Sɛb-sõw yielu 49 - A SƐB-SÕW

Sɛb-sõw yielu 49 (48) sob A nɩsaal bɛ kpiir tɛrɛ bom cere nɩ ɛ

¹ Yiel-yielbɛ nɩ-kpɛ̃ɛ sɛbɛ pʋɔ yielu. Koore bibiir yielu. Sɛb-sõw yielu.

² Nyɩɩm nɩ-bʋʋrɛ za a, nyɩ bɛrɛ wone yel ŋa, nyɩ ƴãw tobr, nyɩɩm tẽ-daa nɩbɛ za a,

³ nɩ-sãsaralɛ nɩ nɩ-yée e, na-mɩnɛ lãwnɩ nan dem i!

⁴ Yã-bãwfʋ ƴɛ̀rʋ n'a ɩ̃ na ƴɛ̀rɛ, a ɩ̃ tɩɛrʋ na ɩ n nɩr na tɛr yã a tɩɛrʋ.

⁵ Ɩ̃ ƴãw nɩ tobr a zʋkpaɩ ƴãw, korijom'ʋ ɩ̃ na ŋmɩɛr ír'ɩ a ɩ̃ zʋkpa-bir.

⁶ Bʋnʋ ƴãw n'a ɩ̃ na zɔrɛ dɛ̃bɩ̃ɛ a bibi-faar na mɩ́ wa vɩɛ a? A lɛn daar nɩsaal-libelibe na mɩ́ wa viiri koli mɛ̃ bɔbr a ɩ̃ faa a?

⁷ Bɛ mɩ́ ɩrɛ na ƴãwn a bɛ tɛra ƴãw, bɛ mɩ́ pɔrɛ nɩ nɩ a bɛ naalʋ na bɛ dɩ vuo a.

⁸ Ɛcɛ nɩsaal za kʋ̃ tʋ̃ɔ́ ya de a ʋ nɩsaal-tɔ nyɔ-vʋʋrʋ a Naaŋmɩn zie ɩ, bɩɩ ya de a ʋl mɩŋa nyɔ-vʋʋrʋ ɛ.

⁹ A bɛ nyɔ-vʋʋrʋ daarʋ zuo na, ɛ́ bɛ be za nãà ta ɩ.

¹⁰ Bɛ tɩɛrɛ kɛ́ bɛ na vʋʋrɛ nɩ kʋralɛ, ɛ́ kʋ̃ bãw a bɔw-zɩɛ bɩɩ?

¹¹ Ɛcɛ, ãa n'ʋ bɛ nyɛ̃ a, a yã-bãwnbɛ kpiir'a mɛ̃ a dãbol-bul a, ɛ́ mɩ́ bɛr a bɛ bʋ̃-tɛrɩ kʋ̀ nɩ-yoru.

¹² Bɛ na saa de a bɛ yée por'ɩ a bɛ tẽsɔwr a, a bɔw-zɩɛ n'ɩ a bɛ yir-pɛ-baara, a bɛ kpɛb zie n'ɩ a be, kʋrakʋralɛ,

¹³ A nɩsaal nɩ a ʋ dɛpaalʋ za a, ʋ bɛ cɛlɛ ɩ, ʋ ŋmɛ̃ na taa nɩ a dʋn na kpiir a.

¹⁴ Ɛcɛ a nɩbɛ na ƴãw a bɛ tɩɛrʋ za a bɛl mɩŋa ƴãw a, à ŋá n'a a bɛ yele na ŋmɛ̃, a bɛl na nɔnɛ a bɛ mɩŋa ƴɛ̀rʋ bɛr-wob a, à ŋá n'a a bɛ nɩdaar yele na ŋmɛ̃: Tɛw-àrʋ

¹⁵ Bɛ pàw bɛ na mɛ̃ píir a, a kpɩmɛ tẽw, a kũu n'ɩ a bɛ cɩ̃ɩnɛ. — A nɩ-mɩn na dɩrɛ nɩ naalʋ a bɛ zu. — A bɛ dasule na bɔr'ɩ fɔ̃w fɔ̃wlɛ, a kpɩmɛ tẽw n'ʋ na ɩ a bɛ kpɛb zie.

¹⁶ Ɛcɛ a Naaŋmɩn na ya na ír mɛ̃ a kpɩmɛ tẽw pʋɔ, sɩza n'a ʋ na de m'a. Tɛw-àrʋ

¹⁷ Nɩr wa kpɩɛr naalʋ a, a ʋ tɛra yúor wa yire a, fʋ̃ʋ ta zɔrɛ dɛ̃bɩ̃ɛ ɩ.

¹⁸ A ʋ kũu daar a, ʋ bɛ tɛrɛ bom za cere nɩ ɛ, a ʋ na-bome bɛ tuur ʋ siwr a bɔw pʋɔ ɩ.

¹⁹ Ʋlɛ saa nyɛ̃ ʋ wone nʋ̃ɔ̀ a ʋ nyɔ-vʋʋrʋ pʋɔ a, ɛ́ mʋʋrɛ ʋ tʋɔra a yele za na cere vla a,

²⁰ ɛcɛ a na fɛr'a ʋ lɛb tɩ páw a ʋ sãà mɩnɛ na kʋ̃ lɛb nyɛ̃ a cãà towtow a.

²¹ A nɩsaal nɩ a ʋ dɛpaalʋ za a, ʋ bɛ bãw a pɛr ɛ, ʋ ŋmɛ̃ na taa nɩ a dʋn na kpiir a.