Nahum 3 - A SƐB-SÕW

Kũuni paal'ɩ a Nɩnɩɩvʋ tẽw

¹ Baw-bio páw nɩ a Nɩnɩɩvʋ tẽ-kpɛ̃ɛ, be zɩ̃ɩ na gbɔlɛ a, ziri nɩ po-to-fãw-ɩb'a paalɩ ʋ, ɛ́ a nɩbɛ fáb bɛ be na baarɩ a ʋ zie ɩ!

² A fʋbr siwr'ɩ wɩb wɩb a wie zu, a torkori gbɛ́ɛ ɩrɛ gɔmɛ, a wie garɛ, ɛ́ a zɛbr-torkori ƴawr dúor.

³ A wi-zɔmnbɛ garɛ na waar, a zɛbr-sɔ-bɛrɛ nyɩwrɛ nɩ pɩnpɩn, a kafine mɩ̀ nyɩwrɛ mɛ̃ saa a. Kũuni n'a a ziir za, a kũuni gbone nɩ taa, a bɛ tɛr sɔ́rʋ ɛ, a nɩbɛ kawr'ɩ a kũuni ƴãw lore!

Vĩ nyɔw nɩ a Nɩnɩɩvʋ tẽw

⁴ A Nɩnɩɩvʋ tẽw ɩ n pɔw-yɛm a pɩ̃ɔ-ɩb na yãwmɛ yaga a. A ʋ vɩɛlʋ nɩ a ʋ sɔ-ɩb ʋ na bãw a, tɩ tawr'ɩ nɩbɛ waar'ɩ a ʋ zie. Nɩ-bʋʋr-yoru nɩ dɔwlʋ bʋʋrɛ bʋʋrɛ tɩ lɩɛb'ɩ a ʋ gbãgbaar, a ʋ pɩ̃ɔ ɩ-ɩrɩ nɩ a ʋ sɔ-ɩb zũú.

⁵ A Sore, a Kpɛnʋ-za-sob, yere na kʋ̀rɛ ʋ: Mãa n'ɩ ŋan ìr a fʋ ƴãw, ɩ̃ na vaar'ɩ a fʋ kparʋ do n tɩ tɔ a fʋ niwn, ɩ̃ na wul'ɩ a fʋ faalʋ a nɩ-bʋʋr-yoru, bɛ za na nyɛ̃ nɩ a fʋ vĩ.

⁶ Ɩ̃ na cir'ɩ sagɛ pàw fʋ, ɩ̃ na ɩ na vĩ kpɛ b. Ɩ̃ na ɩ na a nɩbɛ za jɩ́rɛ fʋ.

⁷ Lɛ n'a a bɛlɩ dem nãà mɩ́ wa nyɛ̃ b a na mɩ́ lɩɛb zɔ. Bɛ na ŋmɩɛr'ɩ cɛlsɩ yere nɩ: «Nɩnɩɩvʋ tẽw sãw na, ãa n'ʋ na zɔrɛ a ʋ nɩbaalʋ? Nyɩnɛ n'a bɛ na nyɛ̃ mɔwl-mɔwlbɛ a ʋ ƴãw?»

A Nɩnɩɩvʋ tẽw yele na ŋmɛ̃ na taa nɩ Tɛb tẽw yele

⁸ Nɩnɩɩvʋ ʋ, fʋ sa n a Tɛb tẽw bɩɩ? Ʋl na tɩ be a Nɩl man-gbɛ́ɛ sɔgɔ, kʋ̃ɔnɩ viiri koli ʋ, ɛ́ a kʋ̃ɔ-kpɛ̃ɛ piw ʋ tɛr vla vla mɛ̃ dacin a.

⁹ Etiopi nɩ Eziptɩ ten tɩ kʋ̀rɛ ʋ nɩ na-bome na bɛ tɛr baarʋ a. Putɩ nɩ Libi ten dem tɩ n'ɩ a ʋ kpɛ-ta-dem.

¹⁰ Ɛcɛ bɛ mɩ̀ tɩ diw nɩ a Tɛb tẽw dem cen nɩ gbãgbaalʋ pʋɔ, tẽ-yũo. Bɛ mɩ̀ tɩ kʋ n a ʋ bibiir a sɔ-carɩ za pʋɔ. Bɛ tɩ ƴãw nɩ a ʋ nɩ-bɛrɛ za bamɛ, bɛ tɩ ŋmɛ n gbãw põ a ʋ nɩ-yée.

¹¹ Nɩnɩɩvʋ ʋ, a kpɩɛrʋ mɩ̀ na kpɛ b'a tɩ sɩw, fʋ na lim'ɩ fʋ za a kpɩɛrʋ pʋɔ, fʋ mɩ̀ na bɔ n sɔwlʋ zie, k'aa fʋ dɔ̃ dem ta páw fʋ ɛ.

A Nɩnɩɩvʋ tẽw lore na

¹² A fʋ zɛbr-yir-kpɛn za ŋmɛ̃ na taa nɩ kãkã-mɔmɛ: bɛlɛ wa mĩine a tɩɛ wa báarɛ a, a mɩ́ lo n a sob nɛ na bɔbr k'ʋʋ 'wɔb a a nʋɔrɩ́.

¹³ A fʋ zɛbr-nɩbɛ ɩ na mɛ̃ pɔwbɛ na bɛ tɛr fãw a, a fʋ tẽw dɩ̃dɛɛ yuo nɩ 'he'hee a fʋ dɔ̃ dem niŋé: vũu dɩ n a fʋ dà-jɩ̀rɩ́.

¹⁴ Nɩnɩɩvʋ tẽw dem i, nyɩ 'wɔ̃w kʋ̃ɔ gùre nɩ bɛ na na wa piw nyɩ a, nyɩ lɛb cɔbrɩ a nyɩ zɛbr-yir-kpɛn ƴãw, nyɩ kpɛ a mɛ̃mɛrɛ pʋɔ, nyɩ nɛb a yawra, nyɩ cɔbrɩ a birki-laar.

¹⁵ Ɛcɛ a nyɩ tẽw bɛ na na nyɩw a, vũu na dɩ nyɩ na kʋ, bɩɩ a zɛbr-sɔ-kpɛ̃ɛ na baarɩ nyɩ na mɛ̃ sãsowe na mɩ́ baarɩ tɩ-vaar a. A nyɩ nɩbɛ tɩ ƴɔ̃ƴɔ̃wn na mɛ̃ sãsowe na mɩ́ mɛ taa a, mɛ̃ sɩw-zam a.

A Nɩnɩɩvʋ tẽ-kpɛ̃ɛ nɩbɛ na baar'a

¹⁶ A nyɩ yɛ-yɛrbɛ tɩ yãwmɛ na zuo saa ŋmar-bie. Ƴɛrɛŋa a, bɛ bɔr'a mɛ̃ sãsow-nãa-nʋrɩ na mɩ́ ƴawrɩ a.

¹⁷ A nyɩ gùrbɛ tɩ bʋwl'ɩ a ziir za mɛ̃ sãsowe a, ɛ́ a nyɩ tõ-tõ-bi-bɛrɛ ɩ mɛ̃ bʋ̃-biir na mɛ taa mɛ̃ sɩw-zam a, a mɩ́ mɛ mɛ n a dabawr ƴãw a ƴawr daar, ɛ́ a mʋ̃tɔ̃w wa pure a, a mɩ́ bɔr'a, bɛ bɛ bãw a zi-cena ɩ. Nyɩnɛ n'a a pãa cen a?

Yele na sãw bɛ tɛr maalʋ a

¹⁸ Asiiri tẽw nãà a, a nɩ-bɛrɛ fʋ na ƴãw a ten pʋɔ a, bɛ gúr'a kʋ̃ lɛb ìr ɛ, a fʋ sojarɩ nɩ-bɛrɛ bɛ cãà damnɛ ɩ. A fʋ nɩbɛ yàar'a pàw a tan, ɛ́ nɩr bɛ ka be na lɛb kaalɩ bɛ ɓã taa ɩ.

¹⁹ A fʋ yele sãw na bɛ lɛb tɛr maalʋ ɛ, a fʋ natɩɛ bɛ tɛr tɩ̃ɩ ɛ, bɛlɩ dem za na mɩ́ wone a fʋ yele a, bɛ mɩ́ ŋmɩɛr'ɩ kuryii a faa na ta b a ƴãw, bʋ̃ʋ n'ʋ vɛ̃, ãa zie n'a fʋ bɛ ɩ a fʋ po-to-ɩb kʋralɛ?