2 Na-mɩnɛ 24 - A SƐB-SÕW

¹ A ʋ naalʋ-dɩb daar'a a Babɩlɔn tẽw nãà, Nabikodonozɔɔr, tɩ wa zɛb de a Zuda tẽw. Ʋ tɩ só nɩ a Yoyakim yome ata. Al pùorí a Yoyakim bɛ lɛb cãà sàw ʋ só ʋ ɛ.

² Lɛ n'a a Sore tɩ ƴãw nɩ-farbɛ, na ɩ Babɩlɔn tẽw dem, Siiri tẽw dem, Mowab tẽw dem nɩ Amɔ̃ tẽw dem a, bɛ wa sãw a Zuda naalʋ-tẽw bɛr, mɛ̃ a lɛ a Sore na tɩ ƴãw a naaŋmɩn-ƴɛ̀r-manbɛ yel a.

³ A Sore n'ʋ tɩ ɩ a yel-faar á ŋá za páw a Zuda naalʋ-tẽw, ʋ na bɛ tɩ cãà bɔbr k'ʋʋ nyɛ̃ ʋ a ʋ niŋé a ƴãw. Bʋ̃ʋ n'ʋ vɛ̃, a nãà Manase tɩ maal'ɩ a yel-bebe yaga za.

⁴ Ʋ tɩ ɩ na nɩ-yaga na bɛ sãw a kpi, a Zerizalɛm tẽ-kpɛ̃ɛ ɩ zɩ̃ɩ tɛwr, a Sore bɛ sàw dɩ suur ɛ.

⁵ A Yoyakim yele al na cɛ a, a alɩ bome nɛ za ʋ na ɩ a, a sɛb'ɩ a «Zuda tẽw na-mɩnɛ ɩ-ɩrɩ sɛbɛ» pʋɔ.

⁶ A Yoyakim na wa kpi cen tɩ páw a ʋ sãà mɩnɛ a, a ʋ bidɛb, Yoyakin, n'ʋ lɩɛr'ʋ dɩ a naalʋ.

⁷ A Eziptɩ tẽw nãà ʋl a, ʋ bɛ tɩ cãà yire a ʋ tẽw pʋɔ nɩ a ʋ zɛbr-nɩbɛ ɩ. Bʋ̃ʋ n'ʋ vɛ̃, a Babɩlɔn tẽw nãà tɩ faa nɩ a ziir al za ʋ na tɩ dãw so a, a Eziptɩ saa-pɛrɩ́-gʋba-lowr tʋr-bɔw tɩ tɔ a Babɩlɔn man Efaratɩ.

A Zuda tẽw nãà Yoyakin. A diw-cenu dãw-niwn sob

⁸ A Yoyakin tɩ tɛr'ɩ yome pie nɩ ani, a lɛn daar ʋ na tɩ lɩɛbɩ a nãà a, ɛ́ dɩ a naalʋ cuwr ata, a Zerizalɛm. A ʋ mã tɩ dɩ na kɛ́ Nehusɩta, ɛ́ ɩ Ɛlnatan, na yi a Zerizalɛm a, pɔwyaa.

⁹ A Yoyakin tɩ ɩ n a lɛ na bɛ vɩɛl a, a Sore zie, mɛ̃ a lɛ tɔr za a ʋ sãà na tɩ ɩ a.

¹⁰ A ʋlɩ daar nɛ a, a Babɩlɔn tẽw nãà, Nabikodonozɔɔr, zɛbr-nɩbɛ nɩ-bɛrɛ tɩ wa n nɩ a zɛbr-nɩbɛ a Zerizalɛm ƴãw, wa piw a tẽw.

¹¹ Bɛ na tɩ piw a tẽw a n'a a Nabikodonozɔɔr tɔr za tɩ wa a be.

¹² Lɛ n'a a Zuda tẽw nãà, Yoyakin, tɩ ƴãw ʋ tʋɔra a Babɩlɔn tẽw nãà nuru pʋɔ, lãwnɩ a ʋ mã, a ʋ sojarɩ nɩ-bɛrɛ, a ʋ nɩ-yée nɩ a ʋ tõ-tõ-bi-bɛrɛ. A Nabikodonozɔɔr tɩ nyɔw bɛ na bɛ ɩ gaso nɩbɛ. A ʋ naalʋ-dɩb yome ani sob tɩ n'a.

¹³ Ʋ tɩ kár'ɩ a salm-zɩɛ bome za a nãà Salomɔ̃ na tɩ maalɩ a Ŋmɩn-yir-kpɛ̃ɛ ƴãw a, bɛr, ɛ́ tuo a Sore Ŋmɩn-yir-kpɛ̃ɛ nɩ a nãà yir na-bome za cen nɩ, mɛ̃ a lɛ a Sore na tɩ yel a.

¹⁴ A Nabikodonozɔɔr tɩ diw nɩ a Zerizalɛm tẽw dem za cen nɩ: a nɩ-bɛrɛ za, a zɛbr-nɩbɛ nɩ-bɛrɛ za, a pɛr lɛ kɛ́ nɩbɛ tùr-pie (10 000). Ʋ mɩ̀ tɩ ír'ɩ a nuru-tõ-bʋʋrɛ nɩbɛ za nɩ a sãa-kpɩɛrbɛ za cen nɩ. A nan dem tɛwr'a ʋ tɩ bɛr a be.

¹⁵ Ʋ tɩ ír'ɩ a Yoyakin cen nɩ a Babɩlɔn, lãwnɩ a ʋ mã, a ʋ pɔwbɛ nɩ a ʋ nɩ-yée, nɩ a Zuda tẽw nɩ-bɛrɛ.

¹⁶ A na ɩ lɛ a, ʋ tɩ tɛr'ɩ a nɩ-tɩbrɛ za cen nɩ a Babɩlɔn, a pɛr lɛ kɛ́ nɩbɛ túr ayopõi (7 000), lãwnɩ nuru-tõ-bʋʋrɛ nɩbɛ nɩ a sãa-kpɩɛrbɛ na ta nɩbɛ túr (1 000) a. Bʋ̃ʋ n'ʋ vɛ̃, a nɩbɛ bɛ ŋa za tɩ man nɩ a sojarɩ kpɛb.

¹⁷ Al pùorí, a Nabikodonozɔɔr tɩ kaa na ír a Yoyakin sãà kãw, Matanɩa, ƴãw k'ʋ ɩ a nãà, ʋʋ lɩɛbɩ a ʋ yúor, ʋ dɩ Sedesɩasɩ.

A Zuda tẽw nãà Sedesɩasɩ

¹⁸ A Sedesɩasɩ tɩ tɛr'ɩ yome lɩzɛr'ɩ been, a lɛn daar ʋ na tɩ lɩɛbɩ a nãà a, ɛ́ dɩ a naalʋ yome pie nɩ been, a Zerizalɛm. A mã tɩ dɩ na kɛ́ Hamutal, ɛ́ ɩ Yirmeyahu, na yi Livina a, pɔwyaa.

¹⁹ A Sedesɩasɩ tɩ ɩ n a lɛ na bɛ vɩɛl a, a Sore zie, mɛ̃ a lɛ tɔr za a Yoyakim na tɩ ɩ a.

²⁰ A Sore suur'a so ʋ tɩ ɩ a yel-faar á ŋá za páw a Zerizalɛm nɩ a Zuda tẽw, ʋʋ wa baa diw bɛ bɛr a ʋ niŋé, bɛ zãá nɩ ʋ. A Sedesɩasɩ bɛ tɩ cãà sàw a Babɩlɔn tẽw nãà nɩ-kpɛ̃ɛnʋ a ʋ zu ɛ.