Wulu-ayi-sob 4 - A SƐB-SÕW

A Moyiir yel k'aa nɩbɛ tuur a Naaŋmɩn wulu

¹ A Moyiir tɩ cãà na cow yel à ŋá: Ɩsɩrayɛl nɩbɛ ɛ, nyɩ wone a wulu nɩ a tub ɩ̃ na wule nyɩ kɛ́ nyɩ tuur a. A na ɩ na nyɩ vʋʋrɛ, ɛ́ so a tẽw a Sore nyɩ sãàkʋm-kore Naaŋmɩn na kʋ̀rɛ nyɩ a.

² Nyɩ taa dɔwlɛ bom za a nɛ-ƴãwnɩ zu, a Sore nyɩ Naaŋmɩn na ƴãw ɩ̃ kʋ̀ nyɩ a ɩ, nyɩ mɩ̀ taa íre bom za bɛrɛ ɩ: nyɩ tuur a za.

³ Nyɩ nyɛ̃ nɩ nɩ mimir a lɛ a Sore nyɩ Naaŋmɩn na ɩ a Pewɔɔr Báàl yele pʋɔ a: ʋ kʋ n a bɛlɩ dem za, a nyɩ nɩbɛ pʋɔ, na tɩ tu a ŋmɩn ŋa pùor a.

⁴ Ɛcɛ a nyɩɩm na tu a Sore nyɩ Naaŋmɩn pùor a, nyɩ za cãà na vʋʋrɛ a dɩ̃a.

⁵ Nyɩ nyɛ̃, ɩ̃ kʋ̀rɛ nyɩ nɩ wulu nɩ tub, mɛ̃ a lɛ a Sore ɩ̃ Naaŋmɩn na yel kʋ̀ m a. Nyɩmɛ wa kpɛ a tẽw nyɩ na na so a pʋɔ a, nyɩ tuur a wulu nɩ a tub á ŋá.

⁶ Nyɩmɛ wa tɛr a tuur a, a nɩ-bʋʋrɛ na cɛ a, na nyɛ̃ na nyɩ ɩ yã-bãwnbɛ nɩ yã dem. Bʋ̃ʋ n'ʋ vɛ̃, bɛlɛ wa bãw a wulu á ŋá za a, bɛ na yere na: «Yã-bãwfʋ nɩ yã bɛ n'a be a nɩ-bʋʋr-kpɛ̃ɛ ŋa zie ɩ!»

⁷ Bʋ̃ʋ n'ʋ vɛ̃, nɩ-bʋʋrɛ kãw be n be, a nɩ-bʋʋr-bɛrɛ bɛrɛ za pʋɔ, tɛr ŋmɩmɛ bɛ pɩɛl'ʋ, mɛ̃ a lɛ a Sore tɩ Naaŋmɩn na pɩɛlɩ tɩ, lɛn daar tɩ na mɩ́ wa bʋɔlɩ ʋ a bɩɩ?

⁸ Nɩ-bʋʋrɛ kãw be n be, a nɩ-bʋʋr-bɛrɛ bɛrɛ za pʋɔ, tɛr wulu nɩ tub a tɛr yel-mɩŋa man a al na be a wulu pʋɔ, ɩ̃ na kʋ̀rɛ nyɩ a dɩ̃a bɩɩ?

Naaŋmɩn ɩ na a Ɩsɩrayɛl bãw ʋ a Orɛb tãgɛ̃́

⁹ Ɛcɛ nyɩ gùre nyɩ tʋɔra, nyɩ maal cɛlɛ be taa yiire a yele nyɩ na nyɛ̃ nɩ mimir a bɛrɛ ɩ. A yele á ŋá taa wa yire zaarɛ a nyɩ tɩɛrʋ pʋɔ a nyɩ nyɔ-vʋʋrʋ daar za ɩ. Nyɩ nɩ̃ɛ vɛ̃ kɛ́ manɛ a kʋ̀rɛ a nyɩ bibiir nɩ a nyɩ yan.

¹⁰ Nyɩ lɛb tɩɛrɩ a bibir ʋl nyɩ na tɩ àr a Sore nyɩ Naaŋmɩn niŋé, a Orɛb tãgɛ̃́ a. A Sore tɩ yel mɛ̃ na: «Bʋɔlɩ a nɩbɛ za ɓã taa a ɩ̃ zie, ɩ̃ bɔbr'a k'ɩ̃ɩ kʋ̀ bɛ a ɩ̃ nɛ-ƴãwnɩ, kɛ̀ bɛ zanɛ a ɩ zɔba lɛn daar za bɛ na na be a tẽw zu a, ɛ́ mɩ̀ zanɛ nɩ ʋ a bɛ bibiir.»

¹¹ Lɛ n'a nyɩ tɩ taw ta àr a tãw sɩɛ ƴãw a ʋlɩ bibir nɛ. A tãw tɩ nyɔw nɩ vũu dɩrɛ, a vũu-zɛlɛ mɩ́ do tɩ tɔ a salom, zʋ̀ʋ́r-sɛbla nɩ zũzuw-zũgulu sɔgɔ.

¹² A Sore tɩ be n a vũu pʋɔ ɛ́ ƴɛ̀r a nyɩ zie. Nyɩ tɩ wone na ʋ ƴɛ̀rɛ, ɛ́ nyɩ bɛ tɩ nyɛ̃ ʋ ɛ. A ʋ kɔkɔr tɛwr'ʋ nyɩ tɩ wone.

¹³ Ʋ tɩ ɩ na nyɩ bãw a ʋ wõ-taa ʋ na maal'ɩ nyɩ a. Ʋ tɩ yel'a kɛ́ nyɩ maal tɛr ʋ, sàwr a nɛ-ƴãwnɩ pie ʋ na tɩ sɛb ƴãw kʋsɛ-pamɛ ayi zu a.

¹⁴ A ʋlɩ vuo nɛ pʋɔ n'a a Sore tɩ ƴãw ɩ̃ zanɩ nɩ nyɩ a wulu nɩ a tub, a na fɛr kɛ́ nyɩ tɩ tuur a tẽw nyɩ na na so a pʋɔ a.

Kpãàfʋ na càarɩ a tɩbɛ a

¹⁵ Nyɩ gùre nyɩ tʋɔra vla: a ʋlɩ bibir a Sore na tɩ be a vũu sɔwlɩsɔw, ɛ́ ƴɛ̀r a nyɩ zie a Orɛb tãgɛ̃́ a, nyɩ bɛ tɩ nyɛ̃ a ʋ tɛɛ za ɩ.

¹⁶ A na ɩ lɛ a, nyɩ taa wa lore a yel-bier pʋɔ, maalɛ tɩbɛ tɛrɛ ɩ, dasuli na wule ŋmɩmɛ kãw a ɩ, dɛbr bɩɩ pɔwbɛ,

¹⁷ dʋn, lili,

¹⁸ bʋ̃-vuri bɩɩ zʋ́mɛ́ dasuli ɛ.

¹⁹ Nyɩmɛ wa jɩ́rɛ a mʋ̃tɔ̃w, a cuw nɩ a ŋmar-bie nɩ a bʋ̃-nyɩwrɩ za na be a salom zu a, a taa wa ƴãw nyɩ nyɩ puore a ɛ́ maalɛ a ɩ. A tẽ-daa nɩ-bʋʋrɛ na cɛ a nɛbɛ a Sore nyɩ Naaŋmɩn kʋ̀ a ɩ-ɩrɩ á ŋá.

²⁰ Ɛcɛ a nyɩɩm a, a Sore de nyɩ na, tɛr nyɩ yi n a Eziptɩ wʋ̀ʋr-kpɛ̃ɛ pʋɔ, kɛ́ nyɩ tʋ̃ɔ́ lɩɛbɩ a nɩ-bʋʋrɛ ʋ na so a, mɛ̃ à à ŋá nyɩ na ɩ ʋ a dɩ̃a a.

²¹ Ɛcɛ, nyɩmɛ nɛbɛ so a Sore nyɩ Naaŋmɩn tɩ nyɛ̃ nɩ mɛ̃ suur, ɛ́ pɔ yel k'ɩ̃ɩ bɛ gãwnɛ a Zurdɛ̃ ɩ, k'ɩ̃ɩ bɛ kpɩɛr a tẽw na vɩɛl a pʋɔ ʋ na na kʋ̀ nyɩ nyɩ so a ɩ.

²² Yel-mɩŋa n'a, ɩ̃ na kpi n a ka, a tẽw ŋa pʋɔ, ɩ̃ bɛ gãwnɛ a Zurdɛ̃ ɩ. Ɛcɛ nyɩɩm na gãw ʋ na, de a tẽw ŋa na vɩɛl a so ʋ.

²³ A na ɩ à ŋá a, nyɩ gù vla taa yiire a wõ-taa a Sore nyɩ Naaŋmɩn na maal'ɩ nyɩ a bɛrɛ ɩ. Nyɩ taa maalɛ tɩbɛ tɛrɛ ɩ. A bome al ʋ na yel kɛ́ nyɩ taa maalɛ a dasuli a, nyɩ taa maalɛ ɩ.

²⁴ Bʋ̃ʋ n'ʋ vɛ̃, a Sore nyɩ Naaŋmɩn ɩ n vũu na dɩrɛ bom za a, ʋ ɩ n Naaŋmɩn na kpɛ nyuur a!

²⁵ Nyɩmɛ wa kpɛ a Kanãa tẽw cɛlɩ a, tɛr bibiir nɩ yan a, nyɩ taa lore a yel-bier pʋɔ maalɛ tɩbɛ tɛrɛ bɩɩ maalɛ bom nɩ bom za dasuli ɛ. Nyɩ taa ɩrɛ bom na bɛ vɩɛl a Sore nyɩ Naaŋmɩn zie ɛ́ ɩrɛ ʋ suur a ɩ.

²⁶ Alɛ bɛ ɩ lɛ, ɩ̃ yere na kʋ̀rɛ nyɩ a dɩ̃a, ɛ́ a salom nɩ a tẽw ɩ a ɩ̃ dãsɩɛ dem, nyɩ na bɔr'ɩ fɔ̃w fɔ̃wlɛ a tẽw nyɩ na na so a Zurdɛ̃ gãwn a pʋɔ. Nyɩ bɛ kpɩɛr a be cɛlɛ ɩ, bɛ na na kʋ nyɩ za pàw pɛr a ƴãw.

²⁷ A Sore na diw nyɩ na yaarɩ a nɩ-bʋʋr-yoru pʋɔ. Nɩbɛ blãlɛ tɛwr'a na cɛ a nyɩ pʋɔ, a ten al pʋɔ ʋ na na diw nyɩ cen nɩ a gbãgbaalʋ pʋɔ a.

²⁸ A be a, nyɩ na tɩ maalɛ nɩ ŋmɩmɛ nɩsaalbɛ nuru na maalɩ nɩ dàar bɩɩ kʋsɩɛr a, ŋmɩmɛ na kʋ̃ tʋ̃ɔ́ nyɛ̃ bom, kʋ̃ tʋ̃ɔ́ wõ bom nɩ tobr, kʋ̃ tʋ̃ɔ́ dɩ bom, kʋ̃ tʋ̃ɔ́ wõ bom nyũu a.

²⁹ Lɛ n'a, a ten al pʋɔ nyɩ na bɔbr a Sore nyɩ Naaŋmɩn. Ɛ́ nyɩ na nyɛ̃ ʋ na, nyɩmɛ wa bɔbr ʋ nɩ nyɩ pʋɔ za, nɩ a nyɩ sɩ́ɛ za a.

³⁰ À á ŋá za ɩ̃ na yere kʋ̀rɛ nyɩ wa ta nyɩ a pùorí kɛ̀ nyɩ be kpɩɛrʋ pʋɔ a, nyɩ na lɛb'a wa a Sore nyɩ Naaŋmɩn zie, ɛ́ nyɩ na wone nɩ a ʋ ƴɛ̀rʋ.

³¹ Bʋ̃ʋ n'ʋ vɛ̃, a Sore nyɩ Naaŋmɩn ɩ n Naaŋmɩn na ɩ nɔ̃wfʋ tɛwr a. Ʋ bɛ zawrɛ nyɩ bɛrɛ ɩ, bɛ kʋrɛ nyɩ pàwr pɛr ɛ. Ʋ bɛ be za na yiiri a wõ-taa ʋ na maal'ɩ a nyɩ sãàkʋm-kore a bɛr ɛ.

Naaŋmɩn kaa na ír a Ɩsɩrayɛl bʋʋrɛ

³² Nyɩ tɩɛrɩ a koro za yele nyɛ̃, a alɩ bome nɛ na ɩ a koro za, ɛ́ nyɩ wa bãw be a, a lɛ a Naaŋmɩn na tĩ kɛ́ ír a nɩsaalbɛ a tẽw zu a. Nyɩ tɩɛrɩ a alɩ yele za na ɩ a tẽ-daa tib zie tɩ tɔ a baarʋ zie a. Nɔ-ɓãa-yel ŋa tɔ dãw na ɩ ɩ? Nɩr dãw na wõ bɛ manɩ a yel ŋa tɔ ɔ?

³³ Nɩ-bʋʋrɛ kãw dãw na wõ ŋmɩn ʋ be vũu sɔwlɩsɔw ɛ́ ƴɛ̀rɛ a ʋ zie, ʋʋ bɛ kpi ɛ, mɛ̃ a lɛ a na ɩ a nyɩ zie a a?

³⁴ Bɩɩ ŋmɩn kãw wa na wa ír nɩ-bʋʋrɛ a ʋ ƴãw, nɩ-bʋʋr-yoru sɔgɔ ɔ? Ʋ̃ʋ'hʋ̃! Ɛcɛ a Sore nyɩ Naaŋmɩn ʋl ɩ n a lɛ a nyɩ ƴãw, a nyɩ mimirí. Alɛ so ʋ tɩ ɩ a Eziptɩ tẽw dem nyɛ̃ kpɩɛrʋ, ʋ tɩ maalɩ yel-bɛ-dãw-nyɛrɩ nɩ nɔ-ɓãa-yele, ʋ tɩ tõ gãda-tome na ɩrɛ dɛ̃bɩ̃ɛ a.

³⁵ Nyɩɩm'a, ʋ ɩ na nyɩ nyɛ̃ a yele á ŋá, kɛ́ nyɩ tʋ̃ɔ́ bãw k'aa Sore yõ n'ʋ ɩ Naaŋmɩn, ŋmɩmɛ bɛ be be pʋɔ a ʋ ƴãw ɛ.

³⁶ Ʋ tɩ be n a salom zu ɛ́ ɩ nyɩ wõ a ʋ kɔkɔr a nyɩ wulu ƴãw. A tẽw zu a, ʋ tɩ ɩ na nyɩ nyɛ̃ a ʋ vũu-kpɛ̃ɛ, ɛ́ nyɩ wõ ʋ ƴɛ̀r a vũu sɔwlɩsɔw.

³⁷ Ʋ na tɩ nɔnɛ a nyɩ sãàkʋm-kore a ƴãw n'a ʋ tɩ kaa ír nyɩ, nyɩɩm na ɩ a bɛ bʋʋrɛ a, ɛ́ ɩ n a ʋ fãw-kpɛ̃ɛ nyɩ yi a Eziptɩ.

³⁸ Ƴɛrɛŋa a, ʋ na diw nɩ nɩ-bʋʋr-yoru na yãwmɛ ɛ́ kpɛmɛ zuo nyɩ a, a nyɩ niŋé, ɛ́ ɩ nyɩ kpɛ a bɛ tẽw pʋɔ, ʋ tɩ de ʋ kʋ̀ nyɩ nyɩ so ʋ.

³⁹ A na ɩ à ŋá a, nyɩ bãwnɩ a, ɛ́ tɛr a yel ŋa a nyɩ tɩɛrʋ pʋɔ: a Sore yõ n'ɩ a Naaŋmɩn, a saa-zu, a salom zu, nɩ a pile ka a tẽw zu. Ŋmɩn-yoru bɛ be be pʋɔ a ʋ ƴãw ɛ.

⁴⁰ Nyɩ sàwr a ʋ wulu nɩ a ʋ nɛ-ƴãwnɩ ɩ̃ na kʋ̀rɛ nyɩ a dɩ̃a a. Lɛ n'a a nyɩɩm nɩ a nyɩ bʋʋrɛ a pùorí, nyɩ na kpɛ a tẽw a Sore nyɩ Naaŋmɩn na kʋ̀rɛ nyɩ a baarɩ a cɛlɩ.

A naayir zɔ-kpɛb ziir tẽ-bɛrɛ ata na be a Zurdɛ̃ saa-pɛrɩ́ a

⁴¹ Lɛ n'a a Moyiir tɩ kaa ír tẽ-bɛrɛ ata a Zurdɛ̃ gãwn na be a saa-pɛrɩ́ a,

⁴² a ɩ naayir zɔ-kpɛb ziir tẽ-bɛrɛ nɩr na bɛ bãw kɛ́ kʋ a ʋ tɔ sob a ƴãw. Ʋ bɛ tɩ dãw hɩ̃ɛn ʋ ɛ. Ʋlɛ wa zɔ kpɛ naayir a tẽ-bɛrɛ á ŋá kãw pʋɔ a, ʋ na faa nɩ a ʋ nyɔ-vʋʋrʋ.

⁴³ A tẽ-bɛrɛ al tɩ n'ɩ Besɛɛr, a wɛja-kpalɛ tã-sɛr zu, Urubɛn nɩbɛ ƴãw, nɩ Aramɔtɩ na be Galaadɩ a, Gadɩ nɩbɛ ƴãw, de nɩ Golan na be Basan a, Manase nɩbɛ ƴãw.

A MOYIIR ƳƐ̀RƲ AYI SOB 4:44—11:32

⁴⁴ Nyɛ̃ a Naaŋmɩn wulu a Moyiir na tɩ kʋ̀ a Ɩsɩrayɛl nɩbɛ a.

⁴⁵ Bɛ na tɩ yi a Eziptɩ baar'a n'a ʋ manɩ a fɛrʋ, a wulu nɩ a tub na be be a kʋ̀ bɛ.

⁴⁶ A lɛn daar a, bɛ tɩ be n a Zurdɛ̃ saa-pɛrɩ́, a fʋɔla na tori Bɛtɩ-Pewɔɔr a pʋɔ, a Amoritɩ mɩnɛ nãà Sihon tẽw. A Sihon tɩ kpɩɛr'ɩ Hɛsɩbon, ɛcɛ a Moyiir nɩ a Ɩsɩrayɛl nɩbɛ tɩ zɛb'a tʋ̃ɔ́ ʋ,

⁴⁷ de a ʋ tẽw, lãwnɩ Basan nãà Ɔgɩ tẽw. — A Amoritɩ mɩnɛ na-mɩnɛ ayi bɛ ŋa tɩ dɩrɛ nɩ naalʋ a Zurdɛ̃ saa-pɛrɩ́. —

⁴⁸ Lɛ n'a a Ɩsɩrayɛl nɩbɛ tɩ so a vuo ʋl na yi a Arowɛɛr ɛ́ cen tɩ ta a Hɛrmɔ̃ tãw bɛ mɩ̀ na bʋɔlɛ Siyon a.

⁴⁹ A vuo ŋa tɩ ɩ n a fʋɔla na be a Zurdɛ̃ saa-pɛrɩ́ a, ɛ́ tɩ tɔ a Kʋ̃ɔ-kpɛ̃ɛ-kũu, a Pisiga tãw sɩɛmɩ́.