2 Samɩɛl 14 - A SƐB-SÕW

A Abɩsalɔm lɛb'a wa a Zerizalɛm

¹ A Zowab, a mã na tɩ dɩ kɛ́ Seruya a, tɩ nyɛ̃ na k'aa nãà Daviir suur tɩ ɓãá nɩ a Abɩsalɔm ƴãw.

² Ʋ tɩ tõ na bɛ tɩ bʋɔlɩ Tekowa tẽw pɔw kãw na bãw yã a, wa n, ʋ wa yel ʋ à ŋá: «Bãw kɛ́ ɩ wahala nɩr, su ko-tuolu bome, ta zɛ kãá-nyũu ɛ, ɛ́ ɩ mɛ̃ pɔw na kone a ʋ nɩr koro za a.

³ Al pùorí, cen tɩ páw a nãà, ƴɛ̀r à ŋá a ʋ zie.» Ɛ́ a Zowab tɩ manɩ a lɛ za ʋ na na yel kʋ̀ a nãà a, kʋ̀ ʋ.

⁴ Lɛ n'a a Tekowa tẽw pɔw ʋl tɩ cen a nãà zie, tɩ gũu tɩ tɔ a tẽw, ɛ́ yel a nãà à ŋá: «Ɩ̃ nãà a, faa mɛ̃!»

⁵ A nãà sowr'ʋ: «Bʋ̃ʋ n'ʋ tɛr fʋ?» Ʋ sɔw: «'Woi! Nãà a, pɔw-kʋɔr nɛ m, a ɩ̃ sɩr kpi na.

⁶ Ɩ̃ tɩ tɛr'ɩ bidɛbr ayi, bɛ tɩ zɛb'ɩ taa a wɩ̀ɛ pʋɔ, a kãw kʋ a kãw, nɩr za na bɛ tɩ be be na faarɩ bɛr a ƴãw.

⁷ Lɛ n'a a dɔwlʋ nɩbɛ za ìr lo a ɩ̃ zu. Bɛ tɩ yel mɛ̃ na: “Kʋ̀ tɩ a yɛb na kʋ a ʋ yɛb a. Tɩ na kʋ ʋ na yáa a ʋ yɛb ʋ na kʋ a san. À ŋá n'a tɩ mɩ̀ na ɩ a gbã-dɩrɛ ta ka be ɩ.” À à ŋá bɛ na ɩrɛ a, bɛ na baa na sãw a ɩ̃ tɩɛrʋ ɩ̃ na tɛr a. Bɛ bɛ bɔbr k'aa ɩ̃ sɩr tɛr bʋʋrɛ na na cãà pore a ʋ yúor a tẽw zu a ɩ.»

⁸ A nãà tɩ yel ʋ na: «Ìr kule a fʋ yir, ɩ̃ na ƴãw nɩ nɩbɛ bɛ kaa a fʋ yel zie.»

⁹ A Tekowa tẽw pɔw lɛb yel a nãà: «Nãà ɩ̃ sore e, a sãwna, ʋ lo mãa nɩ a ɩ̃ yir dem zu! A fʋ̃ʋ nɩ a fʋ naalʋ-dà-kɔw bɛ tɛr sãwna ɩ.»

¹⁰ A nãà tɩ yel ʋ na: «Nɩr wa yere fʋ a, tɛr ʋ wa n wa kʋ̀ m, ʋʋ kʋ̃ lɛb fɛr fʋ ɛ.»

¹¹ A pɔw tɩ yel'a ƴãw pʋɔ: «A nãà, ʋ sàw pɔ a Sore ʋ Naaŋmɩn yúor ƴãw, k'aa sob nɛ, a na fɛr k'ʋʋ kʋ yáa a ɩ̃ bidɛb san a, kʋ̃ lɛb baa kʋ à ŋà na cɛ m'a ɩ.» A nãà yel: «A Sore na vʋʋrɛ a yúor ƴãw, a fʋ bidɛb zukɔbr been bɛ lore tẽw ɛ.»

¹² A pɔw lɛb yel: «Ɩ̃ nãà a, sàw ɩ̃ lɛb yel bʋ̃-kãw ƴãw pʋɔ.» Ʋ yel ʋ: «Ƴɛ̀rɛ!»

¹³ A pɔw yel: «Ɛ́ bʋ̃ʋ n'ʋ so fʋ ɩ à à ŋá a Naaŋmɩn nɩ-bʋʋrɛ ƴãw? A ƴɛ̀rʋ fʋ na ƴɛ̀r a ƴɛrɛŋa a wul'a kɛ́ fʋ sãw na, fʋ na bɛ ƴãw a Abɩsalɔm yi a ʋ zɔ-cenu zie lɛb wa a.

¹⁴ Sɩza n'a, tɩ za na kpi na ɩ mɛ̃ kʋ̃ɔ na cir tẽw bɛ kʋ̃ tʋ̃ɔ́ wob a. Ɛcɛ a Abɩsalɔm ƴãw a, Naaŋmɩn tɛr'ɩ tɩɛrʋ na bɛ ŋmɛ̃ taa nɩ a fʋ dem a. A sob nɛ bɛ na tɩ diw ʋ zãá a bɛ sɛw k'ʋʋ vʋʋrɛ zãá nɩ a Naaŋmɩn ɛ.

¹⁵ Ƴɛrɛŋa a, ɩ̃ wa na wa yel à à ŋá za kʋ̀ b, a nɩbɛ na ɩ dɛ̃bɩ̃ɛ kpɛ m'a ƴãw. Ɩ̃ tɩɛr'ɩ ɩ̃ pʋɔ à ŋá: “Ɩ̃ na ƴɛ̀r'ɩ a nãà zie, a mɩnɛ kãw, ʋ na ɩ n a lɛ ɩ̃ na na yel kʋ̀ ʋ a.

¹⁶ Ʋ na sàw na faa tɩ a sob nɛ na bɔbr k'ʋʋ kʋ mãa nɩ a ɩ̃ bidɛb, ír tɩ bɛr a Naaŋmɩn nɩ-bʋʋrɛ pʋɔ a.”

¹⁷ À ŋá n'a ɩ̃ tɩ tɩɛrɩ: “A lɛ a nãà na na yel a na ɓaal'ɩ a nɩbɛ. Bʋ̃ʋ n'ʋ vɛ̃, a nãà ɩ̃ sore, ɩ na mɛ̃ Naaŋmɩn malkɩ a, ʋ mɩ́ bãw nɩ a vla nɩ a faa.” A Sore fʋ Naaŋmɩn, ʋ be a fʋ zie.»

¹⁸ A nãà tɩ yel'ɩ a pɔw: «Ɩ̃ tɛr'ɩ sowru na sowri fʋ, taa sɔwlɛ mɛ̃ bom za ɩ.» A pɔw yel: «Ƴɛ̀rɛ, nãà a!»

¹⁹ A nãà yel: «A Zowab bɛ n'ʋ ƴãw fʋ ɩrɛ à à ŋá za ɩ?» A pɔw sɔw: «Ɩ̃ pɔ n nɩ a fʋ nyɔ-vʋʋrʋ, lɛ tɔr za n'a! A fʋ tõ-tõ-bie Zowab n'ʋ sɩrɩ yel a ƴɛ̀r-bie al za a na fɛr k'ɩ̃ɩ yel a.

²⁰ Ʋ ɩ n à à ŋá k'aa yele lɩɛbɩ. Ɛcɛ fʋ̃ʋ a, fʋ bãw nɩ bom za na ɩrɛ a tẽw zu a, bʋ̃ʋ n'ʋ vɛ̃, fʋ tɛr'ɩ a yã-bãwfʋ mɛ̃ Naaŋmɩn malkɩ a.»

²¹ A nãà tɩ yel'ɩ a Zowab: «A baar'a, ɩ̃ na ɩ n a lɛ fʋ na yel a. Cen tɩ tɛr a Abɩsalɔm lɛb wa n.»

²² A Zowab tɩ gũu na tɩ tɔ tẽw a nãà niŋé, ɛ́ puor'ʋ barka yel: «Ƴɛrɛŋa a, ɩ̃ bãw na k'aa nãà pʋɔ cãà na pɛlɩ a ɩ̃ ƴãw, bʋ̃ʋ n'ʋ vɛ̃, ʋ sàw na tu a lɛ ɩ̃ na yel a.»

²³ A Zowab tɩ ìr'a lo a Gesuur sɔ́r, cen tɩ tɛr a Abɩsalɔm lɛb wa n a Zerizalɛm.

²⁴ A nãà tɩ yel'a: «Ʋ kul a ʋ yir, ɛ́ ta yi a ɩ̃ niŋé ɩ.» Lɛ n'a a Abɩsalɔm tɩ kul a ʋ yir, ɛ́ bɛ yi a nãà niŋé ɩ.

A Daviir nɩ a Abɩsalɔm lɛb'a kpɛ taa

²⁵ A Ɩsɩrayɛl tẽw za pʋɔ a, nɩr bɛ tɩ pɔl man a Abɩsalɔm ɛ, bɛ bɛ tɩ mʋʋrɛ nɩr man ʋ ɛ: a ʋ ƴã-gan zie kãw bɛ tɩ be be tɛr faa ɩ, a gbɛ́ɛ tɩ tɔ a zu.

²⁶ A yũon za baarʋ daar a, ʋ mɩ́ tɩ põ n a ʋ zu, a ʋ zukɔbɛ na mɩ́ tɩ tɩbrɛ zuo a ƴãw. Ʋlɛ wa põ a ʋ zu a, bɛ mɩ́ tɩ ker'ɩ a zukɔbɛ a nãà bʋ̃-kera zu: a mɩ́ tɩ tɩbrɛ na zuo kilo ayi.

²⁷ A Abɩsalɔm tɩ dɔw nɩ bidɛbr ata, nɩ pɔwya-been, na dɩ kɛ́ Tamaar a. A Tamaar tɩ pɔ̀l'a bɛ dɩ vuo ɩ.

²⁸ A Abɩsalɔm tɩ kpɛ n a Zerizalɛm yome ayi, ɛ́ bɛ yi a nãà niŋé ɩ.

²⁹ Bibir kãw, a Abɩsalɔm tɩ tõ na kɛ́ bɛ tɩ bʋɔlɩ a Zowab ʋ wa, ʋ wa tõ ʋ a nãà zie, ɛcɛ a Zowab tɩ zawr'ɩ a ʋ zie waa. A Abɩsalɔm lɛb tõ a gb'a ayi sob, ʋ cãà lɛb zawrɩ.

³⁰ Lɛ n'a a Abɩsalɔm tɩ yel a ʋ tõ-tõ-biir: «Nyɩ nyɛ̃ nɩ a Zowab ɔɔzʋ púo na pɩɛlɩ a ɩ̃ dem a, nyɩ cen tɩ nyɩw ʋ bɛr.» A Abɩsalɔm tõ-tõ-biir ɩ a lɛ ʋ na yel a.

³¹ Daadaalɛ, a Zowab tɩ cen nɩ a Abɩsalɔm zie tɩ sowr'ʋ: «Bʋ̃ʋ n'ʋ so a fʋ tõ-tõ-biir nyɩw a ɩ̃ púo bɛr?»

³² A Abɩsalɔm sɔw ʋ: «Ɩ̃ na bʋɔlɩ fʋ gù a n'a so. Ɩ̃ tɩ yel k'ɩ̃ɩ to b fʋ tɩ sowri a nãà à ŋá: “Bʋnʋ ƴãw n'a ɩ̃ yi a Gesuur lɛb wa? Mãa tɩ cãà be a be a, alɛ tɩ sa.” Ƴɛrɛŋa a, ɩ̃ bɔbr'a k'ɩ̃ɩ yi a nãà niŋé, ɛ́ mãa wa tɛr sãwna kãw a, ʋ ƴãw bɛ kʋ m.”»

³³ A Zowab tɩ cen na tɩ manɩ a za kʋ̀ a nãà. A nãà tɩ ƴãw na bɛ bʋɔlɩ a Abɩsalɔm, ʋ wa, wa gũu tɩ tɔ tẽw a nãà niŋé. Lɛ n'a a nãà tɩ nyɔw ʋ weri.