɛ a yi a fʋ pʋɔ.»

¹⁵ Ɩ̃ tɩ lɛb'a siw a tãw na tɩ nyɔw vũu ʋ za a, ɛ́ tɛr a wõ-taa kʋsɛ-pamɛ ayi nɩ a nuru a za ayi.

¹⁶ Ɩ̃ tɩ sɩrɩ na nyɛ̃ nyɩ na maalɩ yel-bier sãw a Sore nyɩ Naaŋmɩn a: nyɩ tɩ nyɩl'ɩ kure maal'ɩ nále. Nyɩ tɩ bɛr'ɩ a sɔ́r a Sore na wul nyɩ a fɔ̃wlɛ.

¹⁷ Lɛ n'a ɩ̃ tɩ nyɔw a kʋsɛ-pamɛ ayi nɩ a ɩ̃ nuru ayi, zɛw lɔb kar a nyɩ mimirí.

A salm-zɩɛ nále: a Moyiir lɔ̃lʋɔrʋ

¹⁸ Al pùorí, ɩ̃ lo gbĩ dume a Sore niŋé, lɛb be a be bibie lɩz'a ayi nɩ tɩ̃ɩsɔwr lɩz'a ayi, bɛ dɩ bom, bɛ nyũ bom ɛ, a nyɩ yel-bebe za ƴãw. Nyɩ tɩ ɩ n a lɛ na bɛ vɩɛl a, a Sore zie, ɛ́ ɩ k'ʋ nyɛ̃ suur yaga za.

¹⁹ Ɩ̃ tɩ zɔrɛ nɩ a Sore suur ʋ na nyɛ̃ nɩ nyɩ a, suur na bɛ tɩ vɩɛl towtow ʋ tɩ bɔbr k'ʋʋ kʋ nyɩ pàw pɛr a. Ɛcɛ a Sore tɩ cãà na lɛb wõ a ɩ̃ puoru a lɛn daar.

²⁰ A Sore mɩ̀ tɩ nyɛ̃ nɩ nɩ a Aarɔ̃ suur yaga tɩ bɔbr a ʋ kʋb. Ɛcɛ ɩ̃ mɩ̀ tɩ puor'a kʋ̀ ʋ a ʋlɩ bibir nɛ.

²¹ Ɩ̃ tɩ ɓáw nɩ a nále nyɩ na tɩ maalɩ a, a nyɩ yel-bier bom, lɔb ƴãw vũumí. Al pùorí, ɩ̃ ŋmɛ ŋmɛ ʋ ŋmɛr, ƴɛ́r ʋ bàalɛ ɩ̃ lɔb ƴãw a fʋɔla na yi a tãw zu siwr a pʋɔ.

²² Nyɩ mɩ̀ tɩ dam'ɩ a Sore suur Tavera, Masa, nɩ Kɩvʋrɔtɩ-Hataava.

²³ A Kadɛsɩ-Barneya a, a Sore tɩ tõ nyɩ na, yel à ŋá: «Nyɩ cen tɩ de a tẽw ɩ̃ na kʋ̀rɛ nyɩ a.» Ɛcɛ nyɩ bɛ tɩ sàw a Sore nyɩ Naaŋmɩn nʋɔr ɛ. Nyɩ bɛ tɩ ƴãw a nyɩ tɩ́ɛrʋ a ʋ ƴãw ɛ, ɛ́ bɛ bɛr wõ a ʋ ƴɛ̀rʋ ɛ.

²⁴ Ɩ̃ na dɛ bãw nyɩ a ʋlɩ bibir nɛ a n'a nyɩ ɩrɛ a bɛ-wõ-ɩb a Sore zie.

²⁵ A Sore na tɩ yel k'ʋʋ na kʋ nyɩ na pàw pɛr a, ɩ̃ lo na gbĩ dume a ʋ niŋé bibie lɩz'a ayi nɩ tɩ̃ɩsɔwr lɩz'a ayi.

²⁶ Ɩ̃ tɩ puor'ʋ nɩ à ŋá: «Sore Naaŋmɩn i, ta kʋ a nɩ-bʋʋrɛ fʋ na so a pàw pɛr ɛ. A fʋ kpɛnʋ na ɩ kpɛ̃ɛ a zũú n'a fʋ faa bɛ, ɛ́ ɩ n a fʋ fãw na bɛ tɛr tʋ̃ɔ́fʋ a, bɛ yi a Eziptɩ tẽw.

²⁷ Cãà bãwnɩ a fʋ tõ-tõ-biir Abraham, Ɩzaakɩ nɩ Zakɔb. Ta cɛlɛ a nɩbɛ bɛ ŋa zu-kpɛnʋ, a bɛ ɩ-faar nɩ a bɛ yel-bebe zie ɩ.

²⁸ A tẽw ʋl pʋɔ fʋ na tɛr tɩ yi n a nɩbɛ taa wa yere: “A Sore bɛ tɩ tɛr fãw na tɛr a nɩbɛ bɛ ŋa kpɛ n a tẽw ʋ na yel k'ʋʋ na kʋ̀ bɛ na a, pʋɔ ɩ. Ʋ bɛ tɩ nɔnɛ bɛ ɩ, ɛ́ tɛr bɛ yi n k'ʋʋ tɩ ɩ bɛ kpi a wɛja-kpalɛ pʋɔ.”

²⁹ Ɛcɛ, Sore e, a fʋ nɩ-bʋʋrɛ nɛbɛ, fʋ̃ʋ so bɛ. A fʋ fãw na ɩ kpɛ̃ɛ a, nɩ a fʋ kpɛnʋ na bɛ tɛr tʋ̃ɔ́fʋ a zũú n'a fʋ faa bɛ.»