A Ɛsɩtɛɛr sɛbɛ na sɛb'ɩ a gɩrɛkɩ kɔkɔr a 10_1 - A SƐB-SÕW

⁴ A Maadose mɩ́ tɩ yel'a: «Naaŋmɩn tome n'ɩ a yele á ŋá za.

⁵ Bʋ̃ʋ n'ʋ vɛ̃, ɩ̃ lɛb'a bãwnɩ a zánʋ ʋl ɩ̃ na tɩ zánɩ a yele á ŋá ƴãw a, ʋ za tu na.

⁶ Ɩ̃ tɩ nyɛ̃ nɩ bul-nɔ-pʋrɩ na wa lɩɛbɩ man a. Al pùorí, cãà nɩ mʋ̃tɔ̃w nɩ kʋ̃ɔ yaga tɩ n'a. A Ɛsɩtɛɛr a nãà na kul, ɛ́ ƴãw ʋ lɩɛbɩ a nãà-pɔw a, ʋlɛ n'ɩ a man.

⁷ Mãa nɩ a Haman, tɩmɛ n'ɩ a wa-bɩɩr bɛrɛ bɛrɛ ayi.

⁸ A nɩ-bʋʋrɛ n'ɩ a bɛl na lãw taa kɛ́ bɛ kʋ a Zifʋ mɩnɛ pàw pɛr a.

⁹ A bɛlɩ dem na kõ bʋɔlɩ a Naaŋmɩn ʋʋ faa bɛ a n'ɩ a Ɩsɩrayɛl bʋʋrɛ, a mãa mɩŋa bʋʋrɛ. A Sore Naaŋmɩn faa nɩ a ʋ nɩ-bʋʋrɛ! A Sore faa tɩ nɩ a kpɩɛrʋ á ŋá za pʋɔ! Ʋ maal'ɩ nɔ-ɓãa-yele nɩ yel-bãw-guuri na bɛ dãw maalɩ a nɩ-bʋʋr-yoru zie a.

¹⁰ Ʋ cɔbr'ɩ a lɛ a yele na na ɩ a, a ɩ ziir ayi a kãw a ʋ nɩ-bʋʋrɛ ƴãw, ɛ́ kãw a nɩ-bʋʋr-yoru za na cɛ a ƴãw.

¹¹ Zɩ̃ k'aa yele ayi á ŋá tɩ maal'ɩ a bibir ʋl nɩ a tɛm nɩ a daar ʋl a Naaŋmɩn na yel k'ʋʋ na dɩ n nɩ a nɩ-bʋʋrɛ za a ƴɛ̀rʋ a.

¹² Lɛ n'a a Naaŋmɩn tɩ lɛb tɩɛrɩ a ʋ nɩ-bʋʋrɛ yele, ɛ́ lɛb maalɩ a bɛlɩ dem ʋ na so a ƴãw.

¹³ Alɛ so, a fɛr k'aa Adaar cuw daar, bɛ mɩ́ ɓã taa a Naaŋmɩn niŋé maalɩ cuw cɩlɛ nɩ bibie ayi, a cuw bibie pie nɩ anaar nɩ a bibie pie nɩ anũu sob. A Naaŋmɩn nɩ-bʋʋrɛ na dɔwr lɩɛrɛ taa a pʋɔ a, bɛ na maalɛ nɩ a cuw ŋa kʋrakʋralɛ.»

A sɛbɛ baarʋ ƴɛ̀r-bie

¹⁴ A Pitoleme nɩ a nãà-pɔw Kɩlopatɩr naalʋ-dɩb yome anaar daar, Dositɔsɩ, na tɩ yel k'ʋʋ ɩ n bàwr-maalɛ ɛ́ ɩ levitɩ a, nɩ a ʋ bidɛb Pitoleme, tɩ wa n nɩ a sɛbɛ na manɛ a Puurim cuw yele a. Bɛ tɩ yel'a k'aa Puurim cuw sɛb-sɩza n'ʋ, nɩ kɛ́ Pitoleme bidɛb Lisimakɩ, na ɩ Zerizalɛm tẽw nɩr kãw a n'ʋ lɩɛbɩ ʋ ƴãw a bɛ ƴɛ̀rʋ pʋɔ.