A Zɔb sɛbɛ 34 - A SƐB-SÕW

A Elihu manɛ nɩ a Zɔb sãwna

¹ Lɛ n'a a Elihu tɩ lɛb de a ƴɛ̀rʋ yel:

² Yã-bãwnbɛ ɛ, nyɩ bɛr wõ a ɩ̃ ƴɛ̀rʋ, ɛ́ nyɩɩm bãw-bãwnbɛ ɛ, nyɩ ƴãw tobr.

³ Bʋ̃ʋ n'ʋ vɛ̃, tobr so a ƴɛ̀rʋ vɩɛlʋ bãwfʋ, mɛ̃ a lɛ a zɛl na so a bʋ̃-dɩrɩ nʋ̃ɔ̀ bãwfʋ a.

⁴ Tɩ lãw bɔ a lɛ-na-tu-sɔr-a, tɩ lãw jɛl a lɛ na vɩɛl a kaa.

*

⁵ Mɛ̃ a Zɔb taa yel: «Ɩ̃ ɩ n nɩ-mɩŋa, ɛcɛ a Naaŋmɩn bɛ sàwr a ɩ̃ mɩnʋ ɛ.

⁶ Ɩ̃ na saa tɛr yel-mɩŋa a, bɛ mɩ́ nyɛ̃ m'a ɩ̃ ɩ zir-ŋmarɛ, pĩi nyɔw mɛ̃ na faar na kʋ, ɩ̃ɩ bɛ maalɩ yel-bier ɛ.»

⁷ A Zɔb tɛr'ɩ ʋ tɔ ɔ? Ʋ mɩ́ ɩ n a nɩr la mɔlɛ mɔlɛ mɛ̃ ŋmale pʋɔ kʋ̃ɔ ʋ na nyũ a!

⁸ Ʋlɛ nɩ a yel-fa-maalbɛ nɛbɛ lãwnɛ, ɛ́ ʋlɛ nɩ nɩ-faar'a lãw dɛnɛ.

⁹ Mɛ̃ ʋ taa yel: «Tɔnɛ kãw za bɛ ka be a nɩsaal na bɔbr kɛ́ ʋlɛ nɩ Naaŋmɩn kpɛ taa a ɩ.»

*

¹⁰ A na ɩ à ŋá a, nyɩɩm yã-bãwnbɛ, nyɩ bɛrɛ wone mɛ̃: A Naaŋmɩn kʋ̃ tʋ̃ɔ́ maalɩ yel-faa towtow ɛ, a Kpɛnʋ-za-sob kʋ̃ tʋ̃ɔ́ ɩ ɩb na bɛ tu sɔ́r a ɩ!

¹¹ Bʋ̃ʋ n'ʋ vɛ̃, ʋ mɩ́ kʋ̀ n a nɩsaal a ʋlɩ bom nɛ ʋ na sɛw taa nɩ a, ɛ́ ya ŋa za man nɩ a ʋ ɩb.

¹² Yel-mɩŋa n'a, Naaŋmɩn bɛ ɩrɛ faa towtow ɛ, a Kpɛnʋ-za-sob bɛ sãwnɛ yel-na-tu-sɔr-a bɛrɛ ɩ,

¹³ Nɩ-yũo n'ʋ kʋ̀ ʋ a tẽw k'ʋʋ tɛlɛ bɩɩ? Nɩ-yũo n'ʋ ƴãw ʋ kaarɛ a tẽ-daa zie e?

¹⁴ A Naaŋmɩn tɩ ɩ mɛ̃ ʋ tɩɛrɛ nɩ ʋl yõ yele a, ʋlɛ tɩ ɩ mɛ̃ ʋ lɛb'a de a ʋ vʋʋrʋ na ɩrɛ a nɩsaalbɛ vʋʋrɛ a,

¹⁵ a bʋ̃-vʋʋrɩ za nãá lãw na ŋmãa vʋʋrʋ, ɛ́ a nɩsaal nãá lɛb'a lɩɛbɩ tanɛ.

*

¹⁶ Zɔb i, fʋ̃ʋ na tɛr yã a, bɛr wõ a yel ŋa, ƴãw tobr vla a ɩ̃ ƴɛ̀rʋ ƴãw.

¹⁷ A yel-na-tu-sɔr-a dɔ̃ sob na tʋ̃ɔ́ na dɩ naalʋ ʋ? Fʋ na sàw na yel k'aa Kpɛnʋ-za-sob na ɩ a Mɩŋa sob a, sãw na a?

¹⁸ Ʋl yõ n'ʋ na tʋ̃ɔ́ yel a nãà: «Fʋ bɛ tɛr pɛr ɛ!» ɛ́ yel a nɩ-bɛrɛ: «Nɩ-kʋrbɛ n'ɩ nyɩ!»

¹⁹ Ʋl yõ n'ʋ bɛ mɩ́ kpɛ a nɩ-bɛrɛ ɩ, ɛ́ bɛ mɩ́ ƴãw a tɛra sob zuo a nã́w sob ɛ, bʋ̃ʋ n'ʋ vɛ̃, bɛ za ɩ n a ʋ nuru bʋ̃-maalɩ.

²⁰ Bɛ mɩ́ wa ur'a kpi tɩ̃ɩsɔw-bɩ̃ɩn: a nɩbɛ mɩ́ gaarɩ na ɛ́ kʋ a tẽ-kaarbɛ, bɛ mɩ́ kʋ n a po-to-sob mɔlɛ mɔlɛ lɛ.

²¹ Bʋ̃ʋ n'ʋ vɛ̃, a Naaŋmɩn jɩ́rɛ nɩ a nɩsaal ɩb, ʋ piwre nɩ a ʋ gbɛ-ceni za.

²² Liw-sɛbla varkpara bɛ be be a yel-fa-maalbɛ na tʋ̃ɔ́ sɔwlɩ ɛ.

*

²³ A bɛ tɛr k'aa Naaŋmɩn piwri a nɩsaal kɔwrɩ tʋ̃ɔ́ bʋɔl'ʋ ƴɛ̀rʋ zie a ʋ niŋé ɩ.

²⁴ Ʋ mɩ́ ŋmɛ n a fãw dem lɔb ɛ́ bɛ sowri bãw a bɛ sãwna ɩ, ɛ́ zɩɩlɩ nɩ-yoru bɛ lɩɛrɩ bɛ.

²⁵ Ʋ bãw nɩ a bɛ ɩ-ɩrɩ, alɛ n'a so tɩ̃ɩsɔw-been ʋ mɩ́ ŋmɛ bɛ lɔb ɛ́ taalɩ bɛ kʋ.

²⁶ Ʋ mɩ́ ɓa ɓa bɛ nɩ a nɩ-yaga niŋé mɛ̃ nɩ-kʋrbɛ a.

²⁷ Bʋ̃ʋ n'ʋ vɛ̃, a nɩbɛ bɛ ŋa tɩ gur'ɩ pùor cɔw ʋ, bɛ bɛ tɩ bɔbr kɛ́ bɛ bãw a ʋ wulu ɛ.

²⁸ À ŋá n'a bɛ ɩ ƴãw a bãbàal nɩ a nã́w sob kõ bʋɔlɩ ʋ k'ʋʋ faa bɛ. Ɛ́ a kon á ŋá taabɛ a, ʋ mɩ́ bɛr'a wõ.

*

²⁹ Ɛcɛ ʋlɛ saa ɩ gbili a, ãa n'ʋ na yel k'ʋʋ sãw na? Ʋlɛ wa sɔwlɛ a, ãa n'ʋ na tʋ̃ɔ́ cãà nyɛ̃ ʋ? Ɛcɛ ʋ gùre nɩ a ten nɩ a nɩbɛ,

³⁰ bɛ bɔbr kɛ́ nɩ-faa dɩ naalʋ ɛ, nɩ k'ʋʋ bɛ̀lɛ a nɩbɛ ɩ.

³¹ Ɛcɛ nɩr wa yel a Naaŋmɩn: «Ɩ̃ maal'ɩ a ɩ̃ sãwna dɔwrʋ baarɩ, ɩ̃ kʋ̃ lɛb sãw ɛ.

³² Bom nɛ ɩ̃ na bɛ nyɛ̃ a, a fʋ̃ʋ mɩŋa a, wul mɛ̃ ɩ̃ nyɛ̃ ʋ. Mãa wa ɩ ɩ-faa a, ɩ̃ kʋ̃ lɛb ɩ ɛ.»

³³ Fʋ̃ʋ na nyɛ̃ a, a Naaŋmɩn sɛw na k'ʋʋ dɔwrɩ a nɩr ŋa a? A bɛ ɩrɛ fʋ bom ɛ, ɩ̃ bãwnɩ a na. Ɛcɛ fʋ zie n'a a be, mãa zie bɛ n'a ɩ, yel a lɛ fʋ na tɩɛr a.

*

³⁴ A nɩbɛ na tɛr yã a, nɩ a yã-bãwnbɛ na bɛr wõ m a na yel mɛ̃ na:

³⁵ «A Zɔb ƴɛ̀rɛ na ɛ́ bɛ bãw bom nɛ ƴɛ̀rʋ ʋ na ƴɛ̀rɛ a ɩ, a ʋ ƴɛ̀rʋ wule na k'ʋʋ bɛ bãw bom za ɩ.

³⁶ Ʋ na ƴɛ̀rɛ mɛ̃ a yel-fa-maalbɛ a, ɩ̃ bɔbr'a kɛ́ bɛ ɩ ʋ kaa tɩ tɔ.

³⁷ Bʋ̃ʋ n'ʋ vɛ̃, ʋ gaarɛ na ƴãw pʋɔ a ʋ sãwna ƴãw, ʋ lɛb'a bãw zɛbr'ɩ a Naaŋmɩn bɛ dɩ vuo ɩ ƴãw tɩ bʋ́nɛ.»