Sɛb-sõw yielu 66 - A SƐB-SÕW

Sɛb-sõw yielu 66 (65) sob A Naaŋmɩn na ɩ faarɛ a danʋ

1 Yiel-yielbɛ nɩ-kpɛ̃ɛ sɛbɛ pʋɔ yielu. Sɛb-sõw yielu.

¹ Yiel-yielbɛ nɩ-kpɛ̃ɛ sɛbɛ pʋɔ yielu. Sɛb-sõw yielu. Nyɩ cáarɛ a Naaŋmɩn ƴãw, tẽ-daa nɩbɛ za a.

² Nyɩ yiele ɛ́ íre a ʋ yúor vɩɛlʋ, nyɩ danɛ ʋ, ɩ k'ʋ nyɛ̃ yúor.

³ Nyɩ yel a Naaŋmɩn: «Nyɛ̃ a fʋ tome na ɩrɛ dɛ̃bɩ̃ɛ sɛw a! A fʋ dɔ̃ dem mʋʋrɛ fʋ na, fʋ na kpɛmɛ yaga a ƴãw.

⁴ A tẽ-daa nɩbɛ za gbine nɩ dume a fʋ niŋé, bɛ yiele na danɛ nɩ fʋ, bɛ yiele na danɛ nɩ a fʋ yúor.» Tɛw-àrʋ

⁵ Nyɩ wa nyɛ̃ a ʋlɩ bom nɛ a Naaŋmɩn na ɩ a. A ʋ tome sɩrɩ na ɩrɛ a nɩsaalbɛ dɛ̃bɩ̃ɛ.

⁶ Ʋ ɩ na a kʋ̃ɔ-kpɛ̃ɛ lɩɛbɩ tẽsɔw-kõw, bɛ kpɛ na gãw a man nɩ gbɛ́ɛ. Nyɩ ɩ tɩ cɩlɛ a gãda-ton ŋa ƴãw.

⁷ Naaŋmɩn dɩrɛ nɩ naalʋ kʋralɛ, a ʋ fãw zũú. Ʋ piwre nɩ a nɩ-bʋʋr-yoru: a nɩ-gaarɩ, bɛ taa wa ɩrɛ pɔ̀l-ɩb ɛ. Tɛw-àrʋ

⁸ Nɩ-bʋʋr-yoru u, nyɩ puore a tɩ Naaŋmɩn yãanɩ, nyɩ cɛ a ʋ danʋ ʋ yi vãvãvã.

⁹ Ʋ kʋ̀ tɩ nɩ a nyɔ-vʋʋrʋ, ɛ́ bɛ sàw a tɩ gbɛ́r sar ɛ.

¹⁰ Naaŋmɩn i, fʋ ɩ tɩ na kaa, mɛ̃ a lɛ bɛ na mɩ́ zuw ír a salm-pla dɛwr bɛr ʋ vɩɛl a, fʋ ɩ na tɩ wõ tuo vɩɛl.

¹¹ Fʋ ɩ na tɩ kpɛ bɛra pʋɔ, fʋ dĩ tɩ na nɩ a kpɩɛrʋ.

¹² Fʋ ɩ na nɩbɛ zɔm wie de nɩ tɩ niwn, tɩ kpɛ na tɔl vũu nɩ kʋ̃ɔ pʋɔ. Ɛcɛ fʋ ɩ na tɩ yi a be lɛb nyɛ̃ tɩ tʋɔra.

¹³ Ɩ̃ waar'ɩ a fʋ yir k'ɩ̃ɩ wa maalɩ bàwr kʋ̀ b, k'ɩ̃ɩ wa ír a nɛ́ɛ ɩ̃ na kõ kʋ̀ b a,

¹⁴ a al ɩ̃ na tɩ kõ a kpɩɛrʋ pʋɔ a.

¹⁵ Dʋ̃-kãánɩ nɩ pʋ́rɩ n'a ɩ̃ kʋ̀rɛ fʋ, ɩ̃ cɔbrɛ nɩ nadɛr nɩ bʋrali. A na dɩ n vũu a bàwr-maal-kuur zu, ɛ́ a zʋ̀ʋ́r ìr do wa ta a fʋ zie. Tɛw-àrʋ

¹⁶ Nyɩ wa, nyɩɩm za na zɔrɛ a Naaŋmɩn a, nyɩ wa bɛr wõ, ɩ̃ manɩ a ʋlɩ bom nɛ ʋ na ɩ a ɩ̃ ƴãw a.

¹⁷ Ɩ̃ kõ na bʋɔl'ʋ, ɛ́ cɔbrɩ gù na danɩ ʋ.

¹⁸ Mãa tɩ ɩ mɛ̃ ɩ̃ tɛr'ɩ pʋ-tɩɛr-faa a, a Sore kʋ̃ʋ bɛr wõ m ɛ.

¹⁹ Ɛcɛ a Naaŋmɩn bɛr'a wõ, ʋ cɛlɩ nɩ be wõ a ɩ̃ puoru.

²⁰ A Naaŋmɩn tɛr'ɩ puoru, ʋ bɛ zawrɩ a ɩ̃ puoru bɛr ɛ, ʋ mɩ̀ bɛ zawrɩ na tɛr a ʋ nɔ̃wfʋ a ɩ̃ zie ɩ.