Sɛb-sõw yielu 31 - A SƐB-SÕW

Sɛb-sõw yielu 31 (30) sob Kpɩɛrʋ sob puoru

¹ A yiel-yielbɛ nɩ-kpɛ̃ɛ sɛbɛ pʋɔ yielu kãw n'ʋ. A Daviir yielu kãw n'ʋ.

² Sore e, a fʋ naayir'a ɩ̃ zɔrɛ kpɩɛr, taa sàw k'ɩ̃ wa nyɛrɛ vĩ towtow ɛ! Faa mɛ̃ a fʋ mɩnʋ zũú.

³ Cɩɩl a fʋ tobr cɔw mɛ̃, ɛ́ wa fɔ̃w wa faa mɛ̃. Ɩ pì-kpɛ̃w a ɩ̃ zie, zɛbr-yir-kpɛ̃w na na faa mɛ̃ a.

⁴ Fʋ̃ʋ sɩrɩ n'ɩ a ɩ̃ pìir nɩ a ɩ̃ zɛbr-yir-kpɛ̃w. Fʋ na tɛr mɛ̃ na cere nɩ, ɛ́ wule mɛ̃ a sɔ́r, a fʋ yúor zũú.

⁵ Fʋ na ír mɛ̃ na bɛr a bɛra pʋɔ bɛ na ƴãw a ɩ̃ ƴãw a, fʋ̃ʋ na n'ɩ a ɩ̃ zɛbr-yir-kpɛ̃w a.

⁶ Ɩ̃ ƴãwnɛ nɩ a ɩ̃ vʋʋrʋ a fʋ nuru pʋɔ. Fʋ faa mɛ̃ na, Sore e, fʋ̃ʋ Naaŋmɩn na tɛr yel-mɩŋa a.

⁷ Ɩ̃ bɛ nɔnɛ a bɛlɩ dem na maalɛ a tɩbɛ a ɩ, mãa a, a fʋ zie n'a ɩ̃ ƴãw a ɩ̃ tɩɛrʋ, Sore e.

⁸ Ɩ̃ na cɩlɛ na ƴawr'ɩ, a fʋ nɔ̃wfʋ zũú, fʋ na nyɛ̃ a wʋ̀ʋr ɩ̃ na ɩrɛ, ɛ́ bãw a ɩ̃ kpɩɛrʋ a ƴãw.

⁹ Fʋ bɛ ƴãw mɛ̃ a dɔ̃ sob nuru pʋɔ ɩ, fʋ ɩ na ɩ̃ ɓãá ƴãw cere.

¹⁰ Sore e, zɔ ɩ̃ nɩbaalʋ! Kpɩɛrʋ nyɔw mɛ̃ na: a pʋ-sãwna sɔb mɛ̃ nɩ a niwn, ɛ́ dam a ɩ̃ sɩ́ɛ nɩ a ɩ̃ ƴã-gan za.

¹¹ A 'wɔbrʋ báarɛ nɩ a ɩ̃ nyɔ-vʋʋrʋ, ɛ́ a 'woi! 'woi! ɩ̃ na kone a báarɛ a ɩ̃ yome. A ɩ̃ sãwna ɩ na ɩ̃ bɛ cãà tɛr fãw ɛ, ɛ́ a ɩ̃ kɔbɛ dɩ kãkármɛ.

¹² A ɩ̃ dɔ̃ dem za mɩ́ tʋʋr mɛ̃ na, ɛ́ a ɩ̃ sɩman dem tʋ gãw lɛ. Ɩ̃ ƴãwnɛ nɩ a ɩ̃ nɩ-bãwnɩ dɛ̃bɩ̃ɛ, bɛlɛ wa tuori mɛ̃ a yẽw a, bɛ mɩ́ zɔ na.

¹³ Bɛ bɛ cãà tɛr a ɩ̃ tɩɛrʋ ɛ, bɛ yiiri mɛ̃ na bɛr mɛ̃ nɩr na kpi a, mɛ̃ bʋ̃-zaw a.

¹⁴ Ɩ̃ wone nɩ a ziri a nɩbɛ na ŋmarɛ a, pʋl-vʋ̃ɔ n'a a ziir za, bɛ wone nɩ taa a ɩ̃ ƴãw, bɛ bʋ̀rɛ nɩ taa a ɩ̃ kʋb ƴãw.

¹⁵ Ɛcɛ mãa a, a fʋ ƴãw n'a ɩ̃ ƴãw a ɩ̃ tɩɛrʋ. Ɩ̃ yere na: «A ɩ̃ Naaŋmɩn a, fʋ̃ʋ n'ʋ.»

¹⁶ A ɩ̃ nyɔ-vʋʋrʋ be n a fʋ nuru pʋɔ kʋralɛ. Faa mɛ̃ a ɩ̃ dɔ̃ dem nɩ a bɛlɩ dem na dɔwrɛ mɛ̃ a nuru pʋɔ.

¹⁷ Tɛr niw-vla a mãa, fʋ tõ-tõ-bie, ƴãw, faa mɛ̃ a fʋ nɔ̃wfʋ zũú.

¹⁸ Sore e, ɩ̃ na kõ bʋɔlɩ fʋ a, ta sàw k'ɩ̃ wa nyɛ̃ vĩ ɛ. Nɩ̃ɛ ɩ a nɩ-faar bɛ nyɛ̃ vĩ, bɛ siw zaa gbili a kpɩmɛ tẽw.

¹⁹ A zir-ŋmarbɛ bɛ ŋa, na mɩ́ ƴɛ̀rɛ nyɔka-ƴɛ̀rʋ nɩ pɔ̀l-ƴɛ̀rʋ a, na mɩ́ ɩrɛ a nɩ-mɩŋa laar a, pàw bɛ a nɛ́ɛ.

²⁰ Ɛcɛ Sore e, a maalʋ bɛ dɩ vuo ɩ, fʋ na bin gùre nɩ a bɛlɩ dem na zɔrɛ fʋ a! Nɩr za na tʋ̃ɔ́ na nyɛ̃ a maalʋ fʋ na kʋ̀rɛ a bɛlɩ dem za na zɔrɛ kpɩɛr a fʋ naayir a.

²¹ Fʋ mɩ́ sɔwlɩ bɛ nɩ a fʋ zie be, zãá nɩ a nɩsaalbɛ gõlõgõlõ. Fʋ mɩ́ sɔwlɩ bɛ nɩ a fʋ yir pʋɔ, zãá nɩ a nɩbɛ nɛ́ɛ.

²² A Sore tɛr'ɩ puoru, a ʋ nɔ̃wfʋ maal'ɩ nɔ-ɓãa-yel a ɩ̃ ƴãw, mãa na tɩ ɩ mɛ̃ tẽw bɛ na ŋmãa jil a.

²³ Mãa ƴãw a, a tɩɛrʋ tɩ dam mɛ̃ na, ɩ̃ yere: «Mãa n'ɩ ŋan bɛ diw bɛr a fʋ niŋé.» Ɛcɛ ɩ̃ na tɩ zɛlɛ fʋ a yãayãa a, fʋ tɩ wõ a na, a lɛ ɩ̃ na tɩ kone bʋɔlɛ fʋ a.

²⁴ Nyɩ nɔnɛ a Sore, nyɩɩm za na sàw de ʋ a, bʋ̃ʋ n'ʋ vɛ̃, a Sore mɩ́ gùre nɩ a bɛlɩ dem na sàw de ʋ a. Ɛcɛ ʋ mɩ́ dɔwr'ɩ a pɔ̀lʋ sob faa faa.

²⁵ Nyɩɩm za na ƴãw a nyɩ tɩɛrʋ a Sore ƴãw a, nyɩ dɩ kanyir ɛ́ tɛr soci-kpɛ̃w.