A Ɛsɩtɛɛr sɛbɛ na sɛb'ɩ a gɩrɛkɩ kɔkɔr a 8_1 - A SƐB-SÕW

A sɛb-tʋɔla bɛ na sɛb a Zifʋ mɩnɛ vla ƴãw a

¹³ A sɛb-tʋɔla ƴɛ̀r-bie n'ɩ á ŋá: «A na-kpɛ̃ɛ Artazɛrsɛsɩ puore nɩ a ʋ lɩɛrbɛ na tone a naalʋ-tẽw tẽ-ŋma-kʋ̀rɩ lɩz'a ayopõi (140) pʋɔ a, a na tĩ a Ɛ̃dɩ tɩ tɔ a Etiopi a, nɩ a nɩbɛ bɛl na tu ʋ a.

¹⁴ Nɩbɛ yaga zie mɩ́ zɛwr'ɩ bɛ tʋɔra, a lɛn daar a bɛlɩ dem na maalɛ bɛ vla a, na mɩ́ wa ƴãw bɛ yaga za a.

¹⁵ Lɛ n'a bɛ bɛ mɩ́ sàw tɛr a ƴãwfʋ bɛ na páw a tɛwr ɛ. Ɛcɛ mɩ́ bɔbr kɛ́ bɛ mal a nɩbɛ na tu tɩ a, ɛ́ mɩ́ bʋ̀rɛ taa a nɩbɛ na maalɛ bɛ vla a ƴãw ƴãw pʋɔ.

¹⁶ A nɩsaalbɛ na cɛ a na mɩ́ maalɩ bɛ a vla a, bɛ bɛ mɩ́ tɛr a tɩɛrʋ ɛ. Bɛ mɩ́ tu n nɩbɛ na bɛ bãw bʋ̃ʋ n'ɩ a vla a ɛ́ pɔrɛ a pùor. Mɩ́ tɛr lɛɛɛ, tɩ tɩɛr kɛ́ bɛ na nɩɩr'ɩ a Naaŋmɩn mɩnʋ bɛr, ʋl na nyɛrɛ bom za ɛ́ hɩ̃ɛn a faa a.

¹⁷ Gb'aa yaga za mɩ̀, a bɛlɩ dem na dɩ a nɩ-kpɛ̃ɛnʋ a mɩ́ de nɩ a bɛ bome kʋ̀ bɛ bárɩ bɛl ƴãw bɛ na ƴãw a bɛ tɩɛrʋ a bɛ kaarɛ. Al pùorí bɛ de a bɛ bárɩ bɛ ŋa ɩ-ɩrɩ. A lɛn daar a, bɛ na tʋ̃ɔ́ na mɩ́ pʋɔ ɩ kũu lo nɩbɛ na bɛ tɛr sãwna a zu, ɛ́ bɛ lo yel-faar na bɛ tɛr lɛb maal-ƴãwfʋ pʋɔ.

¹⁸ Bʋ̃ʋ n'ʋ vɛ̃, a bárɩ bɛ ŋa na tʋ̃ɔ́ na tuli a bɛlɩ dem na dɩrɛ a nɩ-kpɛ̃ɛnʋ a tori a nɩ tɩɛrʋ na bɛ tori ɛ́ tɛr gɛgɛ-ɩb nɩ ziri na malɛ yaga za a.

¹⁹ Sɩza n'a, a bɛlɩ dem na tone a bɛ tome a lɛ a na bɛ sɛw kɛ́ bɛ tone a, mɩ́ maal'ɩ yel-faa-bɛrɛ bɛrɛ yaga yaga za. A yel-kore a tɩ sãàkʋm-kore na lʋɔrɩ kʋ̀ tɩ a pʋɔ tɛwr bɛ n'a a yele á ŋá taabɛ nyɛrɛ ɩ, a mɩ̀ nyɛrɛ nɩ a yele na ɩrɛ viiri koli tɩ a ƴɛrɛŋa a pʋɔ.

²⁰ Lɛ so, nɩdaar ƴãw a, ɩ̃ na ƴãw nɩ fãw, a ɩ̃ naalʋ-tẽw nɩbɛ za tɛr ƴã-ɓaarʋ ɛ́ bɛr tɩɛrʋ ɛ́ vʋʋrɛ.

²¹ A lɛ ƴãw a, ɩ̃ na lɩɛb'ɩ a yele a na fɛr k'aa lɩɛbɩ a, ɛ́ mɩ́ jɛl a yel bɛ na wa n a ɩ̃ zie a mɛ̃ a lɛ na mɩ́ sɛw nɩ a.

²² Mɛ̃ a Hamedata bidɛb Haman yele a. Masedʋan tẽw nɩr, nɩ-sãan a Pɛrsɩ mɩnɛ bʋʋrɛ zie, ɛ́ bɛ tɛr nɔ̃wfʋ mɛ̃ a tɩɩm a ɩ.

²³ Ɛcɛ ɩ̃ tɩ sàw na de ʋ a ɩ̃ zie, ɩ̃ tɩ nyɔw ʋ nɩ nɩ báalʋ, a báalʋ ɩ̃ na mɩ́ nyɔw nɩ bʋʋrɛ kãw za nɩbɛ a, ʋ dɩ kɛ́: Sãà. A nɩbɛ za mɩ́ tɩ gũu na tɩ tɔ tẽw a ʋ niŋé, bʋ̃ʋ n'ʋ vɛ̃, a ɩ̃ pùorí a, ʋlɛ tɩ n'ʋ zuo a nɩbɛ za.

²⁴ Ɛcɛ, ʋ bɛ tɩ tʋ̃ɔ́ nyɔw ʋ tʋɔra a ʋ pɔ̀l-ɩb pʋɔ ɩ, ɛ́ tɩ ƴãw fãw k'ʋʋ de a ɩ̃ naalʋ ɛ́ kʋ m.

²⁵ Bʋ̃ʋ n'ʋ vɛ̃, ʋ tɩ ŋma n zir-pɛ-bʋʋrɛ za, bɔbr'ɩ k'ɩ̃ɩ ƴãw bɛ kʋ a Maadose, a nɩr ŋa na tɩ faa mɛ̃, ɛ́ bɔbr a ɩ̃ vla kʋralɛ a. Ʋ mɩ̀ tɩ bɔbr'a k'ɩ̃ɩ ƴãw bɛ kʋ a Ɛsɩtɛɛr, a pɔw ŋa na sõwne mɛ̃ vla vla a ɩ̃ naalʋ-dɩb pʋɔ a, ɛ́ mɩ̀ kʋ a ʋ bʋʋrɛ za pàw pɛr.

²⁶ À ŋá n'a ʋ tɩ ɩrɛ tɩ́ɛrɛ nɩ k'ɩ̃ɩ ta tɛr tɩɛrɛ ɩ, ʋʋ de a Pɛrsɩ mɩnɛ naalʋ-tẽw kʋ̀ a Masedʋan tẽw dem.

²⁷ Ɛcɛ ɩ̃ nyɛ̃ na k'aa Zifʋ mɩnɛ, a nɩ-kʋrɛ gb'a ata ŋa na tɩ bɔbr k'ʋʋ ɩ bɛ kpi a, bɛ ɩ nɩ-faar ɛ. Bɛ nɩ̃ɛ na vʋʋrɛ a bɛ nyɔ-vʋʋrʋ tu n nɛ́ɛ na sɩrɩ tu mɩnʋ a.

²⁸ Bʋ̃ʋ n'ʋ vɛ̃, Naaŋmɩn-na-do-saa-bɛ-pɩɛl-a, a Naaŋmɩn na vʋʋrɛ a, bibiir nɛbɛ. Ʋlɛ n'ʋ ɩ a ɩ̃ naalʋ-tẽw be tɛra pʋɔ, a ɩ̃ sãàkʋm-kore daar za wa tɔ a dɩ̃a.

²⁹ A na ɩ à ŋá a, nyɩmɛ bɛ wa tu a sɛb-tʋɔlɩ a Hamedata bidɛb Haman na tɩr kʋ̀ nyɩ a, a na ɩ n vla.

³⁰ Bʋ̃ʋ n'ʋ vɛ̃, a sob nɛ na sɛb a a, bɛ yawl'ʋ nɩ dàa zu kʋ, ʋlɛ nɩ a ʋ yir dem za, a Siizɩ tẽw dɩ̃dɔr nʋɔr. A Naaŋmɩn na so bom za a, ƴãw ʋ nɩ a dɔwrʋ ʋl na sɛw taa nɩ ʋ a fɔ̃wlɛ.

³¹ Nyɩ mɛr a sɛb-tʋɔla ŋa a nɩ-yaga tuor-taa ziir za. Al pùorí, nyɩ bɛr a Zifʋ mɩnɛ bɛ so bɛ tʋɔra tuur'ɩ a bɛ bʋʋrɛ tub,

³² nyɩ sõw bɛ, bɛ zɛb tʋ̃ɔ́ a bɛlɩ dem na na zɛb'ɩ bɛ a bibir ʋl bɛ na tɩ ƴãw a bɛ kʋb ƴãw a, a pɛr lɛ k'aa a cuwr pie nɩ ayi sob, a Adaar cuw bibie pie nɩ ata sob.

³³ Bʋ̃ʋ n'ʋ vɛ̃, a Naaŋmɩn na dɩrɛ naalʋ bom za zu a ɩ na a bibir ŋa lɩɛbɩ a nɩ-bʋʋrɛ ʋ na kaa ír a, nʋ̃ɔ̀ bibir, ɛ́ bɛ ɩ a bɛ kʋ-pàw-pɛr bibir ɛ.

³⁴ A na ɩ à ŋá a, a nyɩɩm mɩ̀, nyɩ ɩ a bibi-kpɛ̃ɛ ŋa ɩ a cuwr nyɩ na tɛr maalɛ a, cuw kãw, nyɩ maalɛ cɩlɛ nɩ cɩlʋ bʋʋrɛ za.

³⁵ Dɩ̃a na ta a, a bibir ŋa na ɩ n faafʋ bibir mãa nɩ a Pɛrsɩ nɩbɛ bɛl na tɛr tɩɛr-vɩɛlɩ a zie, ɛ́ ɩ bɛlɩ dem na bʋ̀rɛ taa a ɩ̃ ƴãw a loba bibir.

³⁶ Tẽ-kpɛ̃ɛ za bɩɩ tẽ-ŋmãa-kʋ̀ra za bɛ wa tu à à ŋá ɩ̃ na yel a, a ɩ̃ suur na ìr'ɩ a zu: bɛ na kʋ n a nɩbɛ ɛ́ nyɩw a yie. Nɩsaal za kʋ̃ lɛb tʋ̃ɔ́ kpɛ a pʋɔ ɩ, ɛ́ a lili nɩ a wɛ-dʋn tɛɛ za kʋ̃ nɔnɛ a ɩ, ɛ́ zawr'a bɛr a nʋɔr kʋ.»