Urutɩ 3 - A SƐB-SÕW

A Urutɩ na cen tɩ gã a Bowaazʋ zie a

¹ Bibir kãw, a Nowemi tɩ yel'ɩ a ʋ bie-pɔw Urutɩ: «Ɩ̃ pɔwyaa a, a fɛr'a k'ɩ̃ɩ kaa a fʋ nɩdaar nyɔ-vʋʋrʋ zie, fʋ tʋ̃ɔ́ wone nʋ̃ɔ̀.

² Fʋ bãwnɩ a na, a Bowaazʋ ŋa na daar bɛr fʋ̃ʋ nɩ a ʋ tõ-tõ-bi-pɔwbɛ nyɩ lãw tõ a, ʋ ɩ n a tɩ nɩr kãw. A dɩ̃a zaanʋɔra, ʋ na cen na tɩ va a ɔɔzʋ a ʋ gbãgbala pʋɔ.

³ A na ɩ à ŋá a, so kʋ̃ɔ, ɛ́ zɛ kãá-nyũu, ɛ́ su a fʋ fɔbr-vɩɛlɩ vɩɛlɩ. Al pùorí, siw a be ʋ na vàrɛ a ɔɔzʋ a, ɛcɛ ʋlɛ bɛ wa dɩ ɛ́ nyũ baarɩ a, fʋ̃ʋ ta sàw ʋ nyɛ b ɛ.

⁴ Ʋlɛ wa ganɛ a, fʋ̃ʋ bɛl bãw a ʋ gaa zie. Al pùorí, taw ta vɩɛ a ʋ gãw ɛ́ gã a ʋ gbɛ́ɛ ƴãw. Ʋl mɩŋa na wul fʋ nɩ a lɛ a na fɛr kɛ́ fʋ ɩ a.»

⁵ A Urutɩ tɩ sɔw na yel: «Ɩ̃ na ɩ n a lɛ za fʋ na yel kʋ̀ m a.»

⁶ A Urutɩ tɩ siw nɩ a gbãgbala pʋɔ tɩ tu a lɛ za a ʋ sɩr-mã na yel kʋ̀ ʋ a.

⁷ A Bowaazʋ tɩ dɩ na ɛ́ nyũ kɛ̀ ƴãw ɓãá ʋ, al pùorí, ʋ cen tɩ gã kɔw a ɔɔzʋ bie na duo a. Lɛ n'a a Urutɩ tɩ taw ta zaa zoom, vɩɛ a gãw, ɛ́ gã a ʋ gbɛ́ɛ ƴãw.

⁸ A zie na wa bɩ põ-zɛ̃-taa a, a Bowaazʋ tɩ gbaal'a ìr, ʋ tɩ gũu na nyɛ̃ pɔw ʋ gã a ʋ gbɛ́ɛ ƴãw.

⁹ A Bowaazʋ tɩ sowr'a: «Ãa nɛ b?» A Urutɩ sɔw: «Mãa Urutɩ n'ʋ, a fʋ tõ-tõ-bi-pɔw. Kul a fʋ tõ-tõ-bi-pɔw, fʋ tɛr'ɩ sɔ́r na bɩɛrɩ mɛ̃.»

¹⁰ Lɛ n'a a Bowaazʋ tɩ yel ʋ: «Ɩ̃ pɔwyaa a, a Sore ʋ maalɩ fʋ! A fʋ pùor-bɛ-lɛbrʋ tub ŋa vɩɛl'a zuo a dãw-niwn sob. Bʋ̃ʋ n'ʋ vɛ̃, fʋ bɛ zɔ tu pɔlbili na ɩ nan dem bɩɩ na-mɩnɛ a ɩ.

¹¹ Ƴɛrɛŋa a, ɩ̃ pɔwyaa a, ta zɔrɛ dɛ̃bɩ̃ɛ ɩ! Bom nɛ za fʋ na na yel k'ɩ̃ɩ ɩ a, ɩ̃ na ɩ ʋ na kʋ̀ b. Bʋ̃ʋ n'ʋ vɛ̃, a nɩbɛ za bãwnɩ a na fʋ na ɩ pɔw na ɩ pɔw a.

¹² Sɩza n'a, ɩ̃ tɛr'ɩ sɔ́r na tʋ̃ɔ́ bɩɛrɩ fʋ, ɛcɛ nɩr be n be pɩɛlɩ nyɩ zuo mɛ̃.

¹³ A na ɩ à ŋá a, gã a ka a zie vɩɛ. A biɓaara a, ʋlɛ wa bɩ́ɛrɛ fʋ a, a vɩɛl'a, ʋ bɩ́ɛrɩ fʋ. Ɛcɛ ʋlɛ bɛ wa bɔbr a fʋ bɩ́ɛrʋ a, a lɛn daar a, mãa na bɩ́ɛrɩ fʋ na. A Sore bɛ wa be a n'a! Gã a zie vɩɛ.»

¹⁴ Lɛ n'a ʋ tɩ gã a ʋ gbɛ́ɛ ƴãw tɩ ta a biɓaara. Ɛcɛ, a lɛn daar fʋ na kʋ̃ tʋ̃ɔ́ nyɛ̃ nɩr bãw a, a lɛn daar a, ʋ ìr. Bʋ̃ʋ n'ʋ vɛ̃, a Bowaazʋ bɛ tɩ bɔbr kɛ́ bɛ bãwnɩ a a Urutɩ na wa a ɔɔzʋ vab gbãgbala pʋɔ a ɩ.

¹⁵ Ʋ tɩ yel ʋ na: «Wa n a kpar-kpɛ̃ɛ fʋ na su a, ɛ́ nyɔw tɛr vla.» A Urutɩ tɩ cɔw nɩ a kpar-kpɛ̃ɛ, ʋ cir kilo pie nɩ anũu ɔɔzʋ bie ƴãw ʋ, ɛ́ sõw ʋ k'ʋ tuo, ɛ́ a Bowaazʋ tɩ lɛb kul a tẽw pʋɔ.

¹⁶ Lɛ n'a a Urutɩ tɩ lɛb kul a ʋ sɩr-mã zie, ʋ tɩ sowr'ʋ: «Ɩ̃ pɔwyaa a, a ŋmɛ̃ b'ɩ ŋmɩn?» Ʋ tɩ manɩ nɩ a lɛ za a Bowaazʋ na ɩ a kʋ̀ a ʋ sir-mã.

¹⁷ Ʋ tɩ yel'a ƴãw pʋɔ: «Ʋlɛ n'ʋ mɩ̀ cãà kʋ̀ m a kilo pie nɩ anũu ɔɔzʋ á ŋá, ɛ́ yel k'aa bɛ tɛr sɔ́r k'ɩ̃ɩ lɛb wa a fʋ zie nũ-zawlɛ ɩ.»

¹⁸ A Nowemi tɩ yel ʋ na: «Ɩ̃ pɔwyaa a, zɩ̃ a ka zaa zoom ɛ́ gù fʋ wa tɩ bãw a yel ŋa gaa zie. A Bowaazʋ bɛ wa cɔbrɩ a yel ŋa ʋ gã zi-been a dɩ̃a a, ʋ bɛ zɩnɛ pɩ̃ɛnɛ ɩ.»