A naaŋmɩn-ƴèr-manɛ Oze sɛbɛ 7 - A SƐB-SÕW

¹ A lɛn daar ɩ̃ na mɩ́ bɔbr k'ɩ̃ɩ sanɩ a Ɩsɩrayɛl a, a lɛn daar'a ɩ̃ mɩ́ nyɛ̃ a Efarayim sãwna nɩ a Samaari nɩ-kʋ yele. Ziri n'a bɛ ŋmarɛ a ziir za, nyãnyuwr kpɩɛr'ɩ a yie pʋɔ, a yẽw a, nyãnyu-nɩ-kʋrbɛ bɛ bɛrɛ a nɩbɛ ɩ.

² Bɛ bɛ mɩ́ tɩɛr'ɩ bɛ pʋɔ ɩ̃ na bɛ yiire a bɛ ɩ-faar kãw za bɛrɛ a ɩ. Ƴɛrɛŋa a, a bɛ ɩ-faar pili na pàw bɛ. Alɛ n'ɩ a ŋan gã a ɩ̃ niŋé.

³ A bɛ ɩ-faar ɩrɛ nɩ nʋ̃ɔ̀ a nãà, ɛ́ a bɛ ziri ɩrɛ nʋ̃ɔ̀ a niw-dierbɛ.

⁴ Bɛ za ɩ n pɩ̃ɔ-yel-bier-maalbɛ. Bɛ ɩ na mɛ̃ dipɛ̃ sɛb zie na tʋlɛ kpãkpã a dipɛ̃-maalɛ bɛ cãà gbɔwr vũu ƴãwn, a lɛ ʋ na dɛ bu a zɔ baarɩ ɛ́ gù a tɩ ìr a.

⁵ A bɛ nãà cuw bibir a, a ʋ tõ-tõ-bi-bɛrɛ mɩ́ nyũ n a divɛ̃ zuo tɩ ɩ n bàalbɛ. Bɛ mɩ́ ɩrɛ nɩ a nɩbɛ laar ɛ́ a nãà cɔwrɛ bɛ.

⁶ A bɛlɩ dem na cɔbrɛ a yel-faa maalʋ a mɩ́ tʋlɛ na mɛ̃ dam a. A tɩ̃ɩsɔw za a, a bɛ suur mɩ́ gúre na, ɛ́ a zie wa vɩɛrɛ ʋ dɩrɛ mɛ̃ vũu-kpɛ̃ɛ a.

⁷ Bɛ za tʋlɛ nɩ kpãkpã mɛ̃ dipɛ̃ sɛb zie a. Bɛ kʋrɛ nɩ a bɛ niw-dierbɛ. A bɛ na-mɩnɛ lore na lɩɛrɛ taa, ɛ́ kãw za bɛ nɔnɛ k'ʋʋ kõ cɔw mɛ̃ ɩ.

⁸ A Efarayim kpɩɛr'a jɛr a nɩ-bʋʋr-yoru. Ʋ ɩ na mɛ̃ sɛ̃sɛ̃ bɛ na bɛ lɩɛbɩ a.

⁹ Nɩ-sãanbɛ báarɛ nɩ a ʋ fãw, ʋʋ bɛ bãwnɩ a ɩ. Ʋ bul'ɩ zukɔbr pɛlɛ baarɩ, ɛ́ cãà bɛ bãwnɩ a ɩ.

¹⁰ A Ɩsɩrayɛl nyʋ̀ʋ́r, alɛ n'a yere a ʋ sãwna. Ɛcɛ bɛ bɛ lɛbr waar a Sore bɛ Naaŋmɩn zie ɩ. À á ŋá za na saa ta bɛ a, bɛ bɛ bɔbr a Sore ɩ.

¹¹ A Efarayim ŋmɛ̃ na mɛ̃ naŋmam na bɛ tɛr yã bɛ mɩ́ bɛlɩ nyɔw mɔlɛ lɛ a: ʋ mɩ́ bʋɔl'ɩ a Eziptɩ tẽw k'ʋʋ wa sõw ʋ, ɛ́ mɩ́ zɔ cen Asiiri tẽw.

¹² Ɛcɛ a lɛn daar bɛ na mɩ́ zɔrɛ cere a be a, lɛn daar'a a ɩ̃ mɩ̃ɛ lore a bɛ zu. Ɩ̃ mɩ́ ɩ na bɛ lo mɛ̃ saa-zu lili a, ɩ̃ mɩ́ nyɔw bɛ na nɩ a ɩ̃ bɛra mãa wa wõ bɛ ɓanɛ taa a.

¹³ «Zu-bio páw bɛ na, bɛ na zɔrɛ zãánɛ nɩ mɛ̃ a, bɛ na ír zɛbr'ɩ mɛ̃ a, a bɛ loba n'a ta. Bɛ ŋmarɛ nɩ ziri ƴãwn mɛ̃, ɩ̃ɩ pãa na faa bɛ ɛ?

¹⁴ A bɛ pʋɔ za bɛ n'ʋ bɛ mɩ́ kone cɔwr'ɩ mɛ̃ ɩ. Ɛcɛ bɛ mɩ́ gã na kone, wɛrɛ nɩ a bɛ ƴã-gan, tɩɛr kɛ́ lɛ n'a bɛ na ɩ a bɛ ble nɩ a bɛ divɛ̃ tɩ-wɔmɛ maalɩ vla. À à ŋá bɛ na ɩrɛ a, mãa n'ʋ bɛ zawrɛ bɛrɛ.

¹⁵ Ɛcɛ mãa n'ʋ tɩ kaa a bɛ zie, mãa n'ʋ tɩ kʋ̀ bɛ a fãw! Zɩ̃ kɛ́ tɩɛr-faar tɛwr'a bɛ tɩ tɛr a ɩ̃ ƴãw.

¹⁶ Bʋ̃-zawlɛ zie n'a bɛ lɛbr cere, bɛ ŋmɛ̃ na mɛ̃ tã-kaba a. Zɛbr-sɔ-kpɛ̃ɛ n'ʋ na kʋ a bɛ niw-dierbɛ a bɛ nyɔka-ƴɛ̀rʋ ƴãw, lɛ n'a a nɩbɛ na la bɛ wõ nʋ̃ɔ̀ a Eziptɩ tẽw!»