A Yielu za pʋɔ yiel-vla vla 3 - A SƐB-SÕW

A pɔwsɩrale zanɩ na nyɛ̃ ʋ yi a ʋ nɩ-nɔna bɔb A pɔwsɩrale

¹ A tɩ̃ɩsɔw a, a ɩ̃ bʋ̃-gana zu a, ɩ̃ bɔbr'ɩ a nɩr ɩ̃ na nɔnɛ a, ɩ̃ bɔbr ʋ na ɛ́ bɛ nyɛrɛ ʋ ɛ.

² Ɩ̃ na ìr'a. Ɩ̃ na zɔ na cɔlɩ a tẽ-kpɛ̃ɛ, a sɛ́ɛ nɩ a tuor-taa ziir. Ɩ̃ na bɔ n a nɩr ɩ̃ na nɔnɛ a. Ɩ̃ bɔbr ʋ na ɛ́ bɛ nyɛrɛ ʋ ɛ.

³ Ɩ̃ tuor'ɩ a zi-gùrbɛ na cɔlɛ a tẽ-kpɛ̃ɛ a. Ɩ̃ sowri bɛ na: «Nyɩ nyɛ̃ nɩ a sob nɛ ɩ̃ na nɔnɛ a?»

⁴ Ɩ̃ tɩ zuo bɛ na bɛr wa baarɩ, ɛ́ nyɛ̃ a sob nɛ ɩ̃ na nɔnɛ a. Ɩ̃ nyɔw ʋ nɩ a nũu, ɛ́ kʋ̃ lɛb bɛr ʋ ɛ, ɛ́ gù ɩ̃ tɩ kpɛ n ʋ a yir, a di-gana ʋl pʋɔ a ɩ̃ mã na ŋmãa a ɩ̃ sɩɛ a.

⁵ «Zerizalɛm pɔwsɩrali i, ɩ̃ zɛlɛ nyɩ nɩ yãayãa, a muli nɩ a póru pʋɔ walɩ yúor ƴãw: Nyɩ ta sɩ̃w a ɩ̃ nɔ̃wfʋ ɛ, nyɩ ta dam ʋ, ʋʋ bɛ sàw sɛr ɛ.»

A pɔwsɩrale

⁶ Ãa n'ʋ yi a wɛja-kpalɛ pʋɔ dúor waar mɛ̃ zʋ̀ʋ́r na ŋmɛlɛ dúor, ɛ́ nyùur mɩ́ɩ̀r parfɛ̃ nɩ tɩ-suur-zɔ̃-na-nyùur-vla-vla-a, nɩ parfɛ̃ bʋʋrɛ za na yi tẽ-yoru wa a?

⁷ A nãà Salomɔ̃ gado bɛ na mɩ́ tuo a n'ʋ, kɛ̀ gãdaar lɩz'a ata na yi a Ɩsɩrayɛl gãdaar pʋɔ a viiri koli.

⁸ Bɛ za tɛr'ɩ a zɛbr-sɔ-bɛrɛ, ɛ́ ɩ nɩbɛ bɛ na cɔbrɩ a zɛbr ƴãw a. Ŋa za sɛ n a ʋ zɛbr-sɔ-kpɛ̃ɛ a ʋ sɩɛmɩ́ k'ʋʋ tʋ̃ɔ́ gù n ʋ tʋɔra a tɩ̃ɩsɔw yel-fɛrɩ ƴãw.

⁹ A nãà Salomɔ̃ tɩ ƴãw na bɛ maalɩ dà-kɔw nɩbɛ na mɩ́ ɓáw zɛlɛzɛlɛ a, nɩ Libã tẽw dàar kʋ̀ ʋ.

¹⁰ Ʋ tɩ ƴãw na bɛ maalɩ a gbɛ́ɛ nɩ salm-pla, a dɩ́ɛlʋ zie nɩ salm-zɩɛ, ɛ́ ƴãw pɛn-zɩɛ vla vla a zɩma zie. A Zerizalɛm pɔwsɩrali tɩ cɔbr'ɩ a pʋɔ nɩ nɔ̃wfʋ.

¹¹ «Zerizalɛm pɔwsɩrali i, nyɩ wa nyɛ̃ a nãà Salomɔ̃ a! Ʋ vɔbl'ɩ a kul-taa dɛpaal-kpawʋɔ a ʋ mã na tɩ kʋ̀ ʋ a ʋlɩ bibir a ʋ socir za na tɩ paalɩ a nʋ̃ɔ̀ a.»