Sɛb-sõw yielu 108 - A SƐB-SÕW

Sɛb-sõw yielu 108 (107) sob Danʋ yielu nɩ puoru

¹ Yielu. Sɛb-sõw yielu Daviir na maalɩ a.

² Naaŋmɩn i, ɩ̃ bɛr'ɩ dɛ̃bɩ̃ɛ, ɩ̃ na yiele na, yiele danɛ nɩ fʋ nɩ ɩ̃ pʋɔ za!

³ Nyɩ ìr, ɩ̃ korijom nɩ ɩ̃ kãkaara a: ɩ̃ na sɩ̃w nɩ a zi-wɛl-paala.

⁴ Sore e, ɩ̃ na danɛ fʋ nɩ a nɩ-bʋʋrɛ sɔgɔ, ɩ̃ na yiele na ŋmɩɛr'ɩ bome a fʋ ƴãw, a nɩ-bʋʋrɛ sɔgɔ,

⁵ a fʋ nɔ̃wfʋ ɩ n kpɛ̃ɛ zuo a salom, ɛ́ a fʋ yel-mɩŋa do tɔ a zũzuge.

⁶ Ìr do gãw a salom, Naaŋmɩn i, ɛ́ a fʋ yúor-vɩɛlʋ-danʋ nyɩwrɩ pàw a tẽw za!

⁷ Sɔ̀w tɩ ɛ́ faa tɩ, a fʋ nɩ-nɔnɩ sɩrɩ nyɛ̃ a faafʋ.

⁸ Naaŋmɩn ƴɛ̀r'ɩ a ʋ yir-sõw pʋɔ yel: «Ɩ̃ pone nɩ a Sɩsɛm tẽw cɩlɛ nɩ, ɩ̃ manɛ nɩ a Sukotɩ tẽw bà-fʋɔla.

⁹ Mãa so a Galaadɩ tẽw nɩ a Manase tẽw za. Efarayim n'ɩ a ɩ̃ kpawɔ-kpow, ɛ́ Zuda ɩ a ɩ̃ naalʋ-dabɔl.

¹⁰ Mowab n'ɩ a ɩ̃ kʋ̃ɔ-so-laa, ɩ̃ lɔb'ɩ a ɩ̃ nafaga dɔwlɩ a Edɔm tẽw zu. Ɩ̃ ŋmɩɛr'ɩ a zɛbr cɛl a Filisɩtɛ̃ tẽw ƴãw.»

¹¹ Ãa n'ʋ na tɛr mɛ̃ cen nɩ tẽw bɛ na cɔbrɩ a zɛbr ƴãw a pʋɔ? Ãa n'ʋ na tɛr mɛ̃ tɩ sãá nɩ a Edɔm tẽw?

¹² A bɛ ɩ a fʋ̃ʋ, Naaŋmɩn i? Ɛcɛ fʋ jɛ tɩ na bɛr, fʋ bɛ cãà bɩɛlɛ a tɩ zɛbr-nɩbɛ ɩ.

¹³ Wa sõw tɩ a dɔ̃ sob ƴãw, bʋ̃ʋ n'ʋ vɛ̃, nɩsaal sõwfʋ ɩ n bɛlʋ.

¹⁴ Tɩ na tõ n gãda-tome lãwnɩ a Naaŋmɩn, ʋl mɩŋa na nɛb'ɩ a tɩ dɔ̃ dem nɩ gbɛ́ɛ.