Sɛb-sõw yielu 68 - A SƐB-SÕW

Sɛb-sõw yielu 68 (67) sob Danʋ yielu a Naaŋmɩn na zɛb tʋ̃ɔ́ a ƴãw

¹ Yiel-yielbɛ nɩ-kpɛ̃ɛ sɛbɛ pʋɔ yielu. Sɛb-sõw yielu Daviir na maalɩ a.Yielu.

² A Naaŋmɩn ìre na, a ʋ dɔ̃ dem zɔrɛ yaarɛ, ɛ́ a bɛlɩ dem na bɛ nɔnɛ ʋ a bɔrɛ a ʋ niŋé.

³ Mɛ̃ a lɛ a sɛsɛb na mɩ́ ɓáw a zʋ̀ʋ́r tɔl'ɩ a, mɛ̃ a lɛ a sɩ-suur na mɩ́ nyɩl a vũumí a, lɛ n'a a nɩ-faar mɩ́ bɔr a Naaŋmɩn niŋé.

⁴ Ɛcɛ a nɩ-mɩn mɩ́ cɩlɛ na, bɛ cɩlɛ na ƴawr'ɩ a Naaŋmɩn niŋé, nʋ̃ɔ̀ ɩrɛ bɛ na bɛ ƴawr.

⁵ Nyɩ yiele a Naaŋmɩn ƴãw, nyɩ íre a ʋ yúor, nyɩ puo sɔ́r kʋ̀ a sob nɛ na zɔm a zũzuge a. A ʋ yúor'ɩ Sore, nyɩ cɩlɛ a ʋ niŋé.

⁶ A ʋ kpɛb zi-sõw pʋɔ a, Naaŋmɩn ɩ n a bi-kpebe sãà, nɩ a sob nɛ na mɩ́ dɩ a ƴɛ̀rʋ faa a pɔw-kɔbɛ a.

⁷ Ʋlɛ n'ʋ mɩ́ kʋ̀ yir nɩbɛ a bɛlɩ dem na ɩ bɛ yõ a, ɛ́ yuo a nɩ-pàwrɩ bɛr, a ɩrɛ bɛ nʋ̃ɔ̀. Ɛcɛ a bɛ-wonbɛ mɩ́ kpɩɛr'ɩ tẽsɔw-kõw pʋɔ.

⁸ Naaŋmɩn i, a lɛn daar fʋ na tɩ yi de a fʋ nɩbɛ niwn a, a lɛn daar fʋ na tɩ cen kpɛ a wɛja-kpalɛ pʋɔ a,

⁹ a tẽsɔw tɩ dam'a, a saa tɩ cir'ɩ a fʋ niŋé, fʋ̃ʋ Sinayi Naaŋmɩn, Ɩsɩrayɛl Naaŋmɩn.

¹⁰ Fʋ ɩ na sa-zʋba mĩ, fʋ lɛb'a kʋ̀ fãw a fʋ tẽsɔw na tɩ ko a.

¹¹ A fʋ tẽw pʋɔ n'a a fʋ nɩbɛ zɩ̃. Naaŋmɩn i, fʋ̃ʋ na ɩ nɩ-vla a, fʋ̃ʋ n'ʋ cɔbrɩ a tẽw ŋa a bãbàalbɛ ƴãw.

¹² A Sore ƴɛ̀r'a, ɛ́ pɔwbɛ na bɛ dɩ vuo a yere a yel-nʋ̃ɔ̀ ŋa:

¹³ «Zɔrʋ! A sojarɩ na-mɩnɛ nyɔw nɩ zɔba, a pɔwbɛ na be a yie pʋɔ a pone nɩ a zɛbr bʋ̃-ŋmaarɛ.

¹⁴ Nyɩ na cãà na gã gã a laɩ pʋɔ ɔ? Salm-pla pàw nɩ a naŋmam bɩgɛ, ɛ́ salm-zɩɛ nyɩwrɛ a ʋ kɔblʋ zu.

¹⁵ A Kpɛnʋ-za-sob na tɩ diw a na-mɩnɛ yaarɩ a, sa-pupure tɩ lore nɩ a Salmon tãw zu.»

¹⁶ A Basan tãw ɩ n tãw-sõw, a Basan tãw ɩ n tã-cowe.

¹⁷ Tã-cowe e, bʋnʋ ƴãw n'a nyɩ nyuur'ɩ a tãw a Naaŋmɩn na kaa ír kpɩɛr a? Yel-mɩŋa za, be n'a a Sore na kpɩɛr kʋralɛ.

¹⁸ Naaŋmɩn tɛr'ɩ zɛbr-torkori túre túre, tùr-piir piir. Alɛ n'a a Sore yi n a Sinayi tãw zu, ɛ́ wa n a zi-sõw pʋɔ.

¹⁹ Sore Naaŋmɩn i, fʋ do n a zie na kɛrɩ a zu, kɛ́ fʋ tɩ kpɩɛr a be, fʋ zɛb'a nyɔw nɩbɛ, a nɩsaalbɛ kʋ̀ b ɩ bʋ̃-kʋ̀rɩ, tɩ lãwnɩ a bɛ-wonbɛ za mɩ̀ na kʋ̀ b bome a.

²⁰ A Sore tɛr'ɩ puoru bibir za. A Naaŋmɩn tɩ Faarɛ kaarɛ nɩ tɩ zie. Tɛw-àrʋ

²¹ A Naaŋmɩn ɩ n Naaŋmɩn na faarɛ tɩ a. A Sore Naaŋmɩn zũú n'a tɩ na tʋ̃ɔ́ cɩ̃ɛ.

²² Ɛcɛ Naaŋmɩn na ŋmɛr'ɩ a ʋ dɔ̃ dem zuru, ʋ na ŋmɛr'ɩ a zukɔbr-zãkʋrmɛ dem zuŋmamɛ, bɛl na nɔnɛ a ɩ-faar a.

²³ A Sore yel'a: «Ɩ̃ na tɛr'ɩ a fʋ dɔ̃ dem a Basan tẽw lɛb wa n, ɩ̃ na tɛr bɛ nɩ a kʋ̃ɔ-kpɛ̃ɛ pɛrɩ́ yi wa n.

²⁴ Lɛ n'a fʋ na cere a zɩ̃ɩ pʋɔ, ɛ́ a fʋ baar 'wɔb a fʋ dɔ̃ dem ƴã-gamɛ.»

²⁵ Naaŋmɩn i, bɛ nyɛ̃ nɩ a nɩbɛ na cɔrɩ tu b a, a nɩbɛ na cɔrɩ tu b a fʋ Yir-sõw pʋɔ a, ɩ̃ Naaŋmɩn nɩ ɩ̃ nãà a!

²⁶ A yiel-yielbɛ de nɩ niwn, a bʋ̃-ŋmɩɛrbɛ pàw a pùor, ɛ́ pɔwsɩrali be a sɔgɔ ŋmɩɛr gãgali.

²⁷ Nyɩ puore a Naaŋmɩn yãanɩ a lãw pʋɔ, nyɩ puore a Sore yãanɩ nyɩɩm a yib zie na n'ɩ a Ɩsɩrayɛl a.

²⁸ Bɛ̃zamɛ n'ɩ ŋan de a niwn, ʋl na ɩ bile za a, al pùorí a Zuda nɩ-bɛrɛ na su kpar-mawrɩ a, Zabulɔ̃ nɩ-bɛrɛ, Nɛfɩtali nɩ-bɛrɛ.

²⁹ Naaŋmɩn i, ƴɛ̀r mɛ̃ a lɛ fʋ na tɛr a fãw a, a fãw ŋa na tõ tome a tɩ ƴãw a.

³⁰ A fʋ Yir do na gãw a Zerizalɛm yie, ɛ́ be n'a a na-mɩnɛ waar'ɩ a bome wa kʋ̀rɛ fʋ.

³¹ Be a be, ɛ́ tanɩ a bàa-kɛkɛɛ pʋɔ dʋ̃w, a nadɛr-yaga yaga nɩ a bili na tɛr salm-zɩɛ libie wa lo gbĩ n dume a fʋ niŋé a. Diw a nɩ-bʋʋrɛ na nɔnɛ a zɛbr a yaarɩ.

³² Nɩ-tɩbrɛ yi n Eziptɩ tẽw tarɛ, a Etiopi tẽw dem ture nɩ nuru cɔwr a Naaŋmɩn.

³³ Tẽw zu na-mɩnɛ ten dem i, nyɩ yiele a Naaŋmɩn danʋ ƴãw, nyɩ íre a Sore yúor, Tɛw-àrʋ

³⁴ ʋl na zɔrɛ nɩ a ʋ torko a salom na be kʋralɛ a zu a. A ʋ kɔkɔr tanɩ na yi, a ʋ kɔkɔr-kpɛ̃w.

³⁵ Nyɩ sàw k'aa Naaŋmɩn tɛr'ɩ kpɛnʋ, k'ʋʋ tɛr'ɩ fãw a Ɩsɩrayɛl zu, nyɩ sàw k'aa ʋ kpɛnʋ be n a zũzuge pʋɔ.

³⁶ A ʋ zi-sõw pʋɔ ʋ na be a, a Naaŋmɩn bɛ tɛr dɩ̃ɛnʋ ɛ. A Ɩsɩrayɛl Naaŋmɩn n'ʋ, na kʋ̀rɛ kpɛnʋ nɩ fãw a ʋ nɩ-bʋʋrɛ a. Naaŋmɩn tɛr'ɩ puoru!