Wulu-ayi-sob 2 - A SƐB-SÕW

¹ Al pùorí, tɩ tɩ lɩɛb'ɩ pɛr-tul tu a wɛja-kpalɛ pʋɔ cere a Bàa-kɛkɛɛ kʋ̃ɔ-kpɛ̃ɛ lowr, mɛ̃ a lɛ a Sore na tɩ yel kʋ̀ m a. Tɩ tɩ be n a tan vuo ʋl pʋɔ cɛlɩ yaga, a Seyiir tan ƴãw.

A Ɩsɩrayɛl nɩbɛ na cen tɔl Edɔm, Mowab nɩ Amɔ̃ ten pʋɔ a

² A Sore tɩ yel mɛ̃ nɩ bibir kãw:

³ Nyɩ be n a vuo ŋa pʋɔ sɛw, nyɩ lɩɛbɩ tu a saa-pɛrɩ́-gʋba-lowr lowr.

⁴ Yel à ŋá kʋ̀ a Ɩsɩrayɛl nɩbɛ: «Nyɩ na tu na tɔl a Seyiir vuo pʋɔ, be a nyɩ yɛbr Ezawu bʋʋrɛ na kpɩɛr a. Bɛ na zɔrɛ nyɩ na, ɛcɛ nyɩ gù vla,

⁵ taa wa ŋmaarɛ nɩ bɛ zɛbr ɛ, ɩ̃ bɛ kʋ̀rɛ nyɩ a bɛ tẽw zie kãw za ɩ, ʋlɛ mɩ̀ saa na ɩ gbɛ́r binu zie tɛwr a. Bʋ̃ʋ n'ʋ vɛ̃, a Ezawu bʋʋrɛ nɛbɛ ɩ̃ kʋ̀ a Seyiir tãw vuo bɛ so ʋ.

⁶ Nyɩ na mɩ́ ya bɛ nɩ libie a bʋ̃-dɩrɩ nyɩ na dɩrɛ a, nɩ a kʋ̃ɔ tɛɛ za nyɩ na nyúur a ƴãw.»

⁷ Bʋ̃ʋ n'ʋ vɛ̃, a Sore nyɩ Naaŋmɩn maalɩ nyɩ nɩ a nyɩ tome za pʋɔ, ɛ́ gù nyɩ a wɛja-kpalɛ kpɛ̃ɛ ŋa pʋɔ nyɩ na tu tɔl a. Yome lɩz'a ayi n'ɩ à ŋá ʋ na be a nyɩ zie, ɛ́ nyɩ bɛ bɔ bom za gù a.

⁸ Tɩ tɩ bɛr'ɩ a Seyiir vuo pʋɔ tub, a be a tɩ yɛbr Ezawu bʋʋrɛ na kpɩɛr a. Tɩ mɩ̀ tɩ bɛr'ɩ a bà-fʋɔla pʋɔ sɔ́r, nɩ Eilatɩ nɩ Esion-Gevɛɛr. Tɩ tɩ lɩɛb'a tu zi-yoru tɔl a Mowab wɛja-kpalɛ pʋɔ.

⁹ A Sore tɩ yel mɛ̃ na: «Nyɩ taa bɔbr a Mowab tẽw dem nɔhaarʋ ɛ, nyɩ taa ŋmaarɛ nɩ bɛ zɛbr ɛ. Ɩ̃ kʋ̃ kʋ̀ nyɩ a bɛ tẽw zie kãw za ɩ. Bʋ̃ʋ n'ʋ vɛ̃, Lɔtɩ bʋʋrɛ nɛbɛ ɩ̃ kʋ̀ a Aar tẽw kɛ́ bɛ so ʋ.» —

¹⁰ A koro za a, Emitɩ mɩnɛ nɛbɛ tɩ kpɩɛr a Aar tẽw, nɩbɛ na kpɛmɛ, ɛ́ yãwmɛ, ɛ́ mɩ̀ kɛrɩ mɛ̃ a Anakɩ bʋʋrɛ a.

¹¹ Bɛ mɩnɛ tɩ tɩ́ɛrɛ kɛ́ Erefayim bʋʋrɛ nɛbɛ, mɛ̃ a Anakɩ bʋʋrɛ a, ɛcɛ a Mowab tẽw dem tɩ bʋɔlɛ bɛ nɩ Emitɩ mɩnɛ.

¹² Seyiir tẽw ʋl a, Horitɩ mɩnɛ nɛbɛ tɩ kpɩɛr ʋ a koro za. Ɛcɛ a Ezawu bʋʋrɛ tɩ diw bɛ na, kʋ kʋ bɛ, ɛ́ lɩɛrɩ bɛ zɩ̃. Lɛ n'a a Ɩsɩrayɛl nɩbɛ mɩ̀ tɩ ɩ a pùorí, a tẽw ʋl pʋɔ a Sore na tɩ kʋ̀ bɛ bɛ so a. —

¹³ A Sore tɩ yel'ɩ à ŋá kʋ̀ tɩ: «Ƴɛrɛŋa, nyɩ ír lo a sɔ́r, nyɩ lo gãw a Zerɛdɩ fʋɔla.» Lɛ n'a tɩ tɩ gãw a Zerɛdɩ fʋɔla.

¹⁴ A tɩ maal'ɩ yome lɩzɛr'ɩ pie nɩ ani, tɩ na tɩ yi a Kadɛsɩ-Barneya, ɛ́ cen tɩ ta a Zerɛdɩ fʋɔla gãwfʋ zie a. A lɛn daar a, a nɩbɛ bɛl na tɩ ta zɛbr maalʋ a sɔ́r loba daar a, a bɛ bʋʋrɛ za tɩ baar'a mɛ̃ a lɛ a Sore na tɩ pɔ yel kʋ̀ bɛ a.

¹⁵ Mɔ̃ mɩ̀, a Sore tɩ ìr'ɩ a bɛ ƴãw ɩ bɛ baarɩ bɛ za a laɩ pʋɔ.

¹⁶ A zɛbr-nɩbɛ bɛ ŋa za na wa kpi baarɩ a Ɩsɩrayɛl nɩbɛ pʋɔ a,

¹⁷ a Sore yel mɛ̃ nɩ à ŋá:

¹⁸ «Ƴɛrɛŋa a, nyɩ na gãw nɩ a Mowab tʋr-bɔw, ɛ́ tu tɔl a Aar tẽw pʋɔ.

¹⁹ Nyɩ na tuor'a tɔ a Amɔ̃ tẽw. Nyɩ taa bɔbr bɛ nɔhaarʋ ɛ, nyɩ taa ŋmaarɛ nɩ bɛ zɛbr ɛ. Ɩ̃ bɛ kʋ̀rɛ nyɩ a bɛ tẽw zie kãw za ɩ. Bʋ̃ʋ n'ʋ vɛ̃, Lɔtɩ bʋʋrɛ nɛbɛ ɩ̃ kʋ̀ a zie ŋa bɛ so ʋ.» —

²⁰ A nɩbɛ tɩ tɩ́ɛrɛ kɛ́ Erefayim bʋʋrɛ so a zie ŋa. Bʋ̃ʋ n'ʋ vɛ̃, Erefayim bʋʋrɛ nɛbɛ tɩ kpɩɛr a be a koro za. A Amɔ̃ tẽw dem tɩ bʋɔlɛ bɛ nɩ Zamzumitɩ mɩnɛ.

²¹ Nɩ-bʋʋrɛ na kpɛmɛ, ɛ́ yãwmɛ, ɛ́ mɩ̀ kɛrɩ man a Anakɩ bʋʋrɛ a tɩ nɛbɛ. Ɛcɛ a Sore tɩ kʋ bɛ na pàw pɛr, a lɛ a Amɔ̃ tẽw dem na tɩ ta a. A Amɔ̃ tẽw dem tɩ faa nɩ a bɛ tẽw kpɩɛr ɛ́ bɛr bɛ.

²² A Sore mɩ̀ tɩ ɩ n a lɛ a Ezawu bʋʋrɛ Edɔm tẽw nɩbɛ ƴãw na kpɩɛr a Seyiir vuo pʋɔ a: ʋ tɩ kʋ n a Horitɩ mɩnɛ pàw pɛr a Edɔm tẽw nɩbɛ tab daar. A Edɔm tẽw nɩbɛ tɩ faa nɩ a bɛ tẽw kpɩɛr ɛ́ bɛr bɛ. Nɩ dɩ̃a bɛ cãà na kpɩɛr ʋ.

²³ A Avitɩ mɩnɛ bɛl a, a ten al na be a Gaza vuo pʋɔ a n'a bɛ tɩ kpɩɛr. Ɛcɛ nɩbɛ tɩ yi n Kafɩtɔɔr wa kʋ bɛ pàw pɛr, ɛ́ lɩɛrɩ bɛ zɩ̃. —

²⁴ Al pùorí, a Sore tɩ yel mɛ̃ na: «Nyɩ ír lo a sɔ́r, nyɩ lo gãw a Arnon fʋɔla. A nãà Sihon na ɩ Amoritɩ ɛ́ kpɩɛr Hɛsɩbon a, ɩ̃ na ƴãw ʋ nɩ a nyɩ nuru pʋɔ, lãwnɩ a ʋ tẽw. Nyɩ tĩ a tẽw zɛb-deb, nyɩ ŋmãa nɩ a Sihon a zɛbr!

²⁵ A dɩ̃a bibir na dɛ vɩɛ a, ɩ̃ na ɩ na pʋ̀lá mɩ́ vʋ̃ɔnɛ a tẽ-daa nɩ-bʋʋrɛ za a nyɩ ƴãw, ɛ́ bɛ zɔrɛ nyɩ. Bɛlɛ wa wone bɛ pore a nyɩ yúor a, pʋl-vʋ̃ɔ na mɩ́ tɛr bɛ na bɛ màwr.»

A Ɩsɩrayɛl nɩbɛ zɛb'a de a Sihon naalʋ-tẽw

²⁶ Kedemɔtɩ wɛja-kpalɛ pʋɔ n'a tɩ tɩ be, ɩ̃ɩ tõ nɩbɛ a Hɛsɩbon nãà Sihon zie, kɛ́ bɛ tɩ ƴɛ̀r ƴã-ɓaarʋ ƴɛ̀r-bie á ŋá kʋ̀ ʋ:

²⁷ «Bɛr tɩ tɩ tu tɔl a fʋ tẽw pʋɔ. A sɔ́r zu tɛwr'a tɩ na cere, tɩ bɛ bɩ̀ɛrɛ dʋrʋ bɩɩ gʋba ɩ.

²⁸ A bʋ̃-dɩrɩ tɩ na na dɩrɛ a, nɩ a kʋ̃ɔ tɩ na na nyúur a, tɩ na ya b'ɩ libie. Bɛr tɩ tɩ tɔl tɔlʋ tɛwr a fʋ tẽw pʋɔ.

²⁹ A Ezawu bʋʋrɛ na kpɩɛr a Seyiir vuo pʋɔ a, nɩ a Mowab tẽw dem na kpɩɛr a Aar a, sàw na tɩ tu tɔl a bɛ ten pʋɔ. Al pùorí, tɩ na gãw nɩ a Zurdɛ̃, ta a tẽw a Sore tɩ Naaŋmɩn na kʋ̀rɛ tɩ a.»

³⁰ Ɛcɛ a Hɛsɩbon nãà, Sihon, bɛ sàw tɩ tɔl a ʋ zie ɩ. Bʋ̃ʋ n'ʋ vɛ̃, a Sore nyɩ Naaŋmɩn tɩ ɩ na a ʋ tɩɛrʋ nɩ a ʋ socir kpawlɩ mɛ̃ kʋsɩɛr a, k'ʋʋ tʋ̃ɔ́ ƴãw ʋ a nyɩ nuru pʋɔ a ʋlɩ bibir nɛ.

³¹ A Sore tɩ yel mɛ̃ na: «Bɛrɛ wone, a ƴɛrɛŋa a, ɩ̃ ƴãwnɛ nɩ a Sihon nɩ a ʋ tẽw a fʋ nuru pʋɔ. A na ɩ lɛ a, nyɩ tĩ zɛbr dier a ʋ tẽw.»

³² A Sihon nɩ a ʋ zɛbr-nɩbɛ za tɩ yi na tuori, kɛ́ bɛ zɛb'ɩ tɩ Yahasɩ.

³³ A Sore tɩ Naaŋmɩn tɩ ɩ na tɩ zɛb tʋ̃ɔ́. Tɩ tɩ pɔb ʋ na, ʋlɛ nɩ a ʋ bidɛbr nɩ a ʋ zɛbr-nɩbɛ za.

³⁴ Daadaalɛ a pùorí a, tɩ tɩ de nɩ a ʋ tẽ-bɛrɛ za, ɛ́ a Sore zũú tɩ ŋmɛ a a za ŋmɛr bɛr, ɛ́ kʋ a dɛbr, a pɔwbɛ nɩ a bibiir pàw pɛr, nɩr bɛ tɩ cɛ ɩ.

³⁵ A tɩ bome tɩ na zɛb de a tɛwr tɩ n'ɩ a dʋn nɩ a bome na be a tẽ-bɛrɛ tɩ na zɛb de a pʋɔ a.

³⁶ A na tĩ a Arowɛɛr tẽ-kpɛ̃ɛ na be a Arnon nʋɔr a, nɩ a tẽ-kpɛ̃ɛ ʋl na be a fʋɔla pʋɔ a, ɛ́ tɩ tɔ a Galaadɩ tẽw a, tẽ-kpɛ̃ɛ bɛ ka be tɩ bɛ tʋ̃ɔ́ zɛb de ɩ. A Sore tɩ Naaŋmɩn tɩ de nɩ a tẽ-bɛrɛ á ŋá za kʋ̀ tɩ.

³⁷ Ɛcɛ, tɩ bɛ tɩ tɔ a Amɔ̃ tẽw ɛ: a vuo ʋl za na be a Yabɔkɩ fʋɔla nʋɔr a, nɩ a tẽ-bɛrɛ na be a tan vuo pʋɔ a, nɩ a ziir al za a Sore na tɩ yel kɛ́ tɩ jɩɩrɩ bɛr a.