2 Na-mɩnɛ 22 - A SƐB-SÕW

A Zuda tẽw nãà Zozɩasɩ

¹ A Zozɩasɩ tɩ tɛr'ɩ yome ani, a lɛn daar ʋ na tɩ lɩɛbɩ a nãà a, ɛ́ dɩ a naalʋ yome lɩzɛr'ɩ pie nɩ been, a Zerizalɛm. A mã tɩ dɩ na kɛ́ Yedida, ɛ́ ɩ Adaya, na yi Bɔsɩkatɩ a, pɔwyaa.

² A Zozɩasɩ tɩ ɩ n a lɛ na vɩɛl a, a Sore zie. Ʋ tɩ tu n a ʋ sãàkʋm-kʋra Daviir sɔ́r, ɛ́ bɛ bɩɛ dʋrʋ bɩɩ gʋba ɩ.

A bàwr-maal-kara nyɛ̃ nɩ a wulu sɛbɛ

³ A Zozɩasɩ naalʋ-dɩb yome pie nɩ ani sob daar'a, ʋ tɩ tõ a sɛ-sɛbrɛ Safan, na ɩ Asalɩahu bidɛb, ɛ́ ɩ Mesulam yãw a, a Ŋmɩn-yir-kpɛ̃ɛ́.

⁴ Ʋ tɩ yel ʋ na: «Cen tɩ páw a bàwr-maal-kara Hɩlkɩahu. Yel ʋ k'ʋʋ sɔ́r a libie a nɩbɛ na tɩr a Ŋmɩn-yir-kpɛ̃ɛ ƴãw, ɛ́ a bàwr-maalbɛ na gùre a dɩ̃dɔr a de a.

^5-6 Bɛ de a libie á ŋá kʋ̀ a tõ-tõ-nɩ-bɛrɛ na so a Ŋmɩn-yir-kpɛ̃ɛ maal-ƴãwfʋ tome a. Bɛ na tʋ̃ɔ́ na mɩ́ ya n a dà-fɔwrbɛ, a yir-mɩɛrbɛ nɩ a tõ-tõ-biir bɛl na cɛ a, ɛ́ dà n a dàar nɩ a kʋsɛ-pɛnɩ bɛrɛ bɛrɛ na fɛrɛ a Ŋmɩn-yir-kpɛ̃ɛ maal-ƴãwfʋ tome ƴãw a.

⁷ Ɛcɛ nɩr taa sowre bɛ a libie á ŋá yele ɩ, bʋ̃ʋ n'ʋ vɛ̃, bɛ mɩ́ ɩ n a ɩb a tori.»

⁸ Lɛ n'a a bàwr-maal-kara Hɩlkɩahu tɩ yel a sɛ-sɛbrɛ Safan: «Ɩ̃ nyɛ̃ nɩ a wulu sɛbɛ a Ŋmɩn-yir-kpɛ̃ɛ pʋɔ.» Ʋ tɩ kʋ̀ n a sɛbɛ a Safan ʋ kanɩ.

⁹ Al pùorí, a Safan tɩ cen na tɩ manɩ a lɛ na be be a kʋ̀ a nãà. Ʋ tɩ yel ʋ na: «Tɩ kpowri nɩ a Ŋmɩn-yir-kpɛ̃ɛ daga libie kʋ̀ a tõ-tõ-nɩ-bɛrɛ na so a yir maal-ƴãwfʋ tome a.»

¹⁰ Al pùorí ʋ yel ƴãw pʋɔ: «A bàwr-maal-kara Hɩlkɩahu kʋ̀ m'ɩ sɛbɛ ŋa.» Ɛ́ kanɩ a sɛbɛ kʋ̀ a nãà.

A Zozɩasɩ ƴãw na bɛ cen tɩ sowri pɔw-naaŋmɩn-ƴɛ̀r-manɛ Hulida kaa

¹¹ A nãà Zozɩasɩ na tɩ wõ a Naaŋmɩn wulu sɛbɛ ƴɛ̀r-bie a, a dam ʋ na, ʋ taw a ʋ kparɩ cɩɛrɩ.

¹² Al pùorí, ʋ ƴãw bɛ bʋɔlɩ a bàwr-maal-kara Hɩlkɩahu, nɩ Safan bidɛb Ahikam, nɩ Mikaya bidɛb Akɩbɔɔr, nɩ a sɛ-sɛbrɛ Safan de nɩ Asaya na ɩ a ʋ tõ-tõ-bi-kpɛ̃ɛ kãw a, ʋ wa yel bɛ à ŋá:

¹³ «Nyɩ cen tɩ sowri a Sore kaa, mãa nɩ a Zuda nɩbɛ za ƴãw, a sɛbɛ ŋa bɛ na nyɛ̃ a ƴɛ̀r-bie ƴãw. Bʋ̃ʋ n'ʋ vɛ̃, a tɩ sãàkʋm-kore bɛ bɛr wõ a sɛbɛ ŋa ƴɛ̀r-bie ɩ, bɛ bɛ tu a alɩ bome nɛ za na sɛb a ʋ pʋɔ a ɩ. A na ɩ à ŋá a, a Sore na nyɛ̃ nɩ tɩ nɩ suur yaga za.»

¹⁴ A lɛ n'a a bàwr-maal-kara Hɩlkɩahu, a Ahikam, a Akɩbɔɔr, a Safan nɩ a Asaya tɩ cen a pɔw-naaŋmɩn-ƴɛ̀r-manɛ Hulida na tɩ kpɩɛr a Zerizalɛm Lowr-Paala pʋɔ a zie. A ʋ sɩr Salum, na ɩ Tikɩwa bidɛb, ɛ́ ɩ Harasɩ yãw a, tɩ n'ɩ a Ŋmɩn-yir-kpɛ̃ɛ kpar-son kaarɛ. A nɩbɛ bɛ ŋa tɩ manɩ nɩ a yel kʋ̀ a pɔw-naaŋmɩn-ƴɛ̀r-manɛ.

¹⁵ Lɛ n'a a Hulida tɩ yel kɛ́ bɛ cen tɩ yel à ŋá kʋ̀ a nãà na tõ bɛ a:

¹⁶ «À ŋá n'a a Sore, a Ɩsɩrayɛl Naaŋmɩn, yere: “Ɩ̃ na ɩ na faa páw a Zerizalɛm nɩ a ʋ nɩbɛ, mɛ̃ a lɛ bɛ na sɛb a sɛbɛ, a Zuda tẽw nãà na kanɩ a pʋɔ a.

¹⁷ A Zerizalɛm tẽw dem zawrɩ mɛ̃ na bɛr, bɛ nyɩw nɩ tɩ-suur-zɔ̃-na-nyùur-vla-vla-a kʋ̀ ŋmɩn-yoru, a bɛ tɩbɛ ɩ na a ɩ̃ suur ìr. Alɛ so a ɩ̃ suur bɛrmɛ a tẽw ŋa ƴãw, ɛ́ kʋ̃ ɓãá ɩ.

¹⁸ A Zuda tẽw nãà na tõ nyɩ kɛ́ nyɩ wa sowri mɛ̃ kaa a, nyɩ na tɩ yel'ɩ à ŋá kʋ̀ ʋ: À ŋá n'a a mãa, a Sore, a Ɩsɩrayɛl Naaŋmɩn, yere: Fʋ wõ n a sɛbɛ ŋa ƴɛ̀rʋ.

¹⁹ A dam'ɩ a fʋ socir, fʋ siwri nɩ fʋ tʋɔra a ɩ̃ niŋé, fʋ na wõ a lɛ ɩ̃ na yel a Zerizalɛm nɩ a ʋ nɩbɛ ƴãw a zũú. Bʋ̃ʋ n'ʋ vɛ̃, ɩ̃ yel'a k'aa tẽ-kpɛ̃ɛ ŋa na lɩɛb'ɩ wɛja-kpalɛ, nɩ zie bɛ na ŋmɛ ƴãw a. Fʋ taw nɩ a fʋ kparɩ cɩɛrɩ ɛ́ kõ a ɩ̃ niŋé. A na ɩ à ŋá a, a mãa mɩ̀ a, ɩ̃ wõ n a fʋ ƴɛ̀rʋ, mãa n'ʋ yere.

²⁰ Alɛ n'a so ɩ̃ na bɛr fʋ, fʋ lɛb cen tɩ páw a fʋ sãà mɩnɛ, ɛ́ siw a bɔw pʋɔ nɩ ƴã-ɓaarʋ, ɛ́ bɛ nyɛ̃ a faa al za ɩ̃ na na ɩ a páw a Zerizalɛm a ɩ.”» A bàwr-maal-kara Hɩlkɩahu nɩ a ʋ taabɛ tɩ lɛb'a wa n a sɔwfʋ ŋa, wa yel kʋ̀ a nãà Zozɩasɩ.